༢༠༡༢ ཟླ་ ༡༢ ཚེས་ ༢༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༢༩ ཉིན་བཀའ་ཤག་ཚོགས་ཁང་དུ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་འཛིན་རིམ་བཅུ་གཅིག་པའི་སློབ་མ་ཟབ་སྦྱོང་བ་རྣམས་ལ་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་ཀྱི་སྲིད་བྱུས་དང་འབྱུང་འགྱུར་བོད་རྒྱའི་འབྲེལ་ལམ་སྐོར་གྱི་བརྗོད་གཞིའི་ཐོག་གསུང་བཤད་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༡ ཐོག་སྤྱི་འཐུས་ཨཅཱརྱ་ཡེ་ཤེས་ཕུན་ཚོག་ལགས་ཀྱིས་སྣེ་ཁྲིད་འོག་དགེ་ལས་ཁྱོན་མི་གྲངས་ ༡༢༣ ལྷན་འཛོམས་ཐོག་མ་སུ་རི་བོད་ཁྱིམ་སློབ་མ་ལྷ་རོང་ལགས་ཀྱིས་སྲིད་སྐྱོང་མཆོག་གི་ལོ་རྒྱུས་སྙིང་བསྡུས་ཤིག་སློབ་ཕྲུག་ཚོར་ངོ་སྤྲོད་གནང་། དེ་རྗེས་སྲིད་སྐྱོང་བློ་བཟང་སེང་གེ་མཆོག་གིས་གོང་འཁོད་བརྗོད་གཞིའི་ཐོག་གསུང་བཤད་གནང་དོན། བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་ཡིན་ལ་མིང་དོན་མཚུངས་པའི་ཚད་མཐོའི་རང་སྲིད་རང་སྐྱོང་རྩོད་ཀྱི་ཡོད་པ་ཚང་མས་མཁྱེན་གསལ་རེད།
ཕྱི་ལོ་ ༡༩༧༠ ནས་གཞི་རྩའི་རྒྱ་བོད་འབྲེལ་བ་དབུ་འཛུགས་གནང་སྟེ་ཉེ་བའི་ཆར་རྒྱ་བོད་འབྲེལ་བའི་སྐུ་ཚབ་ཐེངས་བཅུ་ཙམ་ཕེབས་ཏེ། གཞུང་འབྲེལ་བཀའ་མོལ་ཐེངས་དགུ་གནང་ཡོད། དེའི་ནང་མིང་དོན་མཚུངས་པའི་རང་སྐྱོང་གང་འདྲ་ཞིག་ཡིན་མིན་དང་དེའི་འགྲེལ་བཤད་བཅས་ཡོད། དེ་བཞིན་ན་ནིང་ཕྱི་ཟླ་དྲུག་པའི་ནང་སྐུ་ཚབ་རྣམ་པ་གཉིས་དགོངས་ཞུ་གནང་ཡོད།
ཕྱི་ལོ་ ༢༠༠༨ ལོ་ནས་བཟུང་བོད་ནང་གི་ཛ་དྲག་གནས་སྟངས་ཇེ་ཞན་ཇེ་སྡུག་དུ་ཕྱིན་ཡོད། ཅེས་དང་།
ཉེ་ལམ་རྒྱ་ནག་ནང་སྐབས་བཅོ་བརྒྱད་པའི་ཚོགས་ཆེན་ཚོགས་ཏེ་འགོ་ཁྲིད་གསར་པ་ཚོ་འཕོ་འགྱུར་བྱུང་སྐོར་དང་། དམིགས་བསལ་བོད་དང་འབྲེལ་བའི་རྒྱབ་ལྗོངས། འཛམ་གླིང་སྤྱི་དང་ཨེ་ཤི་ཡའི་ཆབ་སྲིད་ཀྱི་འཕེལ་ཕྱོགས་སྐོར། དེ་བཞིན་མ་འོངས་པར་བོད་ཀྱི་རྩ་དོན་དང་སྒྲིག་འཛུགས་ཆེད་༸གོང་ས་མཆོག་གིས་དབུས་མི་རབས་རྒན་པ་ཚོས་ལོ་ངོ་ལྔ་བཅུ་བརྒལ་བའི་ནང་སྐུ་ངལ་བརྒྱབ་སྟེ། འཛམ་གླིང་གི་ས་ཁྲའི་སྟེང་བོད་ཅེས་པ་དེ་མ་བརླག་པར་མཐོང་རྒྱུ་ཡོད་པས། དེ་མཚུངས་སློབ་ཕྲུག་ཚོས་ཉིན་རེ་ཆུ་ཚོད་བཞི་ལྔ་ཙམ་དམའ་མཐར་སློབ་སྦྱོང་བྱེད་དགོས།
ལྷག་པར་ང་རང་སློབ་གྲྭར་འགྲིམས་པའི་སྐབས་ཀྱི་ཆ་རྐྱེན་མ་འདང་བ་ཁག་ཁྱེད་ཚོར་རག་ཐབས་བྱེད་བཞིན་ཡོད་པས། སློབ་སྦྱོང་ལ་འབད་བརྩོན་བྱས་པ་དང་ཆབས་ཅིག་བོད་མི་དྲང་པོ་དང་། སྙིང་སྟོབས་ལྡན་པ་ཞིག་བྱེད་དགོས། ཞེས་སོགས་ཀྱི་གསུང་བཤད་དང་དྲི་བ་ཁག་ལ་ལན་འདེབས་གནང་ཡོད། དེ་རྗེས་བོད་ཁྱིམ་སློབ་ཕྲུག་ཚུལ་ཁྲིམས་ལེགས་ཚོགས་ལགས་ཀྱིས་ཐུགས་རྗེ་ཆེ་ཞུས་ཡོད་པ་བཅས། །
