༢༠༡༣ ཟླ་ ༢ ཚེས་ ༢༡ རེས་གཟའ་ཕུ་བུར།
༄༅། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཕྱི་ལོ་ ༢༠༡༣ ཟླ་ ༢ ཚེས་ ༢༠ ཉིན་ཆོས་རིག་ལས་ཁུངས་ནས་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་སྲིད་སྐྱོང་སྐུ་
ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་མཆོད་འབུལ་སྨོན་ལམ་དང་འབྲེལ་བའི་གསུང་བཤད་གནང་དོན། རྣམ་རྒྱལ་གྲྭ་ཚང་གི་མཁན་རིན་པོ་མཆོག་གིས་དབུས་དགེ་འདུན་རྣམ་པ་དང་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ། མི་དམངས་རྣམ་པ་ཚང་མས་ཤེས་གསལ་ལྟར།
དེ་རིང་འདི་གར་ཉིན་བརྒྱ་དུས་གཅིག་གི་སྨོན་ལམ་ཚོགས་པ་བཞིན་འཛམ་གླིང་འདིའི་སྟེང་བོད་མི་གནས་ཡུལ་ས་ཆ་ཡོངས་རྫོགས་ནང་ཉིན་བརྒྱ་དུས་གཅིག་ལ་མཆོད་འབུལ་སྨོན་ལམ་ཚོགས་དགོས་པའི་རྒྱུ་མཚན་གཙོ་བོ་ནི། རྒྱ་ནག་གཞུང་ནས་བོད་རྒྱལ་ཁབ་བཙན་བཟུང་བྱས་ཏེ་བོད་མི་ས་ཡ་གཅིག་ལྷག་ཙམ་གྱི་ཚེ་སྲོག་བཅོམ་ཡོད། གནས་སྟངས་དེ་ལྟ་བུའི་སྐབས་གཞིས་བཞུགས་བོད་མི་སེར་སྐྱ་ཕོ་མོ་རྒན་གཞོན་བར་གསུམ་གྱིས་བོད་བསྟན་སྲིད་མི་རིགས་དང་རང་དབང་ཆེད་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་ཞི་རྒོལ་སླད་ཕྱི་ ༢༠༠༩ ལོ་ནས་ད་བར་རང་ལུས་མེར་སྲེག་གཏོང་མཁན་གྲངས ༡༠༤ བྱུང་ཡོད།
རྒྱ་གར་དང་བལ་ཡུལ་ནང་དུའང་གནས་ཚུལ་དེ་མཚུངས་བྱུང་ཡོད། གང་ལྟར་ཁོང་རྣམ་པའི་འབོད་སྒྲ་ནི་བོད་ལ་རང་དབང་དགོས་པ་དང་། ༸གོང་ས་མཆོག་བོད་དུ་གདན་འདྲེན་ཞུ་དགོས་ཞེས་མགྲིན་དབྱངས་གཅིག་གྱུར་ལམ་ནས་བསྒྲགས་ཡོད། འོན་ཀྱང་རྒྱ་གཞུང་གིས་རང་ལུས་མེར་སྲེག་གི་གནད་དོན་ལ་འགན་འཁྲི་རྩ་བ་ནས་མ་ཁྱེར་བ་མ་ཟད། དེ་ལས་ལྡོག་སྟེ་བོད་མིའི་རང་ལུས་མེར་སྲེག་གི་གནས་ཚུལ་ཁག་གཞི་རྩ་གང་ཡང་མེད་པའི་སྒོ་ནས་༸གོང་ས་མཆོག་དང་བོད་མིའི་སྒྲིག་འཛུགས་ཀྱིས་བརྒྱུད་སྐུལ་བྱས་པའི་འཁྱོག་བཤད་བྱེད་ཀྱི་འདུག
བོད་མིའི་སྒྲིག་འཛུགས་ཀྱི་ལས་དོན་རྣམས་ཕྱི་གསལ་ནང་གསལ་ཡིན་སྟབས། མ་འོངས་པར་རྒྱ་གཞུང་གི་ལས་བྱེད་ཚོ་རྡ་སར་ཞིབ་འཇུག་ཆེད་ཡོང་ན་ང་ཚོའི་ངོས་ནས་མཐུན་འགྱུར་གང་ཞིག་ཡིན་ཡང་བསྐྲུན་རྒྱུ་ཡིན། ཞེས་དེ་སྔ་བརྗོད་པ་ལྟར་དེ་རིང་བཀའ་ཤག་གིས་བསྐྱར་དུ་ནན་བརྗོད་བྱ་རྒྱུ་ཡིན། རྒྱ་གཞུང་ནས་བོད་ནང་གི་དངོས་ཡོད་གནས་སྟངས་གང་ཡིན་ངོས་ལེན་ཐོག རྒྱལ་སྤྱིའི་གསར་འགོད་པ་དང་གནད་ཡོད་མི་སྣ། གཞུང་དང་གཞུང་འབྲེལ་མིན་པའི་རྟོག་ཞིབ་ཚོགས་པ་སོགས་བོད་ནང་གི་དངོས་ཡོད་གནས་ཚུལ་གང་ཡིན་རྟོག་ཞིབ་ཆེད་འགྲོ་བསྐྱོད་ཆོག་པ་ཞིག་རྒྱ་ནག་གཞུང་ནས་བཟོ་དགོས།
དེ་བཞིན་རྒྱལ་ཁབ་ཁག་གི་གྲོས་ཚོགས་དང་མཉམ་འབྲེལ་རྒྱལ་ཚོགས་ཀྱིས་གཙོས་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་མང་དག་ཅིག་གིས་དུས་ད་ལྟ་བར་དུ་བོད་ཀྱི་བདེན་དོན་ལ་རྒྱབ་སྐྱོར་གནང་བར་རྗེས་སུ་ཡི་རང་ཞུ་རྒྱུ་དང་ཆབས་ཅིག་སླར་ཡང་འབོད་སྐུལ་ཞུ་རྒྱུར། བོད་དོན་བདེན་མཐའ་མ་གསལ་བར་དུ་མུ་མཐུད་བོད་དོན་ལ་རྒྱབ་སྐྱོར་གནང་རོགས་ཞུ་རྒྱུ་ཡིན།
ང་ཚོ་རང་དབང་རྒྱལ་ཁབ་ནང་གནས་སྡོད་བོད་ཆོལ་ཁ་གསུམ་གྱི་མི་དམངས་རྣམས་ནས་༸གོང་ས་མཆོག་གི་ལམ་སྟོན་འོག་སྔར་ལས་མཐུན་སྒྲིལ་རྡོག་རྩ་གཅིག་ཏུ་བསྒྲིལ་ཏེ་འཐབ་རྩོད་ཀྱི་ལས་འགུལ་ཤུགས་ཆེ་རུ་གཏོང་དགོས་པའི་གནས་སྟངས་ཤིག་ཆགས་ཡོད། མཐའ་དོན་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་པ་དང་བོད་དོན་བདེན་མཐའ་མྱུར་དུ་གསལ་བའི་སྨོན་ལམ་དང་རེ་འདུན་ཞུ་རྒྱུ་ཡིན། ཞེས་གསུང་བཤད་གནང་ཡོད། །
