༢༠༡༢ ཟླ་ ༡༢ ཚེས་ ༡༧ རེས་གཟའ་ཟླ་བ།
༄༅། །སྐུ་ཞབས་ཤིན་ཛོ་ཨ་བྷེ་ (Mr Shinzo Abe) མཆོག་ཉི་ཧོང་གི་སྲིད་བློན་དུ་སླར་ཡང་འདེམས་ཐོན་བྱུང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕྱི་ལོ་ ༢༠༡༢ ཟླ་ ༡༢ ཚེས་ ༡༧ རེས་གཟའ་ཟླ་བའི་ཉིན་འཚམས་འདྲི་ཕུལ་བའི་ནང་འཁོད་དོན།
ངས་དེ་རིང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་རང་དབང་མང་གཙོ་ཚོགས་པའི་ཚོགས་གཙོ་ (Liberal Democratic Party) སྐུ་ཞབས་ཤིན་ཛོ་ཨ་བྷེ་མཆོག་ཉི་ཧོང་གི་སྲིད་བློན་དུ་འདེམས་ཐོན་བྱུང་བར་དགའ་བསུའི་འཚམས་འདྲི་ཞུས་པ་དང་སྦྲགས། བྱ་བ་ལམ་ལྷོང་ཡོང་བའི་སྨོན་འདུན་ཞུ་རྒྱུ་ཡིན། ངས་ཉི་ཧོང་གཞུང་མང་གཉིས་ཀྱིས་བོད་མིའི་མང་གཙོ་དང་འཚེ་མེད་ཞི་བའི་ལམ་ནས་བོད་དོན་འཐབ་རྩོད་ལ་ཡུན་རིང་ཐོག་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་རྗེས་དྲན་ཞུ་རྒྱུ་དང། འབྱུང་འགྱུར་ཡང་བོད་དོན་ཐོག་མུ་མཐུད་རྒྱབ་སྐྱོར་ཡོང་བའི་རེ་བ་ཞུ་རྒྱུ་ཡིན། ཞེས་འཁོད་ཡོད།
སྤྱིར་འདི་ལོའི་ཕྱི་ཟླ་ ༤ ནང་སྲིད་སྐྱོང་མཆོག་ཉི་ཧོང་དུ་གཞུང་འབྲེལ་འཚམས་གཟིགས་སུ་ཕེབས་སྐབས། སྐུ་ཞབས་ཤིན་ཛོ་ཨ་བྷེ་མཆོག་དང་ཐེངས་བཞི་མཇལ་འཕྲད་ཀྱིས་གསུང་མོལ་ལྷུག་པོ་བྱུང་ཡོད། དེ་ཡང་མཇལ་འཕྲད་སྐབས་སྐུ་ཞབས་ཨ་བྷེ་མཆོག་གིས་བོད་ཀྱི་གནད་དོན་ནི་ཉི་ཧོང་ནང་ཆབ་སྲིད་འདྲ་མིན་ཡོད་པ་ཚང་མས་གཅིག་གྱུར་ཐོག་རྒྱབ་སྐྱོར་བྱ་རྒྱུའི་གནད་དོན་འགའ་ཤིག་ཡོད་ཁོངས་ནས་གཅིག་ཆགས་ཡོད་པ་དང། ཁོང་གིས་རང་ནུས་གང་ཐུབ་ཀྱིས་བོད་ནང་བཟང་ཕྱོགས་ཀྱི་འགྱུར་བ་ཡོང་རྒྱུར་རྒྱབ་སྐྱོར་མུ་མཐུད་ཞུ་རྒྱུའི་འབད་བརྩོན་གནང་རྒྱུ་ཡིན། ཞེས་གསུངས་པ་མ་ཟད། ཕྱི་ཟླ་ ༡༡ ནང་༸གོང་ས་༸སྐྱབས་མགོན་ཆེན་པོ་མཆོག་ཉི་ཧོང་དུ་ཆིབས་སྒྱུར་སྐབས་སླར་ཡང་བོད་དོན་རྒྱབ་སྐྱོར་ཞུ་རྒྱུའི་ཁས་ལེན་གནང་ཡོད། ཅེས་སོགས་འཁོད་ཡོད།
དེ་བཞིན་ཉེ་ལམ་༸གོང་ས་མཆོག་ཉི་ཧོང་གྲོས་ཚོགས་སུ་གདན་ཞུས་ཀྱིས་གྲོས་ཚོགས་འཐུས་མི་ ༢༣༠ བརྒལ་བར་བཀའ་སློབ་སྩལ་རྒྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད་པ་བཅས།།
