༢༠༡༢ ཟླ་ ༡༢ ཚེས་ ༢༠ རེས་གཟའ་ཕུར་བུ།
༄༅། །འདི་གར་བོད་མི་མང་སྤྱི་འཐུས་ཀརྨ་ཡེ་ཤེས་ལགས་ཀྱིས་བཏང་གནས་ནང་འཁོད་དོན། ༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༨༩ ལོར་འཛམ་གླིང་ནང་སྙན་གྲགས་ཆེ་ཤོས་སུ་གྲགས་པའི་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་མི་ལོ་ ༢༣ འཁོར་བའི་དུས་དྲན་མཛད་སྒོ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དེ་བཞིན་ཕྱི་ཟླ་ ༡༢ ཚེས་ ༡༠ ཉིན་སྲུང་བརྩི་ཞུ་ཆེད། སུད་སིའི་གྲོང་ཁྱེར་འཇི་ནི་ཝར་(GENEVA) རང་གཞུང་སྐུ་ཚབ་དོན་གཅོད་དང་སུད་སི་བོད་རིགས་མི་མང་གིས་གོ་སྒྲིག་འོག་དུས་དྲན་གྱི་མཛད་སྒོ་གཟབ་རྒྱས་ཤིག་སྲུང་བརྩི་ཞུ་བའི་ཐོག ཉིན་དེར་བོད་མི་མང་སྤྱི་འཐུས་ལྷན་ཚོགས་ཀྱིས་འདི་ལོའི་སྐུའི་འཁྲུངས་སྐར་ཉིན་དབུ་འཛུགས་གནང་བའི་བདེན་པའི་མེ་ལྕེ་སྐོར་བསྐྱོད་ཀྱི་ལས་འགུལ་དེ་བཞིན་མཇུག་སྒྲིལ་གནང་ཡོད།
ཉིན་དེའི་སྔ་དྲོ་ཆུ་ཚོད་ ༡༡།༣༠ ཐོག་ཡུ་རོབ་སྤྱི་འཐུས་གཉིས་དང་། སྐུ་ཚབ་དོན་གཅོད་ཚེ་བརྟན་བསམ་གྲུབ་ལགས། བསྟན་འཛིན་བསམ་འཕེལ་ལགས། སུད་སི་བོད་རིགས་མི་མང་ཚོགས་གཙོ་གང་གཞོན་ཚང་བློ་བཟང་ལགས་བཅས་ཀྱིས་རྒྱལ་སྤྱིའི་འགྲོ་བ་མིའི་ཐོབ་ཐང་ལས་ཁུངས་ཀྱི་དྲུང་ཆེ་ (CHRISTINE CHUNG) ལགས་དང་། ཁོང་གི་ཕྱག་རོགས་ (AZWA PETRA) གཉིས་ལ་བོད་ནང་གི་དངོས་ཡོད་ཛ་དྲག་གནས་སྟངས་གསལ་བཤད་དང་། བོད་ཀྱི་དངོས་ཡོད་གནས་སྟངས་ཞིབ་འཇུག་གནང་མཁན་གྱི་འཐུས་མི་གང་མགྱོགས་གཏོང་ཐབས་གནང་དགོས་པ་སོགས་སྙན་གསེང་ཤུགས་ཆེ་ཞུས་པ་དང་ལྷན་བདེན་པའི་མེ་ལྕེ་སྐོར་བསྐྱོད་སྐབས། བོད་དོན་རྒྱབ་སྐྱོར་ས་རྟགས་བསྡུ་རུབ་གནང་བ་རྣམས་འབུལ་ལམ་ཞུས་པ་དང་ཆབས་ཅིག་ཞུ་སྙན་གྱི་ནང་དོན་ཁག་ཕྱག་བསྟར་དོན་འཁྱོལ་ཡོང་བའི་འབོད་སྐུལ་ཞུས།
དེ་རྗེས་ཆུ་ཚོད་ ༡༢ ཙམ་ལ་སུད་སི་བོད་རིགས་མི་མང་དང་། ཡུ་རོབ་རྒྱལ་ཁབ་ཁག་ནས་བོད་རིགས་ཚོགས་པའི་འཐུས་མི་བཅས་ཁྱོན་བསྡོམས་མི་མང་ཆིག་སྟོང་བརྒལ་བ་མཉམ་ཞུགས་གནང་ཡོད། སྐབས་དེར་ཡུ་རོབ་བོད་རིགས་གཞོན་ནུ་ཚོགས་པ་དང་། བུད་མེད་ཚོགས་པ། སུད་བོད་མཛའ་འབྲེལ་ཚོགས་པ་སོ་སོའི་སྐུ་ཚབ་བཅས་ནས་གདུང་སེམས་མཉམ་སྐྱེའི་གསུང་བཤད་གནང་། དེ་རྗེས་སྤྱི་འཐུས་ཐུབ་བསྟན་དབང་ཆེན་ལགས་ཀྱིས་དབྱིན་བོད་གཉིས་ཐོག་བོད་དོན་དང་འབྲེལ་བའི་གསུང་བཤད་གནང་། དེ་ནས་རིམ་བཞིན་རྒྱལ་ཚོགས་ལས་ཁུངས་མདུན་གོམ་འགྲོས་དང་སྐད་འབོད་དབུ་འཛུགས་ཞུས།
