༢༠༡༢ ཟླ་ ༡༢ ཚེས་ ༦ རེས་གཟའ་ཕཧུར་བུ།
༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༥ རེས་གཟའ་ལྷག་པའི་ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་མཱ་རིའོ་ཨོ་ཊེ་རོ་ (Maria Otero) མཆོག་གིས་བོད་མིས་རང་ལུས་མེར་སྲེག་བསྟུད་མར་གཏོང་བཞིན་པ་དེར་ཨ་རིའི་གཞུང་གིས་སེམས་འཚབ་ཧ་ཅང་ཡོད་པའི་བསྒྲགས་གཏམ་ཞིག་སྤེལ་བའི་ནང་འཁོད་དོན།
བོད་རིགས་གནས་སྡོད་ཀྱི་ས་ཁུལ་ཁག་ཏུ་རང་ལུས་མེར་སྲེག་གཏོང་མཁན་གྱི་གྲངས་ཚད་ཇེ་མང་དུ་འགྲོ་བཞིན་པ་དེར་ཨ་རིའི་གཞུང་ལ་སེམས་ཚབ་དང་བློ་ཕམ་ཧ་ཅང་ཆེན་པོ་ཡོད། རྒྱ་ནག་གཞུང་གིས་བོད་མིས་རང་ལུས་མེར་སྲེག་བཏང་བའི་ཛ་དྲག་གི་དོན་རྐྱེན་དེ་དག་འགོག་ཐབས་བྱེད་སྐབས་དེ་སྔ་ཆོས་དད་དང་སྨྲ་བརྗོད། འདུ་འཛོམས་ཀྱི་རང་དབང་སོགས་ལ་དམ་བསྒྲགས་ཡོད་བཞིན་པའི་ཁར་སླར་ཡང་དམ་བསྒྲགས་ཤུགས་ཆེ་རུ་གཏོང་བཞིན་ཡོད།
རྒྱ་ནག་གཞུང་གིས་བོད་ཀྱི་སྐད་ཡིག་ལ་དམའ་འབེབ་དང་། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཚན་སྨད། བོད་མི་རང་ལུས་མེར་སྲེག་གཏོང་མཁན་རྣམས་ལ་ཁྱད་གསོད་བྱས་པ་སོགས་ལ་བརྟེན། གནས་སྟངས་དེ་བས་ཛ་དྲག་ཏུ་གཏོང་བཞིན་ཡོད། ཨ་རིའི་གཞུང་འབྲེལ་མི་སྣ་མཐོ་གྲས་ཚོས་འབྲེལ་ཡོད་རྒྱ་ནག་གཞུང་གི་དཔོན་རིགས་དང་ལྷན་བོད་མིས་རང་ལུས་མེར་སྲེག་བཏང་བའི་དོན་རྐྱེན་སྐོར་ཐད་ཀར་གླེང་སློང་གནང་ཡོད། ཨ་རིའི་གཞུང་གིས་རྒྱ་ནག་གཞུང་ལ་བོད་མིའི་དཀའ་ངལ་སེལ་ཏེ་བོད་ནང་གི་ཛ་དྲག་གནས་སྟངས་ཞི་འཇམ་ཡོང་ཐབས་དགོས་པའི་རེ་འདུན་ཡང་ཡང་བཏོན་ཡོད།
རྒྱ་ནག་གཞུང་གིས་བོད་བརྒྱུད་ནང་ཆོས་ཉམས་ལེན་དང་བོད་མིའི་ཆོས་སྡེ་ཁག་དང་དགོན་པ་གྲྭ་ཚང་ཁག་ལ་དམ་བསྒྲགས་ཧ་ཅང་བྱས་པ་མ་ཟད། ཤེས་ཡོན་ལམ་ལུགས་སོགས་ལའང་དམ་བསྒྲགས་ཧ་ཅང་བྱས་པ་བརྒྱུད་བོད་མིའི་སྐད་ཡིག་སྲུང་སྐྱོབ་ལ་ཁྱད་གསོད་བྱས་པ་དང་། བོད་མིའི་ཐོག་གསོ་ལྟ་བཙུགས་ཏེ་གསང་ཉུལ་ཤུགས་ཆེ་བྱས་པ། བོད་མི་རྣམས་ཁྲིམས་བརྒལ་ཐོག་གང་བྱུང་འཛིན་བཟུང་བཀག་ཉར་བྱས་པ། བོད་མི་གཞོན་སྐྱེས། ཤེས་ཡོན་དང་རིག་གཞུང་སྲུང་སྐྱོབ་བྱེད་མཁན། རྩོམ་པ་པོ་སོགས་གར་སོང་ཆ་མེད་དུ་གྱུར་བ། དེ་བཞིན་གསར་འགྱུར་བརྒྱུད་ལམ་དང་འབྲེལ་ལམ་ཐོག་དམ་བསྒྲགས་བཀག་བསྡོམ་བྱས་པ་མ་ཟད། ཞི་བའི་ལམ་ནས་གཞི་རྩའི་འགྲོ་བ་མིའི་ཐོབ་ཐང་རྩོད་མཁན་གྱི་བོད་མི་རྣམས་ལ་དྲག་གནོན་བྱ་རྒྱུའི་སྲིད་བྱུས་ལག་བསྟར་བྱས་པར་བརྟེན་བོད་ནང་གི་གནས་སྟངས་ཛ་དྲག་ཅན་དུ་འགྱུར་བཞིན་ཡོད། བོད་མི་ཚོར་འཇིགས་སྣང་དང་ཚེར་སྣང་མེད་པར་རང་དབང་ཐོག་ཞི་བའི་ལམ་ནས་རང་གི་དཀའ་ངལ་རྣམས་མང་ཚོགས་ཁྲོད་བརྗོད་རྒྱུའི་ཐོབ་ཐང་སྤྲོད་དགོས་པ་ང་ཚོས་རྒྱ་ནག་གཞུང་ལ་རེ་འདུན་ཤུགས་ཆེ་འདོན་པ་དང་སྦྲགས།
རང་ལུས་མེར་སྲེག་མཚམས་འཇོགས་ཡོང་རྒྱུའི་རེ་བ་ཞུ་བཞིན་ཡོད། ཕྱོགས་མཚུངས་ང་ཚོས་རྒྱ་ནག་གཞུང་ལ་གསར་འགོད་པ་དང་གཞུང་འབྲེལ་སྐུ་ཚབ་འཐུས་མི། གནད་དོན་རྟོགས་ཞིབ་པ་སོགས་བོད་ཀྱི་ས་ཁུལ་ཁག་ཏུ་འགྲོ་རྒྱུའི་ཆོག་མཆན་སྤྲོད་དགོས་པའི་རེ་འདུན་བཏོན་པ་ཙམ་མ་ཟད། རྒྱ་ནག་གཞུང་གིས་ཆ་རྐྱེན་གང་ཡང་མེད་པར་བོད་ཀྱི་༸སྐྱབ་མགོན་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་གྲོས་མོལ་གནང་རྒྱུའི་རེ་འདུན་ཞུ་རྒྱུ་ཡིན། ཞེས་འཁོད་ཡོད།
ཡིག་ཆ་ངོ་མ་ཨིན་སྐད་ནང་ཡོད་པ་ནས་འདི་ག་བོད་ཡིག་ཚན་པས་ཕབ་བསྒྱུར་ཞུས་པས་ཨིན་ཡིག་ལ་རྩ་འཛིན་ཡོང་བ་ཞུ།།
