༢༠༡༢ ཟླ་ ༡༢ ཚེས་ ༡༥ རེས་གཟའ་སྤེན་པ།
༄༅། །ཧོང་ཀོང་ནང་གི་སྙན་གྲགས་ཆེ་བའི་དུས་དེབ་( isun Affairs)ཞེས་པའི་ནང་ཕྱི་ལོ་ ༢༠༠༩ ནས་བཟུང་ད་བར་བོད་མི་རང་ལུས་མེར་སྲེག་གཏོང་མཁན་རྣམས་ཀྱི་གནས་ཚུལ་ཞིབ་ཕྲ་དང་རང་སྲོག་བློས་གཏོང་དགོས་པའི་རྒྱུ་མཚན། ལྷག་པར་རྒྱལ་གཅེས་པ་དེ་དག་ཁོངས་ནས་ཉི་ཤུ་རྩ་བདུན་གྱིས་ཁ་ཆེམས་བཞག་ཡོད་པ་རྣམས་ཀྱང་རེ་རེ་བཞིན་བཀོད་གནང་འདུག
དེ་ཡང་བརྒྱུད་ལམ་ཁག་ནང་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༡༢ ཚེས་ ༡༤ ཉིན་འདོན་སྤེལ་གནང་བའི་གོང་འཁོད་དུས་དེབ་འདོན་ཐེངས་ ༣༤ པའི་དེབ་ངོས་སུ་འདི་ལོའི་ཕྱི་ཟླ་ ༦ པའི་ནང་རྒྱ་གར་གྱི་རྒྱལ་ས་ལྡི་ལིར་རང་ལུས་མེར་སྲེག་གཏོང་གནང་མཁན་རྒྱལ་གཅེས་པ་འཇམ་དཔལ་ཡེ་ཤེས་ལགས་ཀྱི་སྐུ་ལུས་ལ་མེ་ལྕེ་འབར་བཞིན་པའི་འདྲ་པར་ཞིག་དང་། ཕྱི་ལོ་ ༢༠༠༩ ནང་བོད་མདོ་སྨད་རྔ་པ་ཀིརྟི་དགོན་པའི་དགེ་འདུན་པ་བཀྲ་བྷེ་ལགས་ཀྱིས་རྒྱ་ནག་གཞུང་གི་སྲིད་བྱུས་ལ་ཞི་རྒོལ་གནང་བའི་གནད་དོན་དེ་ནས་བརྩིས་པའི་འདི་ལོའི་ཕྱི་ཟླ་ ༡༢ ཚེས་ ༩ ཉིན་བོད་མདོ་སྨད་རྩེ་ཁོག་ཁུལ་དུ་བོད་པའི་བུད་མེད་བན་ཆེན་སྐྱིད་ལགས་བར་བོད་མི་རང་ལུས་མེར་སྲེག་གཏོང་མཁན་རྣམས་ཀྱི་མིང་དང་ལོ་ཚད་རང་ལུས་མེར་སྲེག་སྐབས་འབོད་ཚིག་གང་ཞིག་བསྒྲགས་ཡོད་མེད། དེ་བཞིན་ཁོང་རྣམ་པའི་དགོས་འདུན་དང་ཁ་ཆེམས་འཇོག་མཁན་རྣམ་པའི་ཁ་ཆེམས་ཀྱི་ནང་དོན་བཅས་གནས་ཚུལ་ཞིབ་ཕྲ་བཀོད་པ་སོགས་ཀྱི་ཐོ་གཞུང་ཞིག་འདོན་སྤེལ་གནང་འདུག་བཅས། །