དེ་ནས་ཉིན་རྒྱབ་ཆུ་ཚོད་གཉིས་པའི་ཐོག་མཉམ་འབྲེལ་རྒྱལ་ཚོགས་མདུན་ཐང་དུ་སུད་སི་བོད་རིགས་མི་མང་གི་ཚོགས་གཙོ་བློ་བཟང་ལགས་དང་། སྤྱི་འཐུས་ཆུང་བདག་ཀོ་རན་ལགས་ཀྱིས་གསུང་བཤད་གནང་རྗེས་ཕྱི་རྒྱལ་དཔོན་རིགས་ཁག་དང་། ལྷག་པར་སི་པན་རྒྱལ་ཁབ་ཀྱི་ཆབ་སྲིད་པ་གྲགས་ཅན་ (JOSEP MALDONADO) ལགས་ཆེད་ཕེབས་ཀྱིས་བོད་དོན་རྒྱབ་སྐྱོར་གྱི་གསུང་བཤད་ཤུགས་ཆེ་གནང་།
དེ་རྗེས་ཕྱེད་ཡོལ་ཆུ་ཚོད་ ༢ དང་སྐར་མ་ ༤༥ ཐོག་སྤྱི་འཐུས་ཐུབ་བསྟན་དབང་ཆེན་ལགས་དང་། སྐུ་ཚབ་དོན་གཅོད། བསྟན་འཛིན་བསམ་འཕེལ་ལགས་གསུམ་རྒྱལ་ཁབ་བཞི་བཅུ་ལྷག་ནས་བསྡུས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་ཁུངས་ཨ་མར་ངོ་བཅར་གྱིས་ལྷན་ཚོགས་ཀྱི་ཚོགས་གཙོ་ལྕམ་སྐུ་ (LAURA DUPUY LASSERRE) ལགས་མཇལ་འཕྲད་ཞུས་ཏེ། བོད་ནང་རང་ལུས་མེ་སྲེག་གནང་མཁན་རྒྱལ་གཅེས་པ་གྲངས་ ༩༥ སླེབས་ཟིན་པར་རྒྱལ་སྤྱིའི་ཐོག་ནས་བསམ་གཞིགས་ཀྱི་བོད་ཀྱི་རྩ་དོན་ཐོག་གཟིགས་རྟོགས་དང་བདེན་པར་རྒྱབ་སྐྱོར་གནང་དགོས་པའི་འབོད་སྐུལ་ཞུས། ལྕམ་སྐུ་མཆོག་གིས་ཁོ་མོས་བོད་ནང་དཀའ་རྙོག་ཆེན་པོ་ཡོད་པ་ཤེས་ཀྱི་ཡོད་པ་དང་། འབྲེལ་ཡོད་ཚང་མས་ཤུགས་སྣོན་གང་ཐུབ་ཞུ་རྒྱུའི་ཞལ་བཞེས་ཀྱང་གནང་ཡོད།
དེ་ནས་སུད་སི་རི་ཀོན་དགོན་གྱི་མཁན་པོ་མཆོག་གིས་དབུས་དགེ་འདུན་རྣམས་ནས་རྒྱལ་བའི་ཞབས་བརྟན་གསོལ་འདེབས་དང་། བདེན་ཚིག་སྨོན་ལམ་བཅས་གསུང་འདོན་གནང་། སྐབས་དེར་རྒྱ་རིགས་གྲོགས་པོ་ (WANG LONGMONG) ལགས་ནས་ཀྱང་བོད་དོན་རྒྱབ་སྐྱོར་གྱི་གསུང་བཤད་གནང་། མཐར་དགོང་དྲོ་ཆུ་ཚོད་བཞི་པ་ཙམ་ལ་སུད་སི་བོད་རིགས་ཟློས་གར་ཚོགས་པ་ནས་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་མི་མང་རྣམས་ནས་སྐད་འབོད་ཀྱི་སྒྲ་ཚིག་རྣམས་སྒྲོག་བཞིན་བདེན་པའི་མེ་ལྕེ་སྐོར་བསྐྱོད་ཀྱི་མཇུག་བསྡོམས་ལེགས་གྲུབ་བྱུང་བ་བཅས། །
