༢༠༡༢ ཟླ་ ༡༢ ཚེས་ ༡༥ རེས་གཟའ་སྤེན་པ།

༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༡༤ ཉིན་ཨ་རིའི་ཕོ་བྲང་དཀར་པོའི་ཉིན་རེའི་གསར་འགོད་ལྷན་ཚོགས་སྐབས་གསར་འགོད་པ་ཞིག་གིས་དེང་སྐབས་བོད་མི་ཚོས་རང་ལུས་མེར་སྲེག་མུ་མཐུད་གཏོང་བཞིན་པ་དེར་རྒྱལ་སྤྱི་དང་ཨ་རིས་བོད་མི་ཚོའི་འགྲོ་བ་མིའི་ཐོབ་ཐང་སོགས་ཀྱི་གནད་དོན་ལ་རྒྱབ་སྐྱོར་མ་བྱས་ཚེ་མུ་མཐུད་རྒྱུ་ཡིན་པ་དང། རྒྱ་ནག་གཞུང་གིས་དེང་སྐབས་བོད་མིས་རང་ལུས་མེར་སྲེག་གཏོང་རྒྱུའི་ལས་འགུལ་མུ་མཐུད་སྤེལ་ཚེ། རྒྱལ་སྤྱིའི་སྤྱི་ཚོགས་ཀྱི་གནོན་ཤུགས་ལ་ལྟོས་མེད་ཀྱིས་ལས་འགུལ་དེར་གདོང་ལེན་བྱ་རྒྱུའི་སྡིགས་ར་གཏོང་བཞིན་པ་དེར་དགོངས་ཚུལ་ཇི་ཡོད་ཀྱི་དྲི་བ་ཞུས་པར། ཕོ་བྲང་དཀར་པོའི་མགྲིན་ཚབ་པའི་ལས་རོགས་སྐུ་ཞབས་ Acting Deputy Spokesperson པེ་ཊིཀ་ཝེན་ཊི་རེལ་Patrick Ventrell མཆོག་གིས་ལན་འདེབས་གནང་དོན། ང་ཚོས་ཡོངས་གྲགས་དང་ཡོངས་གྲགས་མིན་པའི་བརྒྱུད་ལམ་སྣ་ཚོགས་བརྒྱུད་རྒྱ་ནག་གཞུང་ནས་བོད་མིའི་ཐོག་འཛིན་བཞིན་པའི་སྲིད་བྱུས་དེས་བོད་མིའི་ཆོས་དང་རིག་གཞུང། སྐད་ཡིག ཐུན་མིན་ངོ་བོ་སོགས་ལ་ཉེན་ཁ་བཟོ་བཞིན་པར་བརྟེན། བོད་མི་རྣམས་ཛ་དྲག་གནས་སྟངས་འོག་དཀའ་ངལ་འཕྲད་བཞིན་ཡོད། དེར་བརྟེན་རྒྱ་ནག་གཞུང་གིས་སྲིད་བྱུས་དེ་དག་ལ་འགྱུར་བ་གཏོང་དགོས་པའི་རེ་འདུན་བཏོན་དང་འདོན་མུས་ཡིན་པ་མ་ཟད། ཐེངས་འདིར་ཡང་རྒྱ་ནག་གཞུང་གིས་རང་དབང་དང་ཞི་བའི་ལམ་ནས་འཇིགས་སྣང་གང་ཡང་མེད་པའི་ཁོར་ཡུག་འོག་བོད་མི་རྣམས་ལ་རང་གི་དཀའ་ངལ་རྣམས་ཡོངས་གྲགས་བྱ་རྒྱུའི་ཐོབ་ཐང་སྤྲོད་དགོས་པའི་རེ་འདུན་ཞུ་རྒྱུ་ཡིན། ལངས་ཕྱོགས་འདི་ནི་ང་ཚོས་རྒྱ་ནག་གཞུང་དང་ལྷན་གྲོས་མོལ་བྱ་རྒྱུའི་ཆ་ཤས་གཙོ་བོ་ཞིག་ཆགས་ཡོད། ཅེས་ལན་འདེབས་གནང་ཡོད་པ་བཅས།།