༢༠༡༣ ཟླ་ ༣ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༣ ཟླ་ ༣ ཚེས་ ༡༨ ཉིན་ཨ་རིའི་རྒྱལ་ཡོངས་གྲོས་ཚོགས་གོང་འོག་གཉིས་ཀྱི་རྒྱ་ནག་ལས་དོན་ཚོགས་ཆུང་གི་ཚོགས་གཙོས་བསྒྲགས་གཏམ་སྤེལ་སྐབས། ཁོང་གིས་བོད་མིས་རང་ལུས་མེར་སྲེག་གཏོང་བཞིན་པ་དེར་བློ་འཚབ་ཆེན་པོ་ཡོད་སྐོར་གསུངས་པ་དང་ཆབས་ཅིག རྒྱ་ནག་གཞུང་ལ་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་དེ་འཕྲལ་དུ་མཚམས་འཇོག་བྱེད་དགོས་པའི་འབོད་སྐུལ་ཡང་གནང་འདུག
དེ་ཡང་གོང་ཚེས་ཉིན་ཨ་རིའི་གྲོས་ཚོགས་གོང་མའི་འཐུས་མི་དང་རྒྱ་ནག་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཤེ་རོ་ཌི་བྷོ་རོན་ (Sherrod Brown) ལགས་ཀྱིས་གསུང་དོན། ང་ཚོས་བོད་མིས་རང་ལུས་མེར་སྲེག་གཏོང་རྒྱུ་དེ་གང་མྱུར་མཚམས་འཇོག་ཡོང་རྒྱུའི་རེ་བ་བྱེད་བཞིན་ཡོད། རྒྱ་ནག་གཞུང་ནས་བོད་ནང་ད་ལྟའི་གདུག་རྩུབ་ཅན་གྱི་སྲིད་བྱུས་དེ་མུ་མཐུད་བཟུང་ན་བོད་ནང་ལྷིང་འཇགས་ཡོང་ཐབས་མེད། རྒྱ་ནག་གཞུང་ནས་བོད་མིའི་ཆོས་དང་རིག་གཞུང། སྨྲ་བརྗོད། འདུ་འཛོམས་རང་དབང་བཅས་ཀྱི་ཐོག་འཛིན་པའི་དམ་བསྒྲགས་ཅན་གྱི་སྲིད་བྱུས་དེ་འཕྲལ་མར་མཚམས་འཇོག་བྱེད་དགོས། རྒྱ་གཞུང་ནས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གམ་ཡང་ན་ཁོང་གི་སྐུ་ཚབ་རྣམ་པ་དང་ལྷན་འབྲེལ་མོལ་སླར་གསོ་བྱས་ཚེ་ཕུགས་རྒྱང་རིང་པོའི་དཀའ་རྙོག་དེ་དག་སེལ་ཐུབ། ཅེས་གསུངས།
ལྷག་པར་ཚོགས་ཆུང་དེའི་ཚོགས་གཞོན་གྲོས་ཚོགས་འཐུས་མི་སྐུ་ཞབས་ཀི་རི་སི་སི་མི་ཐ་ (Chris Smith) ལགས་ཀྱིས་གསུང་དོན། འདས་པའི་ལོ་ཤས་ནང་རྒྱ་ནག་གཞུང་གི་དཔོན་རིགས་རྣམས་ཀྱིས་བོད་ནང་གི་དགོན་སྡེ་ཁག་གི་ཐོག་དམ་བསྒྲགས་བྱེད་རྒྱུ་ཤུགས་ཆེ་རུ་བཏང་ཡོད་པ་མ་ཟད། ཞི་རྒོལ་གནང་མཁན་བོད་མིར་དྲག་སྤྱོད་ཚད་ལས་བརྒལ་བ་བེད་སྤྱོད་བྱེད་བཞིན་ཡོད། དེ་བཞིན་འབྲོག་ས་གཞིས་སྤོས་བྱེད་བཅུག་པ་མ་ཟད། ཤེས་ཡོན་ཐོག་འཛིན་པའི་སྲིད་བྱུས་དེ་དག་གིས་བོད་ཀྱི་ཆོས་དང་རིག་གཞུང་རྩ་བརླག་འགྲོ་རྒྱུའི་ཉེན་འཚབ་ཆེན་པོ་ཆགས་ཡོད། ཕྱོགས་མཚུངས་བོད་ནང་ཕྱི་ཕྱོགས་ཀྱི་མི་སྣ་འགྲོ་བསྐྱོད་བྱེད་རྒྱུར་བཀག་བསྡོམས་བྱེད་བཞིན་ཡོད། ཅེས་གསུངས་ཡོད།
གཞན་ཡང་བསྒྲགས་གཏམ་དེའི་ནང་འཁོད་དོན། རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག བོད་མིའི་འཚོ་རྟེན་ཐོག་ཁྲིམས་མཐུན་མིན་པའི་སྲིད་བྱུས་ལག་བསྟར་བྱས་པར་བརྟེན། ཕྱི་ལོ་ ༢༠༠༨ ཕྱི་ཟླ་ ༣ དང་ ༤ ནང་བོད་ས་ཡོངས་ལ་ཞི་བའི་སྒེར་ལངས་བྱུང་བ་ནས་བཟུང་འདི་ལོའི་ཟླ་བ་གསུམ་པའི་ནང་ལོ་ལྔ་འཁོར་བའི་དུས་དྲན་སྲུང་བརྩི་བྱེད་བཞིན་ཡོད། ཅེས་སོགས་འཁོད་ཡོད་པ་བཅས།།
