༢༠༡༣ ཟླ་ ༢ ཚེས་ ༢༢ རེས་གཟའ་པ་སངས།
༄༅། །འདི་གར་ཕྱི་ལོ་ ༢༠༡༣ ཟླ་ ༢ ཚེས་ ༢༢ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། སྔ་ལོར་དུས་འཁོར་དབང་ཆེན་གྲུབ་རྗེས་བོད་ནས་ཆོས་ཞུར་བཅར་མཁན་བོད་མི་ཡོངས་ལ་རྒྱ་ནག་གཞུང་ནས་སློབ་གསོའི་ལས་འགུལ་སྤེལ་ཡོད་པ་མ་ཟད། དད་ལྡན་མང་ཚོགས་རྣམས་ལ་བསུན་གཙེར་ཤུགས་ཆེ་བཟོས་ཏེ་ལུགས་མཐུན་ལག་འཁྱེར་ཞུས་ཏེ་རང་ཉིད་ཀྱི་ཕ་ཡུལ་དུ་ལོག་སྐབས་ལམ་བར་བསྔོག་བཤེར་དང་རྡུང་རྡེག བཀག་ཉར་བཙོན་འཇུག་སོགས་བྱས་པ་མ་ཟད། ཁག་གཅིག་ལ་དུས་བཀག་བཙོན་འཇུག་བཟོས་པའི་གནས་ཚུལ་ཡང་ཐོན་ཡོད། དུས་འཁོར་དབང་ཆེན་ཞུ་བར་བཅར་མཁན་སོགས་ལ་སྔ་ལོའི་ལོ་འགོ་ནས་བཟུང་ད་བར་ཆབ་སྲིད་ཐོག་ནས་དམིགས་བསལ་སྡང་ཟུག་འཛིན་ཏེ་གང་ལྟར་ལྟ་རྟོག་དང་དམ་བསྒྲགས་ནན་པོ་བྱེད་ཀྱི་ཡོད་འདུག
ལྷག་པར་ཏང་ཡོན་དང་ལས་བྱེད་པར་ཁྲིམས་ཀྱི་ཐོག་ནས་ཉེས་པ་གཏོང་རྒྱུའི་གཏན་འབེབས་བྱས་ཏེ་ཆབ་སྲིད་ཀྱི་སློབ་གསོའི་ལས་འགུལ་མུ་མཐུད་སྤེལ་བཞིན་པའི་གནས་ཚུལ་ད་དུང་འཐོན་བཞིན་ཡོད་འདུག གནས་ཚུལ་དེ་དང་དུས་མཚུངས་སུ་བོད་རང་སྐྱོང་ལྗོངས་ཏང་ཨུད་གཞུང་ལས་ཐིང་ནས་བོད་རང་སྐྱོང་ལྗོངས་ཁུལ་དུ་ཕྱི་བསྐྱོད་ལག་འཁྱེར་ཞུ་ཕྱོགས་དང་། དེའི་ཐད་ལས་དོན་བྱ་ཕྱོགས་ཀྱི་དམིགས་བསལ་སྲིད་བྱུས་ཟེར་བ་གསར་དུ་གཏན་འབེབས་བྱས་ཏེ་བོད་མི་ཚོར་གནས་མཇལ་དང་གཉེན་འཕྲད་སོགས་སྤྱིར་བཏང་གི་ཕྱི་བསྐྱོད་ལག་འཁྱེར་ཐོབ་རྒྱུར་ས་གནས་རིམ་པ་མང་པོ་ཞིག་བརྒྱུད་དགོས་པའི་སྒྲིག་གཞི་གསར་པ་བཟོས་པར་བརྟེན། བོད་མི་ཚོར་སྔ་ལོའི་ལོ་འགོ་ནས་བཟུང་ཕྱི་བསྐྱོད་ལག་འཁྱེར་སྤྲོད་རྒྱུར་རྦད་དེ་དོ་དམ་དུ་བཏང་ཡོད།
གནས་ཚུལ་དེ་དག་ཐད་ང་ཚོར་ཁུངས་ལྡན་གནས་ཚུལ་སྔ་རྗེས་མུ་མཐུད་འབྱོར་བ་དང་། ཨེ་ཤི་ཡ་རང་དབང་རླུང་འཕྲིན་ཁང་ནས་གནས་ཚུལ་སྤེལ་བ་སོགས་ལ་གཞིགས་ན། ད་ལྟའི་བོད་རང་སྐྱོང་ལྗོངས་ཟེར་བའི་ཁོངས་གཏོགས་སུ་ཀྲུང་གུང་བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