༄༅། །ཕྱི་ལོ་ ༢༠༠༨ ལོར་བོད་ནང་ས་བྱི་ཞི་རྒོལ་ཆེན་པོའི་ཛ་དྲག་གནས་སྟངས་བྱུང་སྐབས་བཙན་བྱོལ་དུ་ངོ་བཞུགས་དཔལྡན་བཀའ་ཟུར་རྣམ་པས་བོད་སྤྱིའི་རྩ་དོན་ལ་སྨིན་པའི་དགོངས་ཚུལ་ཕྱོགས་བསྡུས་ཚོགས་འཛོམས་ཀྱིས་འགྲོ་གྲོན་གཏོང་དམིགས་ཞལ་འདེབས་བསྡུ་རུབ་གནང་ཁོངས་ནས་སྐབས་དེའི་འགྲོ་གྲོན་བཏང་འཕྲོས་དངུལ་ལྷག་ཧིན་སྒོར་བཞི་འབུམ་ཉི་ཁྲི་བརྒྱད་སྟོང་བརྒྱད་བརྒྱ་བདུན་ཅུ་ ༤༢༨༨༧༠།༠༠ ཡོད་པ་བེད་གཏོང་གནང་ཕྱོགས་བཀའ་བསྡུར་གནང་བར་བོད་བསྟན་སྲིད་དང་མི་རིགས་རང་དབང་གི་དོན་དུ་སྐུ་ལུས་མེ་མཆོད་ཕུལ་བས་གཙོས་ལུས་སྲོག་ལོངས་སྤྱོད་བློས་གཏོང་གནང་མཁན་རྒྱལ་གཅེས་སེར་སྐྱ་ཕོ་མོ་རྒན་བྱིས་རྣམས་ལ་གདུང་སེམས་མཉམ་བསྐྱེད་དང༌། དམིགས་བསལ་མཆོད་འབུལ་ཆེད་གོང་གསལ་དངུལ་འབབ་འདི་ག་ཆོས་རིག་ལས་ཁུངས་སུ་ཞལ་འདེབས་འབུལ་རྒྱུར་ཐུགས་མཐུན་བྱུང་བ་བཞིན་ད་ལམ་དཔལྡན་བཀའ་ཟུར་རྣམ་པའི་སྐུ་ཚབ་དཔལྡན་བཀའ་ཟུར་བློ་བཟང་དར་རྒྱས་མཆོག་དང་བཀའ་ཟུར་རིན་ཆེན་མཁའ་འགྲོ་མཆོག་རྣམ་གཉིས་ཕྱི་ལོ་ ༢༠༡༢ ཟླ་ ༡༢ ཚེས་ ༢༦ ཉིན་དཔལྡན་ཆོས་རིག་བཀའ་བློན་པདྨ་ཆོས་འབྱོར་སར་ངོ་བཅར་གྱིས་ཞལ་འདེབས་གནང་འབྱོར་བྱུང་བར་ཡི་རངས་བསྔགས་བརྗོད་ཞུ་བ་དང་སྦྲགས་དངུལ་འབབ་འདི་བཞིན་ཆོས་ཕྱོགས་ཐོག་མིག་སྨན་མིག་ཐོག་ཕན་པ་འགྲོ་གྲོན་ངེས་གཏོང་ཆོག་པ། དཔལྡན་བཀའ་ཟུར་རྣམ་པ་ནི་བོད་ཀྱི་གནས་སྟངས་ཛ་དྲག་ཉག་ཕྲའི་སྐབས་བོད་བསྟན་སྲིད་དང་མི་རིགས་ཀྱི་དོན་དུ་ངལ་བ་ཁྱད་བསད་ཀྱིས་ཞབས་འདེགས་གནད་སྨིན་བསྒྲུབས་མཁན་མཛད་རྗེས་ཅན་ཤ་སྟག་ཡིན།
དེ་དང་ཆབས་ཅིག་བོད་ནང་ད་ལྟའི་ཛ་དྲག་གནས་སྟངས་ཡོད་མུས་ལ་གཞིགས་པས་འདི་ག་ཆོས་རིག་ལས་ཁུངས་ནས་ལྷ་བླའི་བཀའ་ལུང་བཞིན་ལོ་ལྟར་མཆོད་འབུལ་སྨོན་ལམ་དང༌། བསྟན་སྲིད་ཞབས་རིམ་གང་མང་བསྒྲུབས་དང་བསྒྲུབ་མུས་ལ་བརྟེན་རྒྱ་ཆེ་མང་ཚོགས་ནས་དེར་དམིགས་པའི་རང་རང་བློས་བཅད་ཞལ་འདེབས་འབུལ་འདུན་ཡོད་རིགས་ནས་ཁུངས་སོ་སོའི་ས་གནས་འགོ་འཛིན་དང་སྐུ་ཚབ་དོན་གཅོད་སོགས་བརྒྱུད་གཤམ་གསལ་ཁ་བྱང་ཐོག་འབྲེལ་ལམ་གནང་ཕྱོགས་ཡོང་བའི་དགེ་བསྐུལ་གསལ་བསྒྲགས་སུ། ཆོས་རིག་ལས་ཁུངས་ནས་ཕྱི་ལོ་ ༢༠༡༣ ཟླ་ ༡ ཚེས་ ༢ ལ།།