༢༠༡༣ ཟླ་ ༡ ཚེས་ ༢༤ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་འོག་ཕྱི་ལོ་ ༢༠༡༣ ཟླ་ ༡ ཚེས་ ༢༣ ཉིན་ཆོས་རིག་ལས་ཁུངས་ནས་གོ་སྒྲིག་ཞུས་པའི་མཆོད་འབུལ་སྨོན་ལམ་དུ་སྲིད་སྐྱོང་བློ་བཟང་སེང་གེ་མཆོག་གིས་མཆོད་འབུལ་དང་འབྲེལ་བའི་གསུང་བཤད་གནང་དོན། བཀའ་ཟུར་ཀིརྟི་རིན་པོ་མཆོག་གིས་གཙོས་སྐྱབས་གནས་དགེ་འདུན་གྱི་སྡེ། མང་གཙོའི་ཀ་བ་གསུམ་གྱི་མཛད་སྒོ་རྣམ་པ། མི་མང་རྣམ་པ། སློབ་ཕྲུག་བཅས་ལ་བློ་ཕམ་པའི་གནས་ཚུལ་ཞུ་རྒྱུར། རང་ལོ་ ༢༨ ལ་སོན་པའི་གྲུབ་མཆོག་ལགས་དང་རང་ལོ་ ༢༦ ལ་སོན་པའི་དཀོན་མཆོག་སྐྱབས་ལགས་གཉིས་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག དམིགས་བསལ་བླ་བྲང་འབོ་ར་ཁུལ་ལ་ས་གནས་མི་མང་གིས་དཀོན་མཆོག་སྐྱབས་ཀྱི་སྐུ་ཕུང་རྩིས་སྤྲོད་དགོས་ཞེས་ངོ་རྒོལ་གྱི་རྣམཔ་སྟོན་པའི་ཐོག་ནས་ས་གནས་ཀྱི་གནས་སྟངས་ཛ་དྲག་ཆགས་ཡོད་པའི་གནས་ཚུལ་ཐོས་རྒྱུ་འདུག སྤྱི་ཡོངས་རྒྱལ་སྤྱིའི་གསར་འགྱུར་བརྒྱུད་ལམ་ཁག་དང་དམིགས་བསལ་རྒྱལ་སྤྱི་ནས་བོད་མིར་བདེན་པ་ཡོད་པའི་རྣམ་པ་ཤུགས་ཆེ་རུ་འགྲོ་གི་ཡོད་པ་ཧ་ཅང་གསལ་པོ་རེ། ཉེ་བའི་ཆར་ཡིན་རུང་(CNN)གིས་གཙོས་སྙན་གྲགས་ཆེ་བའི་གསར་འགྱུར་བརྒྱུད་ལམ་ཁག་ནང་བོད་ནང་གི་བོད་མི་རང་ལུས་མེར་སྲེག་གཏོང་མཁན་སྐོར་གནས་ཚུལ་ཐོན་འདུག དེ་སྔོན་ཞུས་པ་ལྟར། བདེན་པ་བོད་པར་ཡོད་པ་དང་དམིགས་བསལ་རང་ལུས་མེར་སྲེག་གཏོང་མཁན་ཚོའི་མངོན་འདོད་ལ་རྒྱབ་སྐྱོར་བྱེད་མཁན་ཤུགས་ཆེ་རུ་འགྲོ་སྐབས། རྒྱ་ནག་གཞུང་ནས་འགྲོ་སོང་ཆེན་པོ་བཏང་སྟེ་ང་ཚོར་ཁ་གཏད་གཅོག་ཆེད་ཁ་དམག་དང་མ་སོང་ཤུགས་ཆེ་རུ་གཏོང་གི་ཡོད་པའི་གནས་ཚུལ་ཐོན་གྱི་འདུག