༢༠༡༣ ཟླ་ ༡ ཚེས་ ༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༣ ཟླ་ ༡ ཚེས་ ༣ ནས་ ༥ བར་ཉིན་གྲངས་གསུམ་རིང་ཤེས་རིག་ལས་ཁུངས་ཀྱིས་གོ་སྒྲིག་འོག་གཏན་ཉིན་སློབ་གྲྭ་ཁག་གི་བོད་རིགས་དགེ་རྒན་གྱི་ཚོགས་ཆེན་ཐེངས་དང་པོ་རྡ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་ཚོགས་པའི་ཚོགས་ཆེན་ཕྱི་ཚེས་ ༥ ཉིན་གྱི་ཕྱེད་ཡོལ་མཇུག་སྒྲིལ་གནང་བའི་མཛད་སྒོར་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་མཇུག་སྡོམ་གསུང་བཤད་གནང་དོན། ཉིན་གསུམ་རིང་ཚོགས་ཆེན་ཐོག་སྤྱི་ཡོངས་ཀྱི་ཤེས་ཡོན་དང་ལྷག་པར་སློབ་གྲྭའི་ནང་གི་ཤེས་ཡོན་སྐོར་ལ་གྲོས་བསྡུར་ལྷུག་པོ་བྱུང་སོང་བསམས་ཀྱི་ཡོད། ཧི་མ་ལ་ཡའི་སློབ་ཕྲུག་ང་ཚོའི་འཛིན་གྲྭའི་ནང་ཁ་ཐུག་སླེབས་སྐབས། བོད་ཡིག་སློབ་སྦྱོང་རྗེས་ཟིན་གྱི་མི་འདུག་ཅེས་པའི་དགོངས་ཚུལ་ཞིག་སླེབས་ཀྱི་འདུག རྩ་བའི་ཤེས་རིག་ལས་ཁུངས་ནས་སྒྲིག་གཞི་ཞིག་གཏན་འབེབས་བྱས་ཡོད་འདུག དེའི་ནང་འཛིན་གྲྭ་དང་པོ་ནས་སློབ་འཇུག་བྱེད་རྒྱུ་མ་གཏོགས་གནང་གི་མེད་པ་འདྲ། ངེས་མེད་ཀྱི་འཛིན་གྲྭ་གཉིས་པ་གསུམ་པ་བཞི་པ་དེ་འདྲ་སློབ་བྱེད་དགོས་པ་ཆགས་ན། སློབ་གྲྭ་སོ་སོ་ཡིག་རྒྱུགས་གཏོང་དགོས་པ་མ་ཟད། ལྷག་པར་བོད་ཡིག་གི་ཡིག་རྒྱུགས་བཏང་སྟེ་ཚུད་ཀྱི་འདུག་མི་འདུག་ཅེས་གསུངས་འདུག དེར་བརྟེན་སྒྲིག་གཞི་ཡོད་ཀྱང་ལག་ལེན་འཁེལ་མ་འཁེལ་སྣ་ཚོགས་ཤིག་ཡོང་གི་ཡོད་འདུག དེ་ཚོའི་ཐོག་ང་ཚོས་མཇུག་སྐྱོང་ག་རེ་བྱེད་དགོས་ཀྱི་འདུག་བལྟ་གི་ཡིན། ཞེས་སོགས་དང་།
ལྷག་པར་ཁོང་གིས་ཤེས་ཡོན་ཡར་རྒྱས་གཏོང་ཕྱོགས་སྐོར་ལ་གསུང་དོན། ང་ཚོས་ཤེས་ཡོན་ཐད་ཇིའུ་མི་རིགས་ལ་དཔེ་ལྟ་དགོས་གལ་ཆེན་པོ་ཆགས་ཀྱི་འདུག གང་ལ་ཞེ་ན། ཇིའུ་མི་རིགས་ལོ་སྟོང་ཕྲག་གཉིས་ལྷག་རིང་ལ་ཁོང་ཚོའི་ལུང་པ་ནས་བྲལ་ནའང་ད་ལྟ་འཛམ་གླིང་ས་ཕྱོགས་གང་སར་ཁོང་ཚོའི་མི་རིགས་མེད་པ་མེད་ཅེས་བརྗོད་ཀྱི་ཡོད། ཁོང་གང་དུ་ཡོད་ཀྱང་དེར་ཧྲ་ཏག་ཏག་ཐོག་ནས་སྡོད་ཐུབ་ཀྱི་འདུག དེ་ལྟར་སྡོད་ཐུབ་རྒྱུའི་རྒྱུ་མཚན་ཁོང་ཚོར་སྐད་ཆ་དྲིས་སྐབས། ཤེས་ཡོན་གལ་ཆེར་འཛིན་ནས་སློབ་སྦྱོང་ལ་ཧུར་བརྩོན་བྱས་པ་ལས་བྱུང་བ་རེད། ང་ཚོ་ས་གནས་གང་དུ་བཙན་བྱོལ་བྱས་ཀྱང་རང་ཉིད་ཀྱིས་སྦྱང་པའི་ཤེས་ཡོན་དེ་དག་བེད་སྤྱོད་གཏོང་རྒྱུ་འདུག རྒྱུ་ནོར་གསོག་འཇོག་བྱས་དེ་དག་འཁྱེར་རྒྱུ་མི་འདུག་ཅེས་བརྗོད་ཀྱི་འདུག དེར་བརྟེན་ང་ཚོས་ཤེས་ཡོན་གལ་ཆེན་པོ་བརྩིས་ཏེ་སྦྱོང་དགོས་པ་མ་ཟད། ང་ཚོའི་སྤྱི་ཚོགས་སྤྱི་ཡོངས་ནས་ཤེས་ཡོན་གལ་ཆེན་པོ་ཡོང་ཐབས་ལ་འབད་བརྩོན་གནང་རོགས་ཞེས་སོགས་ཀྱི་གསུང་བཤད་གནང་ཡོད། དེ་ནས་ཤེས་རིག་དྲུང་འཕར་སྟོབས་རྒྱལ་ཚེ་རིང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་ཉིན་གསུམ་རིང་ཚོགས་པའི་ཚོགས་ཆེན་མཇུག་བསྒྲིལ་ཡོད་པ་བཅས། །
