༢༠༡༢ ཟླ་ ༡༢ ཚེས་ ༡༠ རེས་གཟའ་ཟླ་བ།

༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༡༠ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་འབྲས་སྤུངས་བློ་གསལ་གླིང་གཙུག་ལག་ཁང་གི་མདུན་ཐང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་འགྲོ་བ་མིའི་ཐོབ་ཐང་ཉིན་མོ་དང་མགོན་པོ་གང་ཉིད་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ཧྲིལ་པོ་ ༢༣ འཁོར་བའི་ཉིན་མོ་སྲུང་བརྩིའི་མཛད་སྒོ་གཟབ་རྒྱས་ཚོགས་ཡོད།

དེ་ཉིན་སྔ་དྲོ་ཆུ་ཚོད་ ༩ ཐོག་སྲིད་སྐྱོང་བློ་བཟང་སེང་གེ་མཆོག་དང་ཕྱོགས་བཞུགས་བོད་མི་མང་སྤྱི་འཐུས་རྣམ་པ། སྐུ་མགྲོན་གཙོ་བོ་ཀར་ན་ཊ་ཀའི་མངའ་སྡེའི་གྲོས་ཚོགས་ཀྱི་འཐུས་མི་ V.S Patil མཆོག་དང་། VHP. Ex Persident Sh. Ashok Singhal མཆོག་དང་། དགའ་ལྡན་ཁྲི་རིན་པོ་ཆེ་མཆོག ཤར་བྱང་ཆོས་རྗེ་རྣམ་གཉིས་མཆོག ཆོས་སྡེ་ཁག་གི་མཁན་པོ་ལས་ཟུར་རྣམ་པ། མཚོ་སྣ་རིན་པོ་ཆེ་མཆོག ཀུན་བདེ་གླིང་རིན་པོ་ཆེ་མཆོག ཏེ་ལོ་རིན་པོ་མཆོག ལ་དྭགས་བླ་མ་ཆོས་འཕེལ་བཟོད་པ་མཆོག ས་གནས་ Karwarརྗོང་གི་རྗོང་དཔོན་དང་། ཉེན་རྟོག་སྤྱི་ཁྱབ་འགོ་འཛིན་གི་དབུས་པའི་རྒྱུན་དུ་བོད་མིའི་གཞིས་ལས་དང་འབྲེལ་ཡོད་ཡུལ་མིའི་ལས་ཁུངས་དང་གྲོང་སྡེ་ཁག་གི་འགོ་དཔོན་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་འཐུས་མི་དང་སེར་སྐྱ་མི་མང་སློབ་ཕྲུག་བཅས་མི་གྲངས་སྟོང་ཚོ་མང་པོ་ལྷན་འཛོམས་ཐོག་༸གོང་ས་མཆོག་བདེ་ཡངས་༸རྒྱལ་བའི་ཕོ་བྲང་ནས་གདན་ཞུས་ཀྱིས་ཧིན་བོད་གཉིས་ཀྱི་རྒྱལ་གླུ་དང་ཞི་བདེའི་བསྟོད་དབྱངས་འབུལ་ལམ་ཞུས་རྗེས།

ལྷོ་གཞིས་ཁག་གི་ལྷོ་སྤྱི་ཀརྨ་སེང་གེ་ལགས་ཀྱིས་དུས་དྲན་ངོ་སྤྲོད་ཀྱི་གསུང་བཤད་གནང་གྲུབ་མཚམས་བོད་མི་རིགས་དང་རྩ་དོན་སླད་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་མྱ་ངན་ངག་བཅད་སྐར་མ་གཅིག་ཞུས་གྲུབ་བསྟུན་ས་གནས་སུ་ཕྱོགས་བཞུགས་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་ཟིན་རྗེས་ཀ་ཎ་ཊ་ཁའི་མངའ་སྡེའི་གྲོས་ཚོགས་ཀྱི་འཐུས་མི་སྐུ་ཞབས། V.S Patil མཆོག་གིས་གསུང་བཤད་དང་ VHP. Ex Persident Sh. Ashok Singhal མཆོག་གིས་གསུང་བཤད་གནང་། དེ་ནས་ཀལ་མུག་སྤྱི་མཐུན་རྒྱལ་ཁབ་ཀྱི་སྲིད་འཛིན་མཆོག་གིས་༸གོང་ས་མཆོག་གིས་ནོ་བེལ་ཞི་བདེའི་གཟེངས་རྟགས་དགྱེས་བཞེས་མཛད་པའི་དུས་དྲན་ལ་གསུང་འཕྲིན་ཕུལ་ཡོད་པ་དེ་ཏེ་ལོ་རིན་པོ་ཆེ་མཆོག་ནས་སྒྲོགས་སྦྱང་ཞུས། དེ་རྗེས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཀའ་ཤག་གི་གསུང་བཤད་གནང་རྗེས་༸གོང་ས་མཆོག་གི་རླབས་ཆེན་མཛད་འཕྲིན་ལ་བཀའ་དྲིན་རྗེས་དྲན་མཚོན་ཆེད་དགེ་ལྡན་སྤྱི་ནས་དམིགས་བསལ་དྲན་རྟེན་ཞིག་དགའ་ལྡན་ཁྲི་རིན་པོ་ཆེ་མཆོག་གིས་འབུལ་ལམ་ཞུས་པ་དང་བསྟུན་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་ཆེ་བསྟོད་ཤིས་ཚིགས་སྙན་སྒྲོན་ཞུས་རྗེས་༸གོང་ས་མཆོག་གིས་ལམ་སྟོན་བཀའ་སློབ་སྩལ་ཟིན་མཚམས་མོན་གྷོ་འདོད་རྒུ་གླིང་གི་ལྷ་མོ་ཚོགས་པ་དང་སློབ་གྲྭ་ཁག མི་མང་བཅས་ཀྱིས་བཀྲ་ཤིས་རྟེན་འབྲེལ་མཚོན་ཆེད་གཞས་སྣ་རེ་རེ་གཟིགས་འབུལ་ཞུས་རྗེས་འདོད་རྒུ་གླིང་ས་གནས་འཐུས་ཚོགས་ཀྱི་ཚོགས་གཙོ་སྤྱི་ཟུར་གུ་རུ་རྒྱལ་མཚན་ལགས་ཀྱིས་ཐུགས་རྗེ་ཆེ་ཞུས་ཏེ་གཞུང་འབྲེལ་མཛད་སྒོ་རྒྱལ་ཁའི་ངང་གྲོལ།

དེ་བཞིན་ཕྱེད་ཡོལ་ཆུ་ཚོད་ ༡ ༸གོང་ས་མཆོག་གི་ལམ་རིམ་བཀའ་ཁྲིད་ཀྱི་ཆོས་འབྲེལ་མུ་མཐུད་བསྐྱངས་གནང་མཛད་ཡོད། ཆུ་ཚོད་ ༤ ཐོག་སྲིད་སྐྱོང་བློ་བཟང་སེང་གེ་མཆོག་དང་དགའ་ལྡན་ཁྲི་རིན་པོ་ཆེ་མཆོག་དབུ་བཞུགས་ཐོག་གྲོང་སྡེ་གསུམ་པར་གདུང་སེམས་མཉམ་སྐྱེའི་ལས་འགུལ་རྒྱ་ཆེ་ཞིག་སྤེལ་འཆར་ཡོད་འདུག་པ་བཅས།།