དཔེར་ན། ཉིན་གཅིག་གི་སྔོན་ཡུ་རོབ་ལ་བཏང་བའི་རྒྱ་ནག་གཞུང་གི་སྐུ་ཚབ་དེས་གསར་འགྱུར་བརྒྱུད་ལམ་ཁག་ནང་། རང་ལུས་མེར་སྲེག་གཏོང་མཁན་དེ་དག་ལ་ཕྱི་རྒྱལ་དུ་ཡོད་པའི་མི་སྣ་ཚོས་བཟོས་པ་རེད། བོད་ནང་ཆ་བཞག་ན། ཆོས་ལུགས་ཀྱི་རང་དབང་ཆ་ཚང་ཡོད། དགོན་སྡེ་ཁག་ཀྱང་མང་པོ་བརྒྱབ་ཡོད་པ་མ་ཟད། དགེ་འདུན་པ་ཡང་མང་ཤོས་ཆགས་ཀྱི་ཡོད། དེ་བཞིན་བོད་ཡིག་དང་བོད་སྐད་བེད་སྤྱོད་བཏང་ཆོག་གི་ཡོད། དེར་བརྟེན་སྤྱི་ཡོངས་ནས་རང་དབང་ཡོད། ཕྱི་ཕྱོགས་སུ་ཡོད་པའི་བོད་མི་ཚོས་དཀྲོག་གཏམ་བཤད་ནས་ཡུ་རོབ་ཁག་ལ་ཡོད་པའི་རྒྱལ་ཁབ་མང་པོའི་ནང་མགོ་སྐོར་གྱི་ཡོད་འདུག དེའི་ནང་ནས་ཡུ་རོབ་ཀྱི་གནད་ཡོད་མི་སྣ་དེ་འདྲ་ཁོ་པ་ཚོར་རྒྱབ་སྐྱོར་ཡོད་པའི་རྣམ་པ་སྟོན་བཞིན་འདུག རྣམ་པ་ཚོས་དེ་དག་ཤེས་འདོད་ཡོད་ན། བོད་ལ་ཕེབས་ཏེ་དངོས་ཡོད་ཀྱི་གནས་སྟངས་གང་འདྲ་ཡིན་མིན་ལྟ་ན་ཡག་པོ་ཡོད། ཅེས་བཤད་འདུག དེ་དག་ཧམ་བཤད་དང་རྫུན་གཏམ་ཡིན་པ་ང་ཚོས་བརྗོད་མི་དགོས་པར་ཡུ་རོབ་གྲོས་ཚོགས་ཀྱི་ཚོགས་གཞོན་མཆོག་གིས་རྒྱ་ནག་གཞུང་གི་སྐུ་ཚབ་ཀྱིས་བཤད་པ་དེ་བདེན་པ་མ་རེད། བོད་མིར་ཆོས་དད་རང་དབང་མེད་པ་མ་ཟད། བོད་ཡིག་དང་བོད་སྐད་བེད་བཏང་ཆོག་གི་མེད་པ་དེ་གསར་འགྱུར་བརྒྱུད་ལམ་ཁག་དང་གཞུང་འབྲེལ་མ་ཡིན་པའི་ཚོགས་པ་ཁག་ལ་གནས་ཚུལ་ཁུངས་ལྡན་ཡོད་པ་ཧ་ཅང་གསལ་པོ་ཡིན་པ་ཤེས་ཀྱི་ཡོད། བོད་དེ་བཙོན་ཁང་ལྟར་གྱི་གནས་སྟངས་ཆགས་ཡོད་པ་དེ་ཡང་ཤེས་ཀྱི་ཡོད། གལ་ཏེ་རྒྱ་ནག་གཞུང་གི་སྐུ་ཚབ་ཀྱིས་བཤད་པ་རྣམས། དངོས་ཡོད་གནས་སྟངས་ཡིན་ན། ཡུ་རོབ་གྲོས་ཚོགས་ཀྱི་འཐུས་མི་བོད་དུ་འགྲོ་བསྐྱོད་བཅུག་སྟེ་ཞིབ་འཇུག་བྱེད་འཇུག་དགོས། ཞིབ་འཇུག་བྱེད་སྐབས་རྒྱ་ནག་གཞུང་གི་དམག་གི་བོད་མིར་དྲག་གནོན་བྱེད་མཁན་དེ་དག་སྲུང་སྐྱོབ་ཀྱི་རྣམ་པའི