༢༠༡༣ ཟླ་ ༣ ཚེས་ ༢༣ རེས་གཟའ་སྤེན་པ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༢༢ ཉིན་རྒྱལ་སྤྱིའི་ཆུ་བོའི་ཉིན་མོ་ཡིན་པ་ལྟར། རྒྱལ་སྤྱིའི་བོད་དོན་རྒྱབ་སྐྱོར་འབྲེལ་མཐུད་ཁང་གིས་བོད་ཀྱི་ཆུ་བོའི་ཁག་ལ་བརྟེན་པའི་ཨེ་ཤི་ཡའི་རྒྱལ་ཁབ་ཁག་གི་འགོ་ཁྲིད་སོ་སོར་སྙན་ཞུ་ཕུལ་བ་དང་ཆབས་ཅིག་ཡོངས་ཁྱབ་གསར་འགོད་གསལ་བསྒྲགས་འདོན་སྤེལ་གནང་ཡོད་པའི་ནང་འཁོད་དོན། རྒྱ་ནག་གཞུང་གིས་བཙན་འཛུལ་བྱེད་ཡུལ་བོད་ཀྱི་ས་ཁུལ་དེ་ནི། འཛམ་གླིང་གི་བྱང་སྣེ་གསུམ་པ་ཆགས་ཡོད། སྤྱིར་བཏང་བོད་དེ་བཞིན་ཨེ་ཤི་ཡའི་ཆུ་བོའི་འབྱུང་ཁུངས་གཙོ་བོ་ཆགས་ཡོད་པར་བརྟེན། རྒྱ་ནག་གཞུང་ནས་ད་ལྟ་བར་དུ་བོད་ཀྱི་རང་བྱུང་ཁོར་ཡུག་ལ་གཏོར་སྐྱོན་དང། བོད་མི་ཞིང་འབྲོག་མང་དག་ཅིག་བཙན་དབང་གིས་གཞིས་སྤོ་བྱེད་བཅུག་སྟེ་དབུལ་ཕོངས་ཀྱི་གནས་སུ་འགྱུར་གྱི་ཡོད། དེ་བཞིན་རང་བྱུང་གཏེར་ཁ་ཚད་མེད་སྔོག་འདོན་བྱས་དང་བྱེད་མུས་ཡིན་པའི་ནོར་འཁྲུལ་ཅན་གྱི་སྲིད་བྱུས་ལག་བསྟར་བྱས་པར་བརྟེན་ནས་བོད་ཀྱི་གཤམ་འོག་ཏུ་གནས་པའི་རྒྱལ་ཁབ་མང་པོ་ཞིག་གི་མི་དམངས་ཀྱི་འཚོ་རྟེན་ལ་ཧ་ཅང་ཉེན་ཁ་ཆེན་པོ་འཕྲད་དང་འཕྲད་མུས་ཡིན།
ཞེས་སོགས་འཁོད་ཡོད་པ་མ་ཟད། བོད་ཀྱི་ཆུ་རྒྱུན་ཁག་ལ་བརྟེན་ནས་འཚོ་བཞིན་པའི་ཨེ་ཤི་ཡའི་རྒྱལ་ཁབ་འདྲ་མིན་བཅུའི་འགོ་ཁྲིད་ལ་སྙན་ཞུ་ཕུལ་བ་དང་འབྲེལ་བོད་ཀྱི་ཆུ་བོའི་གནད་དོན་ཐོག་རྒྱ་ནག་གཞུང་ནས་འགན་ཁུར་མེད་པའི་སྲིད་བྱུས་འཛིན་བཞིན་པ་དེ་འཕྲལ་དུ་མཚམས་འཇོག་ཡོང་ཐབས་དང་། ལྷག་པར་རྒྱལ་ཁབ་དེ་དག་ནས་རྒྱ་ནག་གཞུང་དང་ལྷན་ཆུ་བོའི་གནད་དོན་ཐོག་གྲོས་མཐུན་ཞིག་འཇོག་ཐབས་དགོས་པའི་འབོད་སྐུལ་ཀྱི་སྙན་ཞུ་ཡང་ཕུལ་འདུག་པ་བཅས། །
