༢༠༡༣ ཟླ་ ༢ ཚེས་ ༧ རེས་གཟའ་ཕུར་བུ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༢ ཚེས་ ༦ ཉིན་ནས་འགོ་འཛུགས་ཀྱིས་ཁྱོན་ཉིན་གྲངས་ ༦ རིང་ནོར་ཝེའི་རྒྱལ་སར་འཚོགས་བཞིན་པའི་འགྲོ་བ་མིའི་ཐོབ་ཐང་དང་འབྲེལ་བའི་རྒྱལ་སྤྱིའི་གློག་བརྙན་དུས་སྟོན་ཐེངས་ལྔ་པར་བོད་ཀྱི་དངོས་བྱུང་གློག་བརྙན་སྟོན་གཏན་འཁེལ་འདུག
དུས་སྟོན་དེའི་སྐབས་སུ་འཛམ་གླིང་འདིའི་ཐོག་མི་རིགས་དབྱེ་འབྱེད་ཀྱི་ལྟ་ཚུལ་དང་སྨྲ་བརྗོད་རང་དབང་། མང་ཚོགས་ཀྱི་ངོ་རྒོལ་ལས་འགུལ། དྲང་བདེན་མེད་པའི་དཔལ་འབྱོར་གྱི་སྲིད་བྱུས་སོགས་ལ་མཁས་པའི་གཏམ་བཤད་དང་བགྲོ་གླེང་གནང་རྒྱུ་ཡིན་འདུག དེ་བཞིན་དུས་སྟོན་དེའི་ཐོག་སྟོན་རྒྱུའི་གློག་བརྙན་གསུམ་པོ་ནི། དོན་གྲུབ་དབང་ཆེན་ལགས་ཀྱིས་བཟོ་སྐྲུན་གནང་བའི་འཇིགས་བྲལ་ཞེས་པ་དང་། བསྟན་འཛིན་བསོད་ནམས་ལགས་དང་ཁོང་གི་བཟའ་ཟླས་བཟོ་སྐྲུན་གནང་བའི་སྤྲིན་པའི་རྒྱབ་ཀྱི་ཉི་མ། ངག་དབང་ཆོས་འཕེལ་ལགས་ཀྱིས་བཟོ་སྐྲུན་གནང་བའི་དབྱངས་ལ་ཐིམ་པའི་བོད་ཅེས་པ་རྣམས་སྟོན་རྒྱུ་ཡིན་འདུག
དུས་སྟོན་གོ་སྒྲིག་གནང་མཁན་ནོར་ཝེའི་འགྲོ་བ་མིའི་ཐོབ་ཐང་ཁང་པ་ཞེས་པའི་འབྲེལ་ཡོད་མི་སྣས་གསུང་གསལ་ལྟར་ན། ཕྱི་ཚེས་ ༧ ཉིན་གློག་བརྙན་དུས་སྟོན་ཐོག་མཉམ་ཞུགས་གནང་མཁན་ཚོས་གློག་བརྙན་དང་འབྲེལ་བའི་བོད་ནང་གི་ད་ལྟའི་གནས་སྟངས་སྐོར་ལ་བགྲོ་གླེང་གནང་རྒྱུ་མ་ཟད། བོད་ནང་གི་བོད་མི་ཚོས་རྒྱ་ནག་གཞུང་གིས་དབང་བསྒྱུར་ལ་ཞི་རྒོལ་ཆེད་རང་ལུས་མེར་སྲེག་བཏང་དང་གཏོང་མུས་ཡིན་པའི་གནད་དོན་དང་བོད་མིའི་ཐོབ་ཐང་། བོད་མི་ནི་རིག་གཞུང་རྩ་མེད་བཟོ་བའི་སྲིད་བྱུས་ཀྱི་གནོད་འཚེ་ཕོག་ཡུལ་ཞེས་པའི་བརྗོད་གཞིའི་ཐོག་བགྲོ་གླེང་དང་། རྒྱལ་སྤྱིའི་སྤྱི་ཚོགས་ནས་བོད་ནང་གི་ཞི་བའི་ལས་འགུལ་ཐོག་སྔར་ལྷག་རྒྱབ་སྐྱོར་ཐོབ་ཆེད་ཐབས་ལམ་གང་འདྲ་ཞིག་བརྒྱུད་ནས་འབད་བརྩོན་བྱེད་དགོས་པ་སོགས་ཀྱི་གནད་དོན་ཁག་གཅིག་ཐོག་བགྲོ་གླེང་གནང་རྒྱུ་ཡིན་འདུག
དེ་བཞིན་ལས་རིམ་དེའི་ཐོག་ཡུ་རོབ་ཁུལ་གྱི་བོད་མི་མང་སྤྱི་འཐུས་ཆུང་བདག་ཀོ་རེན་ལགས་ལྷན་ཞུགས་ཀྱིས་བོད་ནང་བོད་མིའི་རང་ལུས་མེར་སྲེག་གི་གནད་དོན་ཐོག་ལ་གསུང་བཤད་གནང་རྒྱུ་ཡིན་འདུག་པ་བཅས། །
