༢༠༡༣ ཟླ་ ༡ ཚེས་ ༢༡ རེས་གཟའ་ཟླ་བ།
༄༅། །འདི་གར་བོད་མི་མང་སྤྱི་འཐུས་རྨོག་རུ་བསྟན་པ་ལགས་ཀྱིས་བཏང་གནས་ནང་འཁོད་དོན། བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་རྒྱ་གར་བྱང་ཕྱོགས་ཀྱི་ཞུ་གཏུག་ལས་འགུལ་བ་རྣམས་གནས་མཆོག་རྡོ་རྗེ་གདན་དུ་འབྱོར་ནས་ཕྱི་ལོ་ ༢༠༡༣ ཟླ་ ༡ ཚེས་ ༡༩ ཉིན་མངའ་སྡེའི་གྲོས་ཚོགས་འཐུས་མིར་མཇལ་འཕྲད་ཀྱིས་བོད་ནང་གི་ཛ་དྲག་གནས་བབ་ཞུ་གཏུག་དང་། ཕྱི་དྲོ་ཆུ་ཚོད་ ༣ པའི་ཐོག་མ་ཧཱ་ཡ་ན་མགྲོན་ཁང་དུ་གསར་འགོད་ལྷན་ཚོགས་སྐོང་ཚོགས་གནང་ཡོད། ཆུ་ཚོད་ ༥ ཐོག་རྣམ་རྒྱལ་གྲྭ་ཚང་དགོན་པ་ནས་མཆོད་རྟེན་ཆེན་མོ་བར་བྱང་ཆུབ་སེམས་མཆོག་སྐྱོར་བཞིན་མར་མེ་ཁྲོམ་སྐོར་དང་། བོད་དོན་དྲིལ་བསྒྲགས་ཀྱི་ཡིག་ཆ་འགྲེམས་སྤེལ་སོགས་གནང་ཡོད།
ཐེངས་འདིའི་མར་མེའི་ཁྲོམ་སྐོར་དུ་སེར་སྐྱ་བརྒྱ་ཕྲག་མང་པོ་མཉམ་ཞུགས་གནང་ཡོད་པ་དང་། མཆོད་རྟེན་ཆེན་མོར་བསྐོར་བ་ཐེངས་གསུམ་བརྒྱབ་རྗེས་རང་ལུས་མེར་སྲེག་གནང་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་བསྔོ་བ་སྨོན་ལམ་གསུང་འདོན་དང་། བདེན་ཚིག་སྨོན་ལམ། དེ་བཞིན་ བོད་རྒྱལ་ཁབ་ཆེན་པོའི་རྒྱལ་གླུའི་ཁྲོད་ནས་མར་མེ་ཁྲོམ་སྐོར་གྱི་ལས་འགུལ་མཇུག་སྒྲིལ་གནང་ཡོད་པ་བཅས། །
