༢༠༡༣ ཟླ་ ༣ ཚེས་ ༢༩ རེས་གཟའ་པ་སངས།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༢༩ ནས་ཚེས་ ༣༠ བར་བོད་ཀྱི་སྲིད་བྱུས་ཉམས་ཞིབ་ཁང་ནས་གོ་སྒྲིག་འོག་རྡ་ས་གངས་སྐྱིད་སྤྱི་ཐབ་ཡང་སྟེང་ཚོགས་ཁང་དུ་རྒྱ་དམར་གྱི་མི་སྤྱོད་ལས་འདས་པའི་གདུག་རྩུབ་ཅན་གྱི་སྲིད་བྱུས་ལག་བསྟར་གྱིས་སྲེག་བཞིན་པའི་བོད་ནང་གི་ཛ་དྲག་གནས་སྟངས་སྐོར་བོད་མཁས་པའི་བགྲོ་གླེང་ཚོགས་འདུ་དབུ་འཛུགས་གནང་ཡོད།
དེ་ཡང་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་བདེ་སྲུང་བཀའ་བློན་མཆོག་གིས་དབུས་ཀིརྟི་རིན་པོ་ཆེ་མཆོག་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། བགྲོ་གླེང་གཏམ་བཤད་གནང་མཁན་རྣམ་པ། སྡེ་འགན་ཡན་གྱི་སྲི་ཞུ་ལས་བྱེད་རྣམ་པ། ཟུར་སྐྱོང་ཚོགས་པ་ཁག་གི་ཉམས་ཞིབ་པ་རྣམ་པ། གསར་འགོད་པ་བཅས་ཁྱོན་མི་གྲངས་ ༡༠༠ བརྒལ་བ་ལྷན་འཛོམས་དབུས་སུ་བོད་ཀྱི་སྲིད་བྱུས་ཉམས་ཞིབ་ཁང་གི་ཟུང་དྲུང་དོན་གྲུབ་རྒྱལ་པོ་ལགས་ཀྱིས་ཚོགས་འདུ་གཙོ་སྐྱོང་གནང་བ་དང་སྦྲགས་ཐོག་མར་བོད་བསྟན་སྲིད་ཆེད་རང་ལུས་མེར་སྲེག་གཏོང་མཁན་རྒྱལ་གཅེས་པ་འདས་གསོན་ཡོངས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་གྲུབ་མཚམས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་ཚོགས་བཅར་བ་རྣམས་ལ་དགའ་བསུའི་འཚམས་འདྲི་དང་འབྲེལ་གསུང་བཤད་གནང་དོན། བོད་ཀྱི་སྲིད་བྱུས་ཉམས་ཞིབ་ཁང་ནས་ལས་དོན་གཙོ་བོ་གསུམ་ཐོག་ཤུགས་སྣོན་རྒྱག་བཞིན་ཡོད།
དེ་ཡང་བོད་ཀྱི་གནད་དོན་ཐོག་མཁྱེན་རྒྱ་ཡངས་པའི་མི་སྣ་ཁག་དང་ལྷན་བགྲོ་གླེང་གོ་སྒྲིག་ཞུ་རྒྱུ་དང་། ཁོང་རྣམ་པས་རྩོམ་བྲིས་གནང་བ་རྣམས་འདོན་སྤེལ་ཞུ་སའི་དུས་དེབ་ཅིག་གསར་འདོན་ཞུ་རྒྱུ། དེ་བཞིན་དྲ་རྒྱ་ཞིག་གསར་སྐྲུན་ཞུ་འཆར་བཅས་གསུམ་གྱི་ཐོག་འབད་བརྩོན་ཞུ་བཞིན་ཡོད། ཅེས་སོགས་ཀྱི་ངོ་སྤྲོད་གསུང་བཤད་གནང་། དེ་ནས་སྐུ་མགྲོན་གཙོ་བོ་བདེ་སྲུང་བཀའ་བློན་འབྲོང་ཆུང་དངོས་གྲུབ་མཆོག་གིས་ཚོགས་འདུ་དང་འབྲེལ་བའི་དམིགས་བསལ་གསུང་བཤད་གནང་། དེ་རྗེས་བཞུགས་སྒར་ཀིརྟིའི་བྱེས་པ་གྲྭ་ཚང་གི་དབུ་བླ་དང་བཀའ་ཟུར་ཀིརྟི་རིན་པོ་ཆེ་མཆོག་གིས་ཚོགས་འདུ་དང་འབྲེལ་བའི་དམིགས་བསལ་གསུང་བཤད་གནང་སྟེ་མཛད་སྒོ་གྲོལ་ཡོད། དེ་ནས་ཚོགས་ཐུན་དང་པོར། ས་རཱ་བོད་ཀྱི་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ཀྱིས་གཙོ་སྐྱོང་གནང་ཐོག་ཝར་ན་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས་དང་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་ཀ་ཉག་ཚེ་རིང་ལགས་གཉིས་ཀྱིས་རིམ་བཞིན་གསུང་བཤད་གནང་རྗེས་དྲི་བ་དྲིས་ལན་གནང་ཡོད།
