༢༠༡༣ ཟླ་ ༢ ཚེས་ ༡༨ རེས་གཟའ་ཟླ་བ།

༄༅། །ཕྱི་ལོ་ ༢༠༡༣ ཟླ་ ༣ ཚེས་ ༡༧ ཉིན་གྱི་སྔ་དྲོ་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ཛུ་རིཁ་གནམ་ཐང་དུ་ཕེབས་འབྱོར་སྐབས་སུད་སི་བུད་མེད་ལྷན་ཚོགས་ཀྱི་ཚོགས་མི་རྣམས་དང། བོད་རིགས་ཚོགས་པ་གཉིས་ཀྱི་ཚོགས་གཙོ་གང་གཞོན་ཚང་བློ་བཟང་ལགས་དང། མིག་དམར་རེ་ཐི་ལགས། དེ་བཞིན་སུད་བོད་མཛའ་འབྲེལ་ཚོགས་པའི་ཚོགས་གཙོ་དང་སྤྱི་ཟུར་གང་གཞོན་ཚང་ངག་དབང་ལགས་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་ཕྱི་དྲིལ་བཀའ་བློན་མཆོག་གིས་སུད་སིའི་གྲོང་འཁྱེར་(Utser) དུ་སུད་སི་བུད་མེད་ལྷན་ཚོགས་ཀྱི་ལོ་འཁོར་ཚོགས་ཆེན་གྱི་དབུ་འབྱེད་མཛད་སྒོར་གསུང་བཤད་གནང་དོན། བོད་ནང་གཞན་ལ་གནོད་འཚེ་མ་བྱས་པར་རང་ལུས་མེར་སྲེག་གི་བརྒྱུད་ནས་ཞི་རྒོལ་བྱེད་བཞིན་ཡོད། ཕྱི་ལོ་ ༢༠༠༩ ལོའི་ཕྱི་ཟླ་ ༢ པ་ནས་བཟུང་བོད་ནང་རྒྱལ་གཅེས་པ་ཁྱོན་མི་གྲངས་ ༡༠༡ ཀྱིས་རང་ལུས་མེར་སྲེག་བཏང་ཡོད། དེ་རིང་སྤྱི་ཚོགས་དྲ་རྒྱའི་སྟེང་གནས་ཚུལ་ཐོན་གསལ་ལྟར་ན་བླ་བྲང་དུ་སླར་ཡང་རང་ལུས་མེར་སྲེག་གི་དོན་རྐྱེན་བྱུང་འདུག རྒྱ་ནག་གཞུང་ནས་བོད་མི་རིགས་ལ་གཉའ་གནོན་དང་བཤུ་གཞོག་དཔལ་འབྱོར་དབྱེ་འབྱེད། ཁོར་ཡུག་གཏོར་བཤིག དེ་བཞིན་བོད་མིའི་འགྲོ་སྡོད་སྤྱོད་གསུམ་གྱི་རང་དབང་བཙན་འཕྲོག་གིས་བོད་མིར་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་དང་བྱེད་མུས་ལ་བརྟེན། བོད་མི་རྣམས་བཟོད་ཐབས་བྲལ་ཏེ་རང་ལུས་མེར་སྲེག་གཏོང་དགོས་པའི་གནས་སྟངས་ཆགས་ཡོད། སྲིད་སྐྱོང་བློ་བཟང་སེང་གེ་མཆོག་གིས་གཞིས་བཞུགས་བོད་མི་རྣམས་ལ་རང་ལུས་མེར་སྲེག་ལྟ་བུ་ཚབས་ཆེ་བའི་ལས་འགུལ་རིགས་མ་སྤེལ་རོགས་ཞེས་འབོད་སྐུལ་རབ་དང་རིམ་པ་གནང་བཞིན་ཡོད། ཅེས་དང།
དེ་བཞིན་ཁོང་གིས་བོད་མི་རྣམས་ནས་རྒྱ་མི་རིགས་དང་མཉམ་འབྲེལ་བ་དམ་ཟབ་བྱེད་རྒྱུ་གལ་ཆེན་པོ་ཡིན་སྐོར་གསུངས་ཡོད། དེ་བཞིན་ཁོང་གིས་ཕྱི་རྒྱལ་དུ་གནས་སྡོད་བོད་རིགས་ཕ་མ་རྣམས་ནས་སོ་སོའི་བུ་ཕྲུག་མཉམ་བོད་སྐད་ཐོག་སྐད་ཆ་ཤོད་རྒྱུ་གལ་ཆེན་པོ་ཡིན་པ་དང། འདི་ནི་ང་ཚོས་སོ་སོའི་རིག་གཞུང་དང་སྐད་ཡིག་སྲུང་སྐྱོབ་བྱེད་རྒྱུའི་ཐབས་ལམ་གཅིག་ཡིན། ཞེས་སོགས་ཀྱི་གསུང་བཤད་གནང་ཡོད། ཕྱི་ཚེས་ ༡༩ ཉིན་བཀའ་བློ་མཆོག་འཇི་ནི་ཝར་འགྲོ་བ་མིའི་ཐོབ་ཐང་དང་མང་གཙོའི་ལྷན་ཚོགས་Geneva Summit ཐོག་གསུང་བཤད་གནང་རྒྱུ་ཡིན་འདུག