་དང་ལྗོངས་ཞིབ་དཔྱོད་ཐིང་ཟེར་བས་གུང་ཁྲན་ཏང་མི་དང་གཞུང་གི་ལས་བྱེད་པ་ཕྱི་རྒྱལ་དུ་བསྐྱོད་ནས་ཏཱ་ལའི་རུ་ཚོགས་ཀྱི་གསུང་ཆོས་སོགས་ཁ་བྲལ་གྱི་ལས་འགུལ་ནང་ཞུགས་མཁན་ཡོངས་ལ་ཉེས་ཆད་གཅོད་རྒྱུའི་ཡིག་ཆ་ཟེར་བ་ཞིག་ལོ་སྔོན་མར་གཏན་འབེབས་བྱས་ཡོད་འདུག་པ་མ་ཟད། ཡིག་ཆ་དེའི་ཐད་ལས་ཁུངས་ཁག་གི་ནང་ད་དུང་ཡང་སློབ་སྦྱོང་བྱེད་དགོས་ཀྱི་ཡོད་འདུག་ཅིང་། ཡིག་ཆ་དེར་ཁྱོན་དོན་ཚན་བཅུ་ཙམ་ཡོད་འདུག་པའི་ནང་དོན་རགས་བསྡུས་གཤམ་གསལ་ལྟར་ཡིན་འདུག
དང་པོ། གུང་ཁྲན་ཏང་མི་དང་གཞུང་གི་ལས་བྱེད་པས་ཕྱིར་བསྐྱོད་བྱས་ནས་ཏཱ་ལའི་རུ་ཚོགས་ཀྱི་གསུང་ཆོས་སྨོན་ལམ་དང་ཁ་བྲལ་ལས་འགུལ་ནང་ཞུགས་པ་དེ་ནི་མེས་རྒྱལ་ཁ་བྲལ་གཏོང་རྒྱུ་དང་། མི་རིགས་མཐུན་སྒྲིལ་ལ་གཏོར་བཤིག་གཏོང་བའི་ཚབས་ཆེའི་ཆབ་སྲིད་ཀྱི་སྒྲིག་ཁྲིམས་དང་འགལ་བའི་བྱ་སྤྱོད་ནང་ཞུགས་པ་ཞིག་ཡིན་པས་ལས་འགུལ་འདིའི་ནང་འཛུལ་ཞུགས་བྱེད་མི་ཆོག
གཉིས་པ། གཏན་འབེབས་འདི་གུང་ཁྲན་ཏང་མི་དང་། ལས་བྱེད་པ། ལས་བྱེད་པའི་དོ་དམ་གཞིར་བཟུང་རྒྱལ་ཁབ་ཀྱི་ལས་མི་དང་རྒྱལ་ཁབ་ཀྱི་འཛིན་སྐྱོང་སྡེ་ཚན་ཁག་ནང་ཡོད་པའི་ལས་མིར་ཁྱབ་པ་ཡིན།
གསུམ་པ། གོང་གསལ་གསུང་ཆོས་ནང་འཛུལ་ཞུགས་བྱེད་མཁན་གུང་ཁྲན་ཏང་མི་རྣམས་ཇུས་འགོད་བྱེད་མཁན་དང་། སྒྲིག་འཛུགས་བྱེད་མཁན། གཙོ་བོའི་མི་སྣ་བཅས་ཡིན་པས་ཉེས་པ་ལ་གཞིགས་པའི་ཉེས་ཆད་གཏོང་རྒྱུ། གནས་ཚུལ་ངོ་མ་ཤེས་རྟོགས་མེད་པར་བཙན་ཁྲིད་དང་། བསླུ་བྲིད་བྱས་པ་རྣམས་ལ་སློབ་གསོ་བརྒྱབ་ནས་རང་སྐྱོན་ངོས་ལེན་བྱེད་མཁན་ལ་ཉེས་ཡངས་དང་ཉེས་ཆད་གཏོང་རྒྱུ་མིན།
བཞི་པ། གོང་གསལ་སྨོན་ལམ་ནང་འཛུལ་ཞུགས་བྱེད་མཁན་ལས་བྱེད་ཇུས་འགོད་བྱེད་མཁན་དང་། སྒྲིག་འཛུགས་བྱེད་མཁན། གཙོ་བོའི་མི་སྣ་བཅས་ཡིན་པས་ཉེས་པ་ལ་གཞིགས་པའི་ཉེས་ཆད་གཏོང་རྒྱུ། ལས་བྱེད་རྒས་ཡོལ་རྣམས་ཉེས་པ་ལ་གཞིགས་ཏེ་རྒས་ཕོགས་སོགས་ཐོབ་ཐང་གཅོག་འཕྲི་བྱ་རྒྱུ།
