༢༠༡༣ ཟླ་ ༢ ཚེས་ ༢༡ རེས་གཟའ་ཕུར་བུ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༢ ཚེས་ ༡༠ སྟེ་བོད་ཀྱི་ལོ་གསར་གནམ་གང་ཉིན་གྱི་མཚན་མོར་ཁམས་ཚ་བ་མཛོ་སྒང་རྫོང། ཚ་བ་སྤོངས་མདའི་ཉེ་འགྲམ་སྨད་ཡས་དགེ་ཚང་ཁུལ་སྨད་ཡས་ཤང་དུ་བོད་མི་མང་པོ་ཞིག་གིས་ཤང་སྲིད་གཞུང་གི་སྒོར་ཁར་ཆོས་དད་རང་དབང་དགོས་ཞེས་ངོ་རྒོལ་སྐད་འབོད་དང། གྱང་ལ་བོད་རང་བཙན་ཡིན་ཞེས་ཡི་གེ་སྦྱར་ནས་དུས་ཡུན་རིང་པོར་ངོ་རྒོལ་སྐད་འབོད་བྱས་ཡོད་འདུག འོན་ཀྱང་ཕྱི་ཚེས་ ༡༡ ཉིན་བོད་ཀྱི་ལོ་གསར་ཚེས་ ༡ ཉིན་མཛོ་སྒང་རྫོང་ནས་ཉེན་རྟོག་པ་དང་། དམག་མི་ཕོན་ཆེན་འབྱོར་ཏེ་ངོ་རྒོལ་དང་འབྲེལ་བ་ཡོད་པའི་ཉེས་འཛུགས་ཀྱིས་བོད་མི་ ༦ འཛིན་བཟུང་བཙན་ཁྲིད་བྱས་ཡོད་པ་མ་ཟད། ཉེན་རྟོག་པས་བོད་མི་དེ་དག་རྡུང་རྡེག་ཚད་མེད་བཏང་ཡོད་ཁོངས་ནས་བོད་མི་ཞིག་གི་རྩིབ་མ་གཉིས་བཅགས་པ་དང། བོད་མི་གཞན་ཞིག་གི་ལག་པ་ཡང་བཅགས་ཡོད་པའི་གནས་ཚུན་ཐོན་འདུག
ཕྱོགས་མཚུངས་ཕྱི་ལོ་ ༢༠༡༣ ཟླ་ ༢ ཚེས་ ༡༠ ཉིན་སྨར་ཁམས་རྫོང་སྤོམ་པ་ཤང་བྲག་རྡིབ་དགོན་པའི་དགེ་འདུན་པ་ཁག་གཅིག་གིས་༸གོང་ས་མཆོག་བོད་ལ་ཕེབས་འཇུག་དགོས་པ་དང་། བོད་ལ་རང་བཙན་དགོས་པ་སོགས་ཀྱི་རྒྱ་གཞུང་ལ་ངོ་སྒོལ་སྐད་འབོད་བྱས་ཡོད་པར་བརྟེན། རྒྱ་གཞུང་གིས་དམག་མི་ཕོན་ཆེན་བཏང་ནས་དགོན་པ་དང་གྲོང་པའི་བར་གྱི་འགྲོ་འོང་བཀག་འགོག་བྱས་ཡོད་པ་མ་ཟད། བྲག་རྡིབ་དགོན་པར་དྲག་གནོན་ཚད་ལས་བརྒལ་བ་བྱས་ཏེ་དགོན་པ་དེའི་དགེ་འདུན་པ་དྲུག་འཛིན་བཟུང་བཙན་ཁྲིད་བྱས་འདུག འོན་ཀྱང་ད་ལྟའི་ཆར་ས་ཁུལ་དེར་རྒྱ་ནག་གཞུང་ནས་དམ་བསྒྲགས་ཤུགས་ཆེ་བྱས་རྐྱེན་དགེ་འདུན་པ་ཁོང་རྣམ་པའི་མིང་སོགས་ཞིབ་ཕྲའི་གནས་ཚུལ་ཤེས་རྟོག་བྱུང་མེད་པ་བཅས། །
