༢༠༡༣ ཟླ་ ༢ ཚེས་ ༥རེས་གཟའ་མིག་དམར།
༄༅། །ཨ་རིའི་གྲོང་ཁྱེར་ནིའུ་ཡོཀ་རུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་པ་ཞིག་ནས་ཕྱི་ལོ་ ༢༠༡༢ ལོའི་འཛམ་གླིང་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་སྙན་ཐོ་ཞིག་འདོན་སྤེལ་གནང་ཡོད་པའི་ནང་འཁོད་དོན། རྒྱ་ནག་གཞུང་ནས་བོད་ནང་གི་བོད་མི་ཚོའི་སྤྱི་ཚོགས་ཀྱི་འཚོ་བ་དང་ཆོས་དད་རང་དབང་སོགས་ལ་ནོར་འཁྲུལ་ཅན་གྱི་སྲིད་བྱུས་བཟུང་དང་འཛིན་བཞིན་ཡོད།
དཔེར་ན། ཕྱི་ལོ་ ༢༠༠༨ ལོར་བོད་ནང་བོད་མིས་ཞི་བའི་སྒེར་ལངས་ཀྱི་ལས་འགུལ་ཤུགས་ཆེན་སྤེལ་རྗེས་རྒྱ་ནག་གཞུང་ནས་དམིགས་བསལ་བོད་ཀྱི་དགོན་སྡེ་ཁག་ནང་དམ་བསྒྲགས་ཤུགས་ཆེ་རུ་བཏང་ཡོད། དེ་བཞིན་བོད་ནང་གི་འབྲོག་པའི་ཐོག་སྲིད་བྱུས་འཛིན་སྟངས། དཔེར་ན། ཞིང་འབྲོག་རྣམས་འདོད་མོས་མེད་བཞིན་དུ་བཙན་དབང་ཐོག་གཞིས་སྤོས་བྱེད་བཅུག་པ་དང་། དེར་གཞིགས་པའི་གུན་གསབ་སྤྲོད་ཕྱོགས་ལའང་སྲིད་བྱུས་གཞིར་བཟུང་ལག་བསྟར་དོན་འཁྱོལ་བྱས་མེད་སྟབས། ཁོང་ཚོས་སྒོ་ཕྱུགས་གསོ་སྐྱོང་བྱེད་རྒྱུར་རང་བཞིན་གྱིས་དཀའ་ངལ་འཕྲད་ཀྱི་ཡོད།
ཕྱོགས་མཚུངས་བོད་ནང་གི་ས་ཕྱོགས་གང་དུ་འགྲོ་རྒྱུར་དམ་བསྒྲགས་བྱེད་ཤུགས་ཆེ་རུ་བཏང་ཡོད་པ་མ་ཟད། ལྷག་པར་ཕྱི་རྒྱལ་གྱི་ཡུལ་སྐོར་སྤྲོ་འཆམ་པ་དང་གསར་འགོད་པའི་འགྲོ་སྐྱོད་རང་དབང་ལ་མུ་མཐུད་ནས་དམ་བསྒྲགས་བྱེད་བཞིན་ཡོད། ཡང་བོད་མི་ཆོས་དང་རིག་གཞུང་། དཔལ་འབྱོར་སོགས་ཀྱི་སྐོར་ཕྲན་བུ་ལྟ་ཕྱོགས་མི་མཐུན་པའི་བསམ་ཚུལ་ཤོད་མཁན་ཚོར་ཁ་བྲལ་རིང་ལུགས་པ་རེད་ཅེས་སྡང་ཟུག་བྱེད་ཀྱི་ཡོད། གང་ལྟར་བོད་མི་ཙམ་མ་ཟད། རྒྱ་ནག་མི་དམངས་ལ་ཡང་སོ་སོའི་འགོ་ཁྲིད་འདེམས་རྒྱུའི་རང་དབང་མེད།
མདོར་ན། རྒྱ་ནག་ནང་དཔལ་འབྱོར་གྱི་གནས་སྟངས་ཤུགས་ཆེ་ཡར་རྒྱས་འགྲོ་བཞིན་ཡོད་ནའང། མིའི་ཆོས་དད་དང་སྨྲ་བརྗོད་རང་དབང་། དེ་བཞིན་ཚོགས་པ་འཛུགས་ཕྱོགས་སོགས་ཀྱི་ཐོག་ལ་རང་དབང་ཏིལ་འབྲུ་ཙམ་ཡང་མེད་པའི་སྲིད་བྱུས་མུ་མཐུད་ནས་བཟུང་དང་འཛིན་བཞིན་ཡོད་སྐོར་འཁོད་འདུག་པ་བཅས། །
