༢༠༡༢ ཟླ་ ༡༢ ཚེས་ ༤ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩ་ཁང་གིས་གོ་སྒྲིག་འོག་ ཕྱི་ལོ་ ༢༠༡༢ ཟླ་ ༡༢ ཚེས་ ༤ ནས་ ༦ བར་ཉིན་གྲངས་གསུམ་རིང་གངས་སྐྱིད་སྤྱི་ཐབ་ཚོགས་ཁང་དུ་བོད་མིའི་སྒྲིག་འཛུགས
་ ཀྱི་རྒྱ་གར་བྱང་ཕྱོགས་གཞིས་ཁག་གི་ས་གནས་འགོ་འཛིན་དང་། རྩིས་དྲུང་རྣམ་པར་ལས་དོན་འཆར་སྒྲིག་དང་བྱུས་བཀོད་ཀྱི་ཟབ་སྦྱོང་དབུ་འཛུགས་ གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༡༥ ཐོག་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཟབ་ སྦྱོང་དབུ་འབྱེད་ཀྱི་སྣང་གསལ་ཞལ་ཕྱེ་གནང་གྲུབ་མཚམས་དཔལ་འབྱོར་དྲུང་ཆེ་ འཕྲིན་ལས་རྒྱ་མཚོ་ལགས་ཀྱིས་འཚམས་འདྲི་ཞུས་པ་དང་ཆབས་ཅིག ཟབ་སྦྱོང་ངོ་སྤྲོད་ཀྱི་གསུང་བཤད་གནང། དེ་རྗེས་ཆོས་རིག་བཀའ་བློན་མཆོག་གིས་གསུང་བཤད་གནང་དོན།
ངས་བཀའ་ཤག་གི་ཚབ་ཞུས་ཏེ་ཕྱོགས་མཐའ་ཁག་ནས་ཕེབས་པའི་བྱང་ཕྱོགས་ཀྱི་ས་གནས་ འགོ་འཛིན་དང་རྩིས་དྲུང་རྣམ་པར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། གཞི་རྩའི་ང་ཚོ་ཚང་མར་འགན་ཆེན་པོ་ཞིག་ཡོད། སྒྲིག་འཛུགས་ཨ་མ་དེ་རྡ་རམ་ས་ལ་ཡིན་པ་ཚང་མས་མཁྱེན་གསལ་རེད། མངའ་སྡེ་དང་ས་གནས་མང་པོ་ཞིག་གི་ནང་སྒྲིག་འཛུགས་འདིའི་ཡན་ལག་གྲམ་ཡོད། རྡ་རམ་ས་ལ་འགོ་ཨ་མ་ནས་ཡན་ལག་ཚང་མ་ཚགས་ཚུད་དང་གྲ་སྒྲིག་པོ་དགོས་རྒྱུ་ཧ་ཅང་གལ་ཆེན་པོ་རེད། དེ་དག་གལ་ཆེར་རྩིས་ཏེ་རྣམ་པ་ཚོར་དེ་རིང་ཆེད་མངགས་ཉིན་གསུམ་རིང་གི་ཟབ་སྦྱོང་གོ་སྒྲིག་གནང་ཡོད། སྤྱིར་བཏང་བར་ལམ་སྒྲིག་འཛུགས་ཀྱི་ཟབ་སྦྱོང་གནང་རྒྱུ་གལ་ཆེན་པོ་རྩིས་བཞིན་ཡོད། གང་ཡིན་ཞེ་ན། ཉིན་ལྟར་ཆར་ཅན་ལས་ཀ་དང་། མི། ས་གནས་སོ་སོ་ཁོ་ནའི་ནང་གནས་བསྡད་ན་སྤྱིར་བསམ་བློ་གསར་པ་དང་། ཁོར་ཡུག