༢༠༡༢ ཟླ་ ༡༢ ཚེས ༧ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༧ ཉིན་འདི་གར་ཁུངས་ལྡན་གནས་ཚུལ་སྔ་རྗེས་འབྱོར་བ་དང་ཁུངས་ལྡན་བརྙན་འཕྲིན་ལག་སོན་བྱུང་བ་ལྟར་ན། ཕྱི་ལོ་ ༡༩༨༨ ལོ་ནས་བཟུང་སྔ་རྗེས་སུ་བཙོན་བཅུག་དང་སྡུག་སྦྱོང་ཚད་མེད་ཕོག་པའི་ཆབ་སྲིད་བཙོན་ཟུར་འབྲས་སྤུངས་དགོན་པའི་དགེ་འདུན་པ་བློ་བཟང་དབང་ཕྱུག་ལགས་ཕྱི་ལོ་ ༢༠༠༨ ལོར་སླར་ཡང་འཇུ་བཟུང་བྱས་རྗེས་དུས་ཡུན་ལོ་གཉིས་ཙམ་བཙོན་འཇུག་བྱས་རྗེས་ལུས་པོ་གཅོང་ཅན་དུ་གྱུར་རྗེས་གློད་བཀྲོལ་བཏང་ཡང་དགོན་པ་ནས་ཕྱིར་ཕུད་བྱས་པ་དང༌། ཁོང་གི་ཐེམ་ཐོ་དགོན་པ་ནས་ཁོང་གི་སྐྱེས་ཡུལ་བར་བསྐོར་ཨུ་ཡོན་ལྷན་ཁང་ཁོངས་བསྒྱུར་ཐབས་བྱ་སྐབས་ཨུ་ཡོན་ལྷན་ཁང་ནས་ཆབ་སྲིད་ཀྱི་གནད་དོན་ཡོད་རྐྱེན་ཁས་ལེན་བྱ་ཐབས་མེད་པ་བརྗོད་རྐྱེན་རང་ཁྱིམ་དུ་ལོག་ཡུལ་མེད་པར་ལྷ་སའི་པ་རིའི་ཁུག་ཁུལ་དུ་ཁང་པ་གླས་ཏེ་རང་འཚོ་ཐུབ་ཐབས་བྱ་བཞིན་ཡོད་ཀྱང༌། ལྷ་སའི་ནུབ་ཕྱོགས་མངགས་གཏོང་ཁང་སོགས་ནས་རྟག་ཏུ་འདྲི་གཅོད་དང་བསུན་གཙེར་ཐེངས་མང་བཟོ་བཞིན་ཡོད་པ་མ་ཟད། བཙོན་དུ་སྔ་རྗེས་ཚུད་སྐབས་ཉེས་བརྡུང་རྐྱེན་པས་ལུས་པོ་གཅོང་ཅན་དུ་གྱུར་ཟིན་པ་སོགས་ལས་གནས་སྟངས་ཧ་ཅང་སྐྱོ་པོའི་ཐོག་ལུས་ཡོད་པའི་གནས་ཚུལ་ཐོན་འདུག
ལྷག་པར་ཕྱི་ལོ་ ༢༠༠༨ ལོར་འཛིན་བཟུང་སྐབས་ཉེས་བརྡུང་ཕོག་རྐྱེན་རྐང་པ་སྐྱོན་ཅན་བཟོས་ཡོད་པ་ཉེ་དུས་འདི་གར་ཁུངས་ལྡན་བརྙན་འཕྲིན་ཞིག་ལག་སོན་བྱུང་བའི་ནང་ལྷ་ས་གྲོང་ཁྱེར་སྤྱི་བདེ་ཚན་པའི་འདྲི་གཅོད་མི་སྣས་འདྲི་གཅོད་སྐབས་ཀྱི་བརྙན་དཔར་ལས་ཧ་ཅང་གསལ་པོ་ར་འཕྲོད་ཡོང་གི་འདུག
བློ་བཟང་དབང་ཕྱུག་གམ་ཆོས་མིང་འཇམ་དཔལ་བློ་གསལ་ལགས་ནི་ཕྱི་ལོ་ ༡༩༦༦ ལོ་ཙམ་དུ་ལྷ་སར་འཁྲུངས་པ་དང༌། ཕ་ཚེ་ལས་འདས་ཟིན་ཅིང༌། མ་མིང་ལ་རིག་འཛིན་སྒྲོལ་མ་ཞུ་གི་ཡོད། ཁོང་ཆུང་དུས་དེ་སྔ་ལྷ་སར་ཡོད་པའི་གོར་ཁ་སློབ་གྲྭ་དང༌། རིམ་པས་ལྷ་ས་སློབ་ཆུང་དང་པོ་སོགས་སུ་བསྐྱོད་དེ་སློབ་གཉེར་བྱ་མྱོང་ཡོད་ཅིང༌། རྗེས་སུ་ལྷ་ས་སློབ་ཆུང་དང་པོའི་དགེ་རྒན་ལོ་བཞི་ཙམ་གནང་མྱོང་ཡོད། ཁོང་ནས་རྒྱ་བོད་ཡིག་རིགས་གཉིས་ཤེས་པའི་ཐོག་གོར་ཁའི་སྐད་ཡིག་ཤེས་པ་མ་ཟད། དབྱིན་ཡིག་ཀྱང་ཕྲན་བུ་ཤེས་ཀྱི་ཡོད། ཕྱི་ལོ་ ༡༩༨༥ ལོ་ཙམ་དུ་ཁོང་འབྲས་སྤུངས་དགོན་པར་ཆོས་ཞུགས་གནང་རྗེས་སྐབས་དེར་འབྲས་སྤུངས་སུ་ཞུགས་པའི་རྒན་ལམ་རིམ་རིན་པོ་ཆེའི་གསོལ་དཔོན་དང་དྲུང་ཡིག་གཅིག་ལྕོགས་ཀྱི་ཞབས་ཞུ་གནང་ཡོད། ཕྱི་ལོ་ ༡༩༨༨ ལོར་ལྷ་སར་སྨོན་ལམ་ཆེན་མོའི་སྐབས་ཆབ་སྲིད་ཀྱི་ལས་འགུལ་སྤེལ་བའི་ཉེས་མིང་འོག་སྤྱི་བདེ་ཉེན་རྟོག་པས་འཛིན་བཟུང་བྱས་རྗེས་མགོ་བོར་དབྱུག་པ་བཞུས་པ་སོགས་ཉེས་བརྡུང་ཚད་མེད་བཏང་རྗེས་མགོ་ཡུར་འཁོར་བ་དང་མིག་མི་གསལ་བ་སོགས་བྱུང་སྟེ་གསང་ཡིབ་ཁྲུའུ་བཞི་པའི་ལྟ་སྲུང་ཁང་ནས་ནོར་བུ་གླིང་ཁའི་ཉེ་འཁྲིས་སུ་ཡོད་པའི་བཟོ་པའི་སྨན་ཁང་དུ་བསྐྱལ་ཏེ་དེར་ཟླ་བ་གསུམ་ཙམ་རིང་སྨན་བཅོས་བྱ་དགོས་བྱུང་བ་དང༌། མཐར་སྨན་ཁང་ནས་ཐོན་རྗེས་གཟུགས་བབས་ཆ་ནས་འཛིན་བཟུང་མ་བྱས་པར་མུ་མཐུད་དགོན་པར་རྒན་ལམ་རིམ་རིན་པོ་ཆེའི་ཞབས་ཞུ་མུ་མཐུད་གྲུབ།
ཕྱི་ལོ་ ༢༠༠༨ ལོའི་ཟླ་ ༣ ཚེས་ ༡༠ ཉིན་འབྲས་སྤུངས་དང་སེ་རའི་དགེ་འདུན་པ་ཚོས་སྔ་རྗེས་སུ་ཞི་བའི་སྐད་འབོད་གནང་བ་སོགས་ལ་བརྟེན་འབྲས་སྤུངས་དགོན་པར་སྤྱི་བདེ་དང་དྲག་ཆས་ཉེན་རྟོག་པ་ཡོང་སྟེ་དགེ་འདུན་ཁྱོན་ཆེ་འཛིན་བཟུང་དང་གྲྭ་ཤག་གང་བྱུང་བསྔོག་བཤེར། ཕྱོགས་མཐའ་ནས་ཡོང་བའི་དགེ་འདུན་པ་ཕ་ཡུལ་དུ་ཕྱིར་ལོག་བཏང་བ་སོགས་བྱེད་སྐབས་བློ་བཟང་དབང་ཕྱུག་ལགས་ཀྱང་འཛིན་བཟུང་བྱས་ཡོད་པ་དང༌། ཁོང་འཛིན་བཟུང་བྱས་རྗེས་ྋགོང་ས་མཆོག་གི་སྐུ་པར་དད་ཉར་གནང་བ་དང༌། བཀའ་སློབ་འཁོར་ཐག་ཉར་བ་སོགས་ཉེས་མིང་དུ་བརྩིས་ཏེ་ལོ་གཉིས་རིང་གཞིས་ཀ་རྩེ་ས་ཁུལ་ཉ་རི་བཙོན་ཁང་དུ་བཙོན་བཅུག་བྱས་པ་དང་གློད་བཀྲོལ་བཏང་རྗེས་དགོན་པ་ནས་ཕྱིར་འབུད་བཏང་བ་ཞིག་ཡིན་པ་རེད། ཁོང་ལྟ་བུ་སྔ་རྗེས་ཐེངས་གཉིས་ཙམ་བཙོན་དུ་ཚུད་པ་དང་ཉེས་བརྡུང་ཕོག་སྟེ་ལུས་པོ་གཅོང་ཅན་དུ་གྱུར་རྗེས་དགོན་པ་ནས་ཕུད་པ་དང་རང་གི་སྐྱེས་ཡུལ་ཁྱིམ་དུ་ལོག་ཐབས་མེད་པར་གནས་སྟངས་སྐྱོ་པོའི་འོག་མུ་མཐུད་དཀའ་སྡུག་སྣ་ཚོགས་མྱངས་དང་མྱོང་བཞིན་ཡོད་པ་ནི་ཁོང་ཙམ་མ་ཡིན་པར་བོད་ཁྱོན་ཡོངས་ཀྱི་ཆབ་སྲིད་བཙོན་པ་ཚོར་བཙོན་ཁང་ནང་སྡོད་རིང་ཙམ་མ་ཡིན་ར་པར་བཙོན་ནས་གློད་བཀྲོལ་རྗེས་སུ་ཡང་མུ་མཐུད་འཕྲད་བཞིན་པའི་དཀའ་ངལ་ཞིག་ཆགས་ཡོད་པ་རེད།།
