༢༠༡༢ ཟླ་ ༡༢ ཚེས་ ༡ རེས་གཟའ་སྤེན་པ།
༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་བཀའ་བློན་ཚེ་རིང་དབང་ཕྱུག་མཆོག་གིས་འཛམ་གླིང་གཉན་ནད་རེག་དུག་གི་ཉིན་མོ་སྲུང་བརྩིའི་གསུང་བཤད་གནང་བ་གཤམ་གསལ།
ཕྱི་ཟླ་ ༡༢ ཚེས་ ༡ ཉིན་མོ་འདི་ནི་འཛམ་གླིང་གཉན་ནད་རེག་དུག་གི་ཉིན་མོར་ (World AIDS Day) ལོ་ལྟར་སྲུང་བརྩི་ཞུ་བཞིན་ཡོད་པ་ལྟར། དེ་རིང་ཕྱི་ལོ་ ༢༠༡༢ ཟླ་ ༡༢ ཚེས་ ༡ ཉིན་ང་ཚོས་འཛམ་གླིང་ཨེཌས་ཉིན་མོ་སྲུང་བརྩི་ཞུ་བ་དང་ཆབས་ཅིག་བོད་མི་ཡོངས་ལ་འཚམས་འདྲི་ཞུ་རྒྱུ་དང༌། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ནད་གཞི་འདིར་ཡོངས་གྲགས་གཉན་ནད་རེག་དུག་ཅེས་འབོད་ཀྱི་ཡོད་ཅིང༌། གཉན་ནད་རེག་དུག་ནད་འདི་ཐོག་མར་ཕྱི་ལོ་ ༡༩༨༡ ལོར་ངོ་འཕྲོད་བྱུང་བ་དང༌། ཚན་རིག་པས་བརྟག་དཔྱད་རིམ་པར་བྱས་ཏེ་ནད་གཞི་འདི་ཡོངས་གྲགས་ HIV/AIDS ཞེས་པའི་མིང་ཚིག་གཅིག་གྱུར་ངོས་འཛིན་བྱེད་བཞིན་ཡོད།
ཕྱི་ལོ་ ༢༠༡༡ ནས་ ༢༠༡༥ བར་གྱི་འཛམ་གླིང་གཉན་ནད་རེག་དུག་ཉིན་མོའི་བརྗོད་གཞི་ནི། ༼ཀླད་ཀོར་མདུན་བསྐྱོད།༽ ཨེཌས་ནད་པ་གསར་པ་ཆགས་རྒྱུ་ཀླད་ཀོར། ནད་པར་དབྱེ་འབྱེད་བྱེད་རྒྱུ་ཀླད་ཀོར། ཨེཌས་རྐྱེན་འདས་སུ་གྱུར་རྒྱུ་ཀླད་ཀོར། Getting to Zero: zero new HIV infections, Zero discrimination, Zero AIDS related death” ཞེས་པའི་བརྗོད་གཞི་འདི་བརྒྱུད་ཨེཌས་ནད་པ་རྣམས་ལ་སྨན་བཅོས་མཐུན་རྐྱེན་བཟང་དུ་གཏོང་རྒྱུར་རྒྱལ་ཁབ་སོ་སོའི་གཞུང་ནས་བསྐུལ་བརྡ་གཏོང་གི་ཡོད། འཛམ་གླིང་ཨེཌས་ཉིན་མོ་ལོ་ལྟར་སྲུང་བརྩི་ཞུ་དགོས་པའི་རྒྱུ་མཚན་གཙོ་བོ་ནི་ HIV ནད་འབུ་འདི་བཞིན་མིའི་སྤྱི་ཚོགས་ཁྲོད་ནས་རྩ་མེད་དུ་གྱུར་མེད་པར་ནད་གཞི་འདིའི་ཐད་ལས་འགུལ་ལག་བསྟར་བྱས་པ་ལས་བྱེད་རྒྱུ་མང་བ་བསྡད་ཡོད་པར་བརྟེན་མང་ཚོགས་ལ་དུས་ནས་དུས་སུ་དྲན་བསྐུལ་ཆེད་དམིགས་པ་ཞིག་ཡིན།
རྒྱལ་སྤྱིའི་འཕྲོད་བསྟེན་ལྷན་ཚོགས་ཀྱི་ཕྱི་ལོ་ ༢༠༡༡ ལོའི་སྙན་ཐོར་ད་ལྟའི་འཆར་མི་གྲངས་ས་ཡ་ ༣༤ ཙམ་ལ་ HIV ནད་འབུ་ཡོད་བཞིན་པ་དང༌། ནད་གཞི་འདི་ཕོག་པའི་ནད་པ་གསར་པ་མི་གྲངས་ས་ཡ་ ༢་༢ ཡོད་ལུགས་འཁོད་ཡོད། ལོ་འདིའི་ནང་མི་གྲངས་ས་ཡ་ ༡་༧ ཙམ་རྐྱེན་འདས་སུ་གྱུར་ཡོད། གཉན་ནད་རེག་དུག་ནད་གཞི་ཕོག་པའི་མི་འབོར་ཕལ་མོ་ཆེ་ཡར་རྒྱས་འགྲོ་བཞིན་པའི་རྒྱལ་ཁབ་ནང་ཡོད་པར་ངོས་འཛིན་བྱེད་ཀྱི་ཡོད་རུང༌། ནད་གཞི་འདིས་སའི་གོ་ལ་འདིའི་ནང་གནས་བཞིན་པའི་ཕོ་མོ་རྒན་གཞོན་དབྱེར་མེད་ལ་ཉེན་ཚབས་ཆེ་བའི་ངོ་བོར་གྱུར་ཡོད། རང་རིགས་རྣམས་ས་གནས་གང་སར་ཁ་ཐོར་དུ་གནས་ཡོད་པ་དང༌། འཚོ་བའི་འདུ་འགོད་ཆེད་དབྱར་དགུན་མེད་པར་གྲོང་དང་གྲོང་བརྡལ་གང་སར་འགྲུལ་བཞུད་བྱེད་བཞིན་པར་སོང༌། རང་རེའི་སྤྱི་ཚོགས་ནང་ནད་གཞི་འདི་མངོན་མེད་དུ་སླེབས་གཞིའི་ཉེན་ཁ་ཡོད་པར་མངོན་བཞིན་ཡོད། ལྷག་པར་ HIV ནད་འབུ་འདི་བཞིན་ཐོག་མར་འགོས་ནས་ལོ་བཅུ་ཁྲག་གཅིག་རིང་མངོན་རྟགས་གང་ཡང་མེད་པར་སྡོད་ཀྱི་ཡོད་པར་སོང༌། ནད་འབུ་འགོས་ཡོད་མེད་བརྟག་དཔྱད་མ་བྱས་པར་ནད་རྟགས་གང་ཡང་མངོན་གྱི་མེད་པས་སྤྱི་ཚོགས་ནང་རང་བཞིན་སྣང་མེད་དུ་ཁྱབ་གདལ་འགྲོ་གཞིའི་བརྒྱུད་ལམ་འགའ་ཞིག་ཡོད་པ་དཔེར་ན། ཉེན་སྲུང་མེད་པའི་འཁྲིག་སྤྱོད་དམ་ལུས་འབྲེལ། ཕན་ཚུན་ཟུངས་ཁྲག་སྤྲོད་རེས། སྨན་ཁབ་བེད་སྤྱོད་མཉམ་སྤྱོད། གཟུགས་པོར་གཙག་ཁབ་འདྲ་མིན་མཉམ་སྤྱོད་བྱེད་པ།
ནད་གཞི་འགོས་ཟིན་པའི་ཨ་མ་ནས་མངལ་ཆགས་ཕྲུ་གུར་འགོས་ཀྱི་ཡོད། སྤྱིར་བཏང་ནད་གཞི་འདི་ཡོད་པ་མངོན་རྟགས་བྱུང་མ་ཐག་འཕྲོད་བསྟེན་སྨན་ཁང་བརྒྱུད་རྒྱ་གར་གཞུང་གི་གཉན་ནད་རེག་དུག་ལྟེ་གནས་ཁག་ནས་་བརྟག་དཔྱད་དང༌། སྨན་དུས་ཐོག་ཞུས་ཚེ་ནད་གཞི་ཇེ་སྡུག་ཏུ་མི་འགྲོ་བ་ཙམ་དུ་མ་ཟད། ལུས་སྟོབས་ཉམས་རྒུད་མ་སོང་བར་ཇི་སྲིད་བར་འཚོ་གནས་ཐུབ་ཀྱི་ཡོད། ལྷག་པར་སྤྱི་ཚོགས་ནས་གཉན་ནད་རེག་དུག་ནད་པར་མཐོང་ཆུང་དང་ཁྱད་གསོད་དབང་དུ་མ་སོང་བར་བྱམས་བརྩེའི་ཐོག་ནས་ལྟ་སྐྱོང་ངོས་ལེན་གནང་དགོས་པ་དང༌། ད་རིང་གཉན་ནད་རེག་དུག་ཉིན་མོ་སྲུང་བརྩི་ཞུ་ཆེད་འདི་གའི་ལམ་སྟོན་འོག་བོད་མིའི་གཏན་ཉིན་སློབ་གྲྭ་ཆེ་ཁག་ནང་འཛམ་གླིང་ཨེཌས་ཉིན་མོའི་བརྗོད་གཞི་དང་འབྲེལ་བའི་རྩོམ་བྲིས་དང་རི་མོ་འགྲན་བསྡུར་གོ་སྒྲིག་ཞུ་བཞིན་ཡོད་ཅིང༌། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་གཉན་ནད་རེག་དུག་ནད་གཞི་དང་འབྲེལ་བའི་བརྙན་འཕྲིན་ཞིག་གསར་བསྐྲུན་ཟིན་པ་དེ་རིང་དབུ་འབྱེད་གནང་གི་ཡོད་པས་ཚང་མས་ཐུགས་སྣང་དམ་ཟབ་ཡོང་བ་ཞུ་རྒྱུ་དང༌། འཕྲོད་བསྟེན་ལས་ཁུངས་ནས་འདི་ལོ་ཕྱི་ཟླ་བཅུ་གཉིས་ཧྲིལ་པོ་བཙན་བྱོལ་བོད་མིའི་སྤྱི་ཚོགས་ནང་གཉན་ནད་རེག་དུག་ནད་གཞི་དང་འབྲེལ་བའི་གོ་རྟོགས་ལས་འགུལ་སྤེལ་འཆར་ལགས་ན་ཚང་མས་ལས་དོན་འདིའི་ཐོག་ཕྱར་་གྲུ་མཉམ་འདེགས་ཡོང་བའི་འབོད་བསྐུལ་ནན་པོ་ཞུ་རྒྱུ་བཅས།།
