༢༠༡༢ ཟླ་ ༡༢ ཚེས་ ༤ རེས་གཟའ་མིག་དམར།

༄༅། །བོད་ནང་ད་བར་བོད་མི་གྲངས་ ༩༠ ལྷག་གིས་རང་ལུས་མེར་སྲེག་བཏང་བ་མ་ཟད། རང་ལུས་མེར་སྲེག་བཏང་བའི་ཛ་དྲག་གི་གནས་སྟངས་མུ་མཐུད་གནས་བཞིན་ཡོད། ཕྱི་ལོ་ ༢༠༡༢ ལོར་བོད་མི་གྲངས་ ༧༧ གྱིས་རང་ལུས་མེར་སྲེག་བཏང་ཡོད་པའི་ཁོངས་ནས་ལོ་འདིའི་ཕྱི་ཟླ་ ༡༡ ནང་རང་ལུས་མེར་སྲེག་གཏོང་མཁན་བོད་མི་གྲངས་ ༢༨ བྱུང་ཡོད་པ་དེ་ལྟར་ནའང་། རྒྱ་ནག་གཞུང་གིས་བོད་མིའི་ཐོག་དྲག་གནོན་མུ་མཐུད་བྱེད་བཞིན་པར་བརྟེན། བོད་མིའི་སྒྲིག་འཛུགས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་དེར་གདུང་སེམས་མཉམ་སྐྱེའི་རྒྱབ་སྐྱོར་ཐོབ་ཆེད་འཛམ་གླིང་རྒྱ་ཁྱབ་ཏུ་གོ་རྟོགས་ལས་འགུལ་མུ་མཐུད་སྤེལ་རྒྱུའི་ཆ་ཤས་སུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་ཕྱི་ལོ་ ༢༠༡༢ ཟླ་ ༡༢ ཚེས་ ༥ རེས་གཟའ་ལྷག་པའི་ཉིན་བོད་མིས་རང་ལུས་མེར་སྲེག་བཏང་བའི་སྐོར་བརྙན་འཕྲིན་སྐར་མ་བཅུ་ཅན་ཞིག་དང་། དྲ་རྒྱ་མེག་ཀོ་རོ་ས་ཡི་ཊི་ microsite དེ་བཞིན་ངོ་དེབ་ཀྱི་ཤོག་ངོས་ཕེ་སི་