ལས་འཆར་གསར་པ་བསྐྲུན་རྒྱུར་ཕྲན་བུར་ཆ་རྐྱེན་གྱི་ཆ་ནས་ཚང་གི་མེད། དེར་བརྟེན་ཆེད་ལས་པ་མཁས་དབང་ག་ས་ག་ནས་གདན་ཞུས་ཀྱིས་ཟབ་སྦྱོང་སྤྲད་ན་ཚང་མར་ བསམ་བློ་གསར་པ་དང་ཁོར་ཡུག་གསར་པ་བསྐྲུན་རྒྱུའི་ཁེ་ཕན་ཡོད་པར་བརྟེན། བར་ལམ་ནས་འགོ་བཀའ་ཤག་གི་བཀའ་བློན་རྣམ་པས་གཙོས་ཚང་མར་ཟབ་སྦྱོང་མུ་མཐུད་གནང་བཞིན་ཡོད། གཉིས་ནས་ང་ཚོ་ཚང་མས་མཁྱེན་གསལ་རེད། ཁྱེད་ཚོ་གཞོན་སྐྱེས་རྣམ་པ་མ་འོངས་པར་འགན་འཁྱེར་མཁན་རྐང་ལྟ་བུ་ཆགས་ཡོད།
ལྷག་པར་བར་ལམ་བོད་ནང་རྒྱལ་ཁབ་དང་མི་རིགས་ཀྱི་དོན་དུ་བློས་གཏོང་གནང་ནས་མི་ རེ་རེ་བྱས་ཏེ་འདས་གྲོངས་སུ་གྱུར་སྐབས་ང་ཚོའི་སེམས་ནང་དངངས་འཚབ་ཧ་ཅང་ཡོང་གི་འདུག དེར་བརྟེན་བོད་ནང་ཛ་དྲག་གི་གནས་སྟངས་ཐོག་ང་ཚོས་གོ་བསྡུར་ཡང་ཡང་བྱེད་བཞིན་ཡོད། འོན་ཀྱང་ང་ཚོ་སོ་སོའི་ལུང་པ་ཤོར་ནས་མིའི་ལུང་པར་ཡོད་སྟབས། ལམ་སེང་བྱེད་རྒྱུ་གང་ཡང་མེད་པ་ལྟ་བུའི་ཚོར་སྣང་བྱུང་སྟབས། ང་ཚོར་དངངས་སྐྲག་ཆེན་པོ་དང་ཛ་དྲག་གི་གནས་སྟངས་འོག་གནས་ཡོད། ཉེ་ཆར་འཛམ་གླིང་རྒྱལ་སྤྱིའི་ཐོག་ཆ་བཞག་ན་རྒྱ་ནག་ནང་འགོ་ཁྲིད་འཕོ་གྱུར་བྱུང་བ་རེད། འགྱུར་བ་དེ་བཟང་ཕྱོགས་དང་ངན་ཕྱོགས་གང་གི་ཕྱོགས་སུ་འགྲོ་རྒྱུར་ང་ཚོས་ད་ལྟ་ ཚོད་དཔག་བྱེད་ཐུབ་རྒྱུ་ཧ་ཅང་ཁག་པོ་རེད། དེ་བཞིན་ང་ཚོ་བཞིན་པེ་ལི་སི་ཊི་ནེན་(Palestinian)ལ་མཉམ་འབྲེལ་རྒྱལ་ཚོགས་ནང་ ༼non member observer status ༽ ཟུར་ཉན་རྒྱལ་ཁབ་ཀྱི་ཐོབ་ཐང་རག་ཡོད། ཁོང་ཚོ་ཡང་ལོ་མང་རིང་དཀའ་ངལ་ཧ་ཅང་ཆེན་པོ་ཞིག་འཕྲད་དེ་ལོ་ནས་ལོ་གཏུད་དེ་དཀའ་ ལས་བརྒྱབ་པར་བརྟེན། ད་ཆ་གྲུབ་འབྲས་ཐོན་པ་འདི་ཁོང་ཚོར་གཟི་བརྗིད་ཞིག་ཆགས་ཡོད། ང་ཚོར་ཡང་སོ་སོའི་འཇོན་ཚོད་ལ་དཔག་པའི་འགན་ཞིག་ཡོད། འགན་དེ་དག་སོ་སོའི་འཁྱེར་དགོས་པ་མ་གཏོགས་མི་གཞན་ཞིག་ནས་འགན་དེ་འཁྱེར་གྱི་མ་རེད། ཁྱེད་ཚོ་མང་ཆེ་བ་གཞོན་སྐྱེས་རེད་འདུག