༢༠༡༣ ཟླ་ ༡ ཚེས་ ༢༡རེས་གཟའ་ཟླ་བ།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༣ ཟླ་ ༡ ཚེས་ ༡༩ དགོང་དྲོ་ཐེ་ཝན་བོད་ཀྱི་སྐུ་ཚབ་དོན་ཁང་གི་མཆོད་ཁང་ནང་སྐུ་ཚབ་དོན་གཅོད་ལས་ཁུངས་དང་། ཐེ་ཝན་དུ་གནས་སྡོད་བོད་རིགས་ཚོགས་པ་ཐུན་མོང་ནས་གོ་སྒྲིག་འོག་ཐེ་ཝན་དུ་གནས་སྡོད་བོད་མི་སེར་སྐྱ་མི་མང་ཁག་གཅིག་མཉམ་འཛོམས་གནང་སྟེ། ཕྱི་ལོ་ ༢༠༡༣ ཟླ་ ༡ ཚེས་ ༡༢ ཉིན་བོད་མདོ་སྨད་བསང་ཆུ་རྫོང་ཨ་མཆོག་སྐྱིད་སྡེ་བའི་རང་ལོ་ ༢༢ ལ་སོན་པའི་རྒྱལ་གཅེས་པ་ཚེ་རིང་བཀྲ་ཤིས་ལགས་དང་། དེ་བཞིན་ཟླ་ ༡ ཚེས་ ༡༧ ཉིན་བོད་མདོ་སྨད་རྔ་པ་རང་སྐྱོང་ཁུལ་དམར་ཐང་རྫོང་ངམ་ཁྱུང་མཆུ་རྫོང་དབལ་ཤུལ་ རྨེ་བའི་སྦྲ་ཆེན་ཞང་གྲོང་སྡེ་གཉིས་པའི་གཙོ་རུ་ཚང་གི་བུ་རང་ལོ་ ༢༨ ལ་སོན་པའི་རྒྱལ་གཅེས་པ་གྲུབ་མཆོག་ལགས་ཀྱིས་བོད་བསྟན་པ་ཆབ་སྲིད་དོན་དུ་རང་ལུས་མེར་སྲེག་བཏང་སྟེ། རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་གནང་ཡོད་པར་གདུང་སེམས་མཉམ་སྐྱེའི་མཚོན་ཆེད་མཆོད་འབུལ་སྨོན་ལམ་ཚོགས་ཡོད། སྨོན་ལམ་གྲུབ་མཚམས་བོད་རིགས་ཚོགས་པའི་ཚོགས་གཙོ་དགྲ་བཅོམ་པ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་དོན། རྒྱལ་གཅེས་པ་ཚོའི་ཆེད་དུ་སྨོན་ལམ་འདོན་རྒྱུ་སོགས་ང་ཚོ་ཕྱི་ལ་ཡོད་པའི་བོད་མི་ཚོའི་ལས་འགན་ཆགས་ཡོད། བོད་པའི་རྩ་དོན་གྱི་ལས་འགུལ་གང་རུང་ནང་བོད་མི་གང་མང་མཉམ་ཞུགས་ཡོང་བའི་རེ་བ་ཞུ་རྒྱུ་ཡིན་ཞེས་གསུངས། སྨོན་ལམ་གྲོལ་རྗེས་ཚོགས་བཞུགས་བོད་མི་རྣམས་ཀྱིས་འདི་ལོའི་གསུམ་བཅུའི་དུས་དྲན་སྲུང་བརྩི་ཞུ་ཕྱོགས་སྐོར་ལ་གྲོས་བསྡུར་དང་ལས་དོན་ཆ་བགོས་རོབ་ཙམ་གནང་བ་མ་ཟད། རེས་གཟའ་ཟླ་བ་ཉིན་ཐེ་ཝན་ནང་གི་གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་མཉམ་དུ་གོ་བསྡུར་གནང་རྒྱུ་ཡིན་འདུག་པ་བཅས། །