་ཐོག་ནས་ང་ཚོའི་མཇུག་དེད་བྱས་ནས་ང་ཚོར་དམ་བསྒྲགས་བྱས་ན་འགྲིག་གི་མེད། རྒྱ་ནག་གཞུང་གི་སྐུ་ཚབ་ཀྱིས་བཤད་པ་དེ་དག་དངོས་བདེན་ཡིན་ན། ཡུ་རོབ་ཀྱི་སྐུ་ཚབ་རྣམས་བོད་དུ་འགྲོ་འདོད་ཡོད་པ་མ་ཟད། དངོས་ཡོད་གནས་སྟངས་ཞིབ་འཇུག་བྱེད་འདོད་ཡོད། དེར་བརྟེན་ང་ཚོ་གཏོང་དགོས་ཀྱི་འདུག ཅེས་ཁ་གསལ་གསུངས་ཡོད། སྤྱིར་བཏང་རྒྱ་ནག་གཞུང་ཆབ་སྲིད་དང་དཔལ་འབྱོར་གང་ཅིའི་ཐོག་སྟོབས་ཤུགས་ཆེན་པོ་ཡོད་སྟབས། ཁོ་པ་ཚོས་ཧམ་བཤད་བྱས་པ་དེ་དག་བདེན་པ་ཆགས་ཐབས་སུ་འབད་བརྩོན་བྱེད་བཞིན་འདུག འོན་ཀྱང་ང་ཚོ་གཙོ་ཆེ་གཞིས་ལུས་རྒྱ་ཆེའི་མི་མང་རྣམས་ཀྱིས་བློས་བཏང་གནང་སྟེ་སྐུ་ངལ་བསྐྱོན་པ་དང་། དེ་བཞིན་བཙན་བྱོལ་དུ་ཡོད་པའི་སྒྲིག་འཛུགས་དང་མི་མང་ཚང་མས་སྐུ་ངལ་བསྐྱོན་ནས་ང་ཚོར་བདེན་པོ་ཡོད་པ་དེ་རྒྱལ་སྤྱིའི་ཐོག་ལ་གསལ་པོ་བཟོ་ཐབས་ཀྱི་འབད་བརྩོན་རིམ་པས་གནང་བར་བརྟེན། ཡུ་རོབ་ཏུ་རྒྱ་ནག་གཞུང་གི་སྐུ་ཚབ་ཀྱིས་ཧམ་བཤད་བྱེད་སྐབས། དེར་ལན་འདེབས་ང་ཚོས་བྱས་དང་བྱེད་མུས་ཡིན་པ་མ་ཟད། ཡུ་རོབ་གྲོས་ཚོགས་ཀྱི་ཚོགས་གཞོན་མཆོག་གིས་འཕྲལ་མར་གནད་དོན་དེའི་སྐོར་ལན་འདེབས་ལྟ་བུ་གནང་ཡོད། རང་ལུས་མེར་སྲེག་གཏོང་མཁན་ཁྱོན་བསྡོམས་ ༩༩ ཆགས་ཡོད། བློ་ཕམ་དང་ཡིད་སྐྱོ་དགོས་པའི་གནས་ཚུལ་ཞིག་ཡིན་སྟབས། ང་ཚོ་ཚང་མའི་སེམས་ནང་ཚོར་བ་ཤུགས་ཆེན་པོ་ཡོང་གི་ཡོད། ད་བར་དུ་བཙན་བྱོལ་ནང་ཡོད་པའི་བོད་མི་ཚོ་ཡིན་རུང་སེམས་འཚབ་ཁྱེར་བའི་ཐོག་ནས་ལྷིང་འཇགས་གནང་བ་དེ་ང་ཚོའི་གཟི་བརྗིད་རེད་བསམས་ཀྱི་ཡོད། དེར་བརྟེན་ཚང་མས་ཐུགས་སྨོན་ཡག་པོ་བསྐྱོན་རོགས་གནང་། དེ་བཞིན་སྤྱི་ཚོགས་ནང་ལྷིང་འཇགས་པོ་གནང་རོགས་ཞུ་རྒྱུ་ཡིན། ཐུགས་རྗེ་ཆེ་ཞེས་གསུང་བཤད་གནང་ཡོད་པ་བཅས། །