ཁྱེད་རང་ཚོར་འགན་ཆེན་པོ་ཞིག་ཡོད། དེར་བརྟེན་འགན་ཆེན་པོ་ཡོད་རེད། རྐུབ་སྟེགས་སྟེང་བསྡད་དེ་བསམ་བློ་བཏང་ སྟེ་ཁ་ནས་བཤད་པ་ཙམ་གྱི་དོན་དག་སྒྲུབ་ཀྱི་མེད། ལག་ལེན་བསྟར་དགོས་ཀྱི་ཡོད། ལག་བསྟར་གང་བྱེད་དགོས་མིན་ང་ཚོས་གྲོས་བསྡུར་བྱེད་དགོས། ད་ལྟ་དུས་རབས་ ༢༡ འགྲོ་གི་ཡོད། ད་གིན་དཔལ་འབྱོར་དྲུང་ཆེས་གསུངས་པ་བཞིན་རེད།
ཁ་སེང་ང་ཚོའི་རོགས་ཚོགས་རྣམས་དང་ལྷན་བཀའ་མོལ་བྱུང་། ཆར་ཅན་ལས་འཆར་དེ་ག་རང་འཁྱེར་ནས་འགྲོ་རྒྱུ་དེ་ཏག་ཏག་ཅིག་བསྡད་ཀྱི་མི་འདུག ཁོང་ཚོ་ཕར་ཕྱིན་ནས་མི་ལ་རོགས་དངུལ་སློང་ཆེད་འགྲེལ་བཤད་རྒྱག་སྐབས་མི་དེ་ཡིད་ ཆེས་སུ་འཇུག་སྟེ་རོགས་དངུལ་རག་པ་འདིར་གཏོང་གི་ཡོད། ད་ལྟ་ཁོང་ཚོས་འཆར་གཞི་གསར་པ་དགོས་ཞེས་གསུངས་ཀྱི་འདུག འཆར་གཞི་གསར་པ་ཆེད་བསམ་བློ་དང་ལས་འཆར་གསར་པ་ཞིག་དགོས་ཀྱི་ཡོད། ཅེས་སོགས་ཀྱི་གསུང་བཤད་གནང་བ་དང་སྦྲགས་ཆོས་རིག་བཀའ་བློན་མཆོག་གིས་བཀའ་ཤག་ གི་ལྟ་གྲུབ་གསུམ་གྱི་སྐོར་གསུང་བཤད་གནང་ཡོད་པ་མ་ཟད། ཟབ་སྦྱོང་བ་རྣམས་ལ་ཉིན་གསུམ་རིང་གི་ཟབ་སྦྱོང་འདི་དོན་སྙིང་ལྡན་པ་ཞིག་ཡོང་བ་བྱེད་རོགས། ཞེས་གསུང་བཤད་གནང་ཡོད། དེ་རྗེས་དཔལ་འབྱོར་ལས་ཁུངས་ཀྱི་ཟུང་དྲུང་དབང་འདུས་ཚེ་རིང་ལགས་ཀྱིས་ཐུགས་ རྗེ་ཆེ་ཞུའི་གསུང་བཤད་གནང་ཡོད། ཐེངས་འདིའི་ཟབ་སྦྱོང་ཐོག་བྱང་ཕྱོགས་གཞིས་ཆགས་ཁག་གི་ས་གནས་འགོ་འཛིན་དང་རྩིས་ དྲུང་བཅས་ཁྱོན་མི་གྲངས་ ༢༧ ཙམ་མཉམ་ཞུགས་གནང་ཡོད། ཟབ་ཁྲིད་པའི་ཁོངས་སུ་བོད་མིའི་སྒྲིག་འཛུགས་འཆར་འགོད་ལས་ཁུངས་ཀྱི་འགན་འཛིན་ དྲུང་འཕར་དཀོན་མཆོག་བརྩོན་འགྲུས་ལགས་དང་མཁས་དབང་ལྕམ་ས་ལི་ལ་པཊ་ཀར་(Saleela Patkar)ལགས་རྣམ་གཉིས་ཡིན་འདུག་པ་བཅས།།