ཚོགས་ཐུན་གཉིས་པ། ཝར་ན་བོད་ཀྱི་གཙུག་ལག་སློབ་གཉེར་ཁང་གི་ཉེ་བའི་རིགས་བདག་དགེ་བཤེས་ངག་དབང་བསམ་གཏན་ལགས་ཀྱིས་གཙོ་སྐྱོང་གནང་ཐོག་ས་རཱ་བོད་ཀྱི་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་དང་རྩོམ་པ་པོ་ཆུ་ཚེ་རིང་ལགས་གཉིས་ཀྱིས་རིམ་བཞིན་གསུང་བཤད་གནང་རྗེས་དྲི་བ་དྲིས་ལན་གནང་རྒྱུ་དང་། ཚོགས་ཐུན་གསུམ་པ། རྩོམ་པ་པོ་ཆུ་ཚེ་རིང་ལགས་ཀྱིས་གཙོ་སྐྱོང་གནང་ཐོག་རྩོམ་པ་པོ་ཧོར་གཙང་འཇིགས་མེད་ལགས་དང་བོད་ཀྱི་བང་ཆེན་གསར་ཤོག་རྩོམ་སྒྲིག་པ་གསེར་རྟ་ཚུལ་ཁྲིམས་ལགས་གཉིས་ཀྱིས་རིམ་བཞིན་གསུང་བཤད་གནང་རྗེས་དྲི་བ་དྲིས་ལན་གནང་རྒྱུ་ཡིན་འདུག
དེ་བཞིན་ཕྱི་ཚེས་ ༣༠ ཉིན་ཚོགས་ཐུན་བཞི་པ། བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་འཕར་འཕགས་པ་ཚེ་རིང་ལགས་ཀྱིས་གཙོ་སྐྱོང་གནང་ཐོག་སྤྱི་འཐུས་ཀརྨ་པ་ཆོས་འཕེལ་ལགས་དང་ནོར་གླིང་བོད་ཀྱི་ཉམས་ཞིབ་འགན་འཛིན་རྡོ་རྗེ་དབང་ཕྱུག་ལགས་གཉིས་ཀྱིས་རིམ་བཞིན་གསུང་བཤད་གནང་རྗེས་དྲི་བ་དྲིས་ལན་གནང་རྒྱུ་དང་། ཚོགས་ཐུན་ལྔ་པ། བོད་ཀྱི་སྲིད་བྱུས་ཉམས་ཞིབ་ཁང་གི་ཟུང་དྲུང་དོན་གྲུབ་རྒྱལ་པོ་ལགས་ཀྱིས་གཙོ་སྐྱོང་གནང་ཐོག་དཔེ་མཛོད་ཉམས་ཞིབ་པ་རྒན་དམ་ཆོས་དཔལ་བཟང་ལགས་དང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་གཉིས་ཀྱིས་རིམ་བཞིན་གསུང་བཤད་གནང་རྗེས་དྲི་བ་དྲིས་ལན་གནང་རྒྱུ་ཡིན་འདུག ཚོགས་ཐུན་དྲུག་པ། བློ་བཟང་ལགས་ཀྱིས་གཙོ་སྐྱོང་གནང་ཐོག་བོད་ཀྱི་དུས་བབ་རྩོམ་སྒྲིག་པ་དོན་གྲུབ་བཀྲ་ཤིས་ལགས་དང་རྩོམ་པ་པོ་བསྟན་འཛིན་བརྩོན་འགྲུས་ལགས་གཉིས་ཀྱིས་རིམ་བཞིན་གསུང་བཤད་གནང་རྗེས་དྲི་བ་དྲིས་ལན་གནང་རྒྱུ་ཡིན་འདུག དེ་ནས་ཉིན་གྲངས་གཉིས་རིང་ཚོགས་པའི་བོད་ནང་གི་ཛ་དྲག་གནས་སྟངས་སྐོར་བོད་མཁས་པའི་བགྲོ་གླེང་ཚོགས་འདུའི་མཇུག་སྡོམ་གསུང་བཤད་ཕྱི་དྲིལ་ལས་ཁུངས་ཀྱི་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་གནང་རྗེས་བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་འཕར་བློ་བཟང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྒྱུ་ཡིན་འདུག་པ་བཅས། །
