༢༠༡༣ ཟླ་ ༣ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༡ ཉིན་ཤིང་ཧྭ་གསར་ཁང་གིས་ཕ་རན་སི་ནང་གནས་སྡོད་བྱེད་བཞིན་པའི་སྤྱི་ཟུར་ལྷ་མོ་སྐྱབས་སྒེར་གྱི་དྲ་རྒྱའི་ཐོག་ཆེད་རྩོམ་ཞིག་སྤེལ་བ་དེ་ལོག་འགྲེལ་བྱས་ཏེ། ༸གོང་ས་མཆོག་དང་བོད་མིའི་སྒྲིག་འཛུགས་ཀྱིས་བོད་ནང་དུ་རང་ལུས་མེར་སྲེག་གཏོང་རྒྱུའི་བརྒྱུད་སྐུལ་བྱེད་བཞིན་ཡོད་པའི་སྙོན་འཛུགས་བྱས་ཡོད། ལྷ་མོ་སྐྱབས་ནི་བོད་མིའི་སྒྲིག་འཛུགས་དང་སྐུ་སྒེར་ཡིག་ཚང་གཉིས་ཀའི་ཁོངས་སུ་གཏོགས་མེད་པར་བརྟེན་འབྲེལ་བ་རྩ་བ་ནས་མེད། དེར་བརྟེན་ཆེད་རྩོམ་དེ་ནི་ཁོང་མི་སྒེར་ཁོ་ནའི་བསམ་ཚུལ་ཙམ་ལས་མ་འདས།
དེ་ཡང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ཆེད་རྩོམ་དེར་སྐྱོན་བརྗོད་གནང་དོན། འགན་ཁུར་གང་ཡང་མེད་པའི་ཆེད་རྩོམ་དེའི་གྲས་དགོས་མེད་ཀྱིས་རྒྱ་ནག་གཞུང་ལ་ལག་ཆ་ཆགས་ཡོད། གང་ཡིན་བརྗོད་ན། རྒྱ་ནག་གཞུང་གིས་ཆེད་རྩོམ་དེར་བསྙད་འདོགས་བྱས་ཏེ་བོད་མི་ཚོས་རང་ལུས་མེར་སྲེག་གཏོང་དགོས་པའི་རྒྱུ་རྐྱེན་ངོ་མ་སེལ་རྒྱུའི་ཚབ་ཏུ་རང་གི་འགན་འཁྲི་དེ་གཞན་ལ་ཁ་གཡར་ཐབས་བྱེད་བཞིན་ཡོད།
མིའི་ཚེ་སྲོག་ནི་ཧ་ཅང་རྩ་ཆེན་ཡིན་པར་བརྟེན་བཀའ་ཤག་གིས་དུས་རྟག་ཏུ་རང་ལུས་མེར་སྲེག་གིས་མཚོན་ཚབས་ཆེའི་ལས་འགུལ་མ་སྤེལ་རོགས་ཞེས་འབོད་སྐུལ་ཞུ་བཞིན་ཡོད། ༸གོང་ས་མཆོག་བོད་དུ་གདན་ཞུ་དང་བོད་ལ་རང་དབང་དགོས་པའི་གཞིས་ཞུགས་བོད་མི་ཚོའི་མངོན་འདོད་དེར་བོད་མིའི་སྒྲིག་འཛུགས་ཀྱིས་རྒྱབ་སྐྱོར་ཞུ་རྒྱུ་ཡིན། བོད་ནང་གི་དཀའ་ངལ་སེལ་རྒྱུའི་འགན་ཆ་ཚང་རྒྱ་ནག་གཞུང་ལ་ཡོད། རང་ལུས་མེར་སྲེག་ང་ཚོས་བརྒྱུད་སྐུལ་བྱས་པའི་གནད་དོན་དེའི་ཐོག་རྒྱ་ནག་གཞུང་འབྲེལ་མི་སྣ་དངོས་སུ་རྡ་སར་ཕེབས་ཏེ་རྩད་གཅོད་གནང་ཐུབ་ན་ང་ཚོས་དགའ་བསུ་ཞུ་རྒྱུ་ཡིན། ཞེས་གསུངས་ཡོད་པ་བཅས། །
