༢༠༡༣ ཟླ་ ༡ ཚེས་ ༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༣ ཟླ་ ༡ ཚེས་ ༣ ནས་ ༥ བར་ཉིན་གྲངས་གསུམ་རིང་ཤེས་རིག་ལས་ཁུངས་ཀྱིས་གོ་སྒྲིག་ཞུས་པའི་གཏན་ཉིན་སློབ་གྲྭ་ཁག་གི་བོད་རིགས་དགེ་རྒན་ཚོགས་ཆེན་ཐེངས་དང་པོ་རྡ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་དབུ་འཛུགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཡོལ་ཙམ་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་དང་ཤེས་རིག་བཀའ་བློན་གཅིག་ལྕོགས་བློ་བཟང་སེང་གེ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་དང་ལྷན་སྣང་གསལ་ཞལ་འབྱེད་གནང་གྲུབ་མཚམས་བོད་བསྟན་པ་ཆབ་སྲིད་དང་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་ཕོ་མོ་ཡོངས་ལ་རྗེས་དྲན་དང་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་གནང་ཡོད། དེ་རྗེས་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་ཚོགས་བཅར་བ་རྣམས་ལ་ཕེབས་བསུ་དང་འབྲེལ་ཚོགས་འདུའི་ངོ་སྤྲོད་ཀྱི་གསུང་བཤད་གནང་གྲུབ་བསྟུན། སྲིད་སྐྱོང་མཆོག་གིས་གསུང་བཤད་གནང་ཡོད།
ཐེངས་འདིའི་ཚོགས་འདུའི་ཐོག་གཏན་ཉིན་སློབ་གྲྭ་ཁག་གི་གཞི་རིམ་གོང་འོག་བར་གསུམ་གྱི་དགེ་རྒན་དང་ཆོས་དགེ། སྔོན་འགྲོའི་དགེ་རྒན། ཤེས་རིག་ལས་ཁུངས་ཀྱི་ཚན་པའི་འགན་འཛིན་དང་ཤེས་ཡོན་འགན་འཛིན་སོགས་ཁྱོན་མི་གྲངས་ ༡༥༣ ཙམ་མཉམ་ཞུགས་གནང་ཡོད། ཉིན་གྲངས་གསུམ་རིང་གི་ཚོགས་འདུའི་སྐབས་གཏན་ཉིན་སློབ་གྲྭ་ཁག་གི་ཤེས་ཡོན་ཡར་རྒྱས་གཏོང་ཐབས་དང་། སློབ་གྲྭ་ཁག་གི་ཀུན་སྤྱོད་སློབ་གསོ་དང་སྒྲིག་ལམ་ཡར་རྒྱས་གཏོང་ཐབས། འཛིན་རིམ་དྲུག་པ་ནས་བརྒྱད་པ་བར་སློབ་ཁྲིད་བརྒྱུད་ལམ་ཇི་དགེའི་སྐོར་སོགས་ཀྱི་ཐོག་གྲོས་བསྡུར་གནང་རྒྱུ་ཡིན་འདུག་པ་བཅས།།