ལྔ་པ། གཞུང་གི་ལས་བྱེད་པ་ཕུད། དེ་མིན་ལས་ཁུངས་ཁག་ནང་གི་ལས་མི་དང་། ལས་བྱེད་པའི་དོ་དམ་སྒྲིག་གཞིའི་འོག་མེད་པའི་ལས་དོན་སྡེ་ཚན་གྱི་ལས་མི་དང་། བོད་དུ་ཡོད་པའི་དབུས་གཞུང་གི་ཐད་གཏོགས་ལས་ཁུངས་དང་། ལས་དོན་སྡེ་ཚན། དེ་བཞིན་རྒྱལ་གཉེར་དང་རྒྱལ་གཉེར་གྱི་དོ་དམ་འོག་ཡོད་པའི་ཁེ་ལས་སྡེ་ཚན་གྱི་ལས་མི་རྣམས་ལ་གོང་གསལ་གཏན་འབེབས་འདི་བེད་སྤྱོད་བྱེད་ཆོག
དྲུག་པ། གཏན་འབེབས་འདིའི་ནང་གསལ་ཁ་བྲལ་གྱི་ལས་འགུལ་ཞེས་པ་ཏཱ་ལའི་རུ་ཚོགས་ཀྱིས་མེས་རྒྱལ་ཁ་བྲལ་དང་། མི་རིགས་མཐུན་སྒྲིལ་གཏོར་བཤིག་གཏོང་བའི་དམིགས་ཡུལ་བཟུང་སྟེ་ཕྱི་རྒྱལ་ལ་སྤེལ་བའི་དུས་འཁོར་དབང་ཆེན་ཁྱབ་ཁོངས་ཀྱི་ལས་འགུལ་མཐའ་དག་ལ་ཁྱབ་པ་ཡིན།
བདུན་པ། གཏན་འབེབས་འདིའི་ནང་གསལ་ཉེས་པ་ཆུང་བ་ཞེས་པ་སློབ་གསོ་བྱས་པ་བརྒྱུད་ནོར་འཁྲུལ་ལ་ངོས་ལེན་དང་། བསྒྱུར་བཅོས་གཏོང་འདོད་ཡོད་མཁན་ལ་གོ་དགོས་པ་དང་། ཉེས་པ་ཆེ་བ་ཟེར་བ་ནི། ནོར་འཁྲུལ་ལ་ངོས་ལེན་གསལ་པོ་མེད་པ། སློབ་གསོ་བྱས་རྗེས་བསྒྱུར་བཅོས་གཏོང་རྒྱུའི་རྣམ་པ་གསལ་པོ་མེད་མཁན། ཚབས་ཆེའི་ཉེས་པ་ཟེར་བ་ནི། རྣམ་འགྱུར་ངན་པ་དང་། སློབ་གསོ་བརྒྱབ་ཀྱང་ཉན་འཇོག་མེད་མཁན་རིགས།
བརྒྱད་པ། གོང་གསལ་སྨོན་ལམ་ནང་ཞུགས་རྗེས་རང་སྐྱོན་ངོས་ལེན་དང་། གཞན་སྐྱོན་ཐེར་འདོན་བྱེད་མཁན་ལ་ཉེས་ཡངས་དང་། བྱ་དགའ་སྤྲོད་རྒྱུ།
དགུ་པ། གཏན་འབེབས་འདི་བཞིན་ཀྲུང་གུང་བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་དང་། བོད་རང་སྐྱོང་ལྗོངས་ཞིབ་དཔྱོད་ཐིང་ནས་འགན་འཁུར་གྱིས་འགྲེལ་བརྗོད་བྱ་རྒྱུ།
བཅུ་པ། གཏན་འབེབས་གསལ་བསྒྲགས་བྱེད་ཉིན་ནས་ལག་བསྟར་བྱ་རྒྱུ་ཡིན། གཏོང་ཡུལ་ཀྲུང་དབྱང་སྒྲིག་བཤེར་དང་ཞིབ་དཔྱོད་ཐིང་། རང་སྐྱོང་ལྗོངས་ཏང་ཨུད་དང་མི་དམངས་སྲིད་གཞུང་། ས་གནས་ཁག་གི་འབྲེལ་ཡོད་ལས་ཁུངས་སོགས། ཀྲུང་གུང་བོད་རང་སྐྱོང་ལྗོངས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གཞུང་ལས་ཐིང་ནས། ཕྱི་ལོ་ ༢༠༡༢ ཟླ་ ༤ ཚེས་ ༢༤ ཉིན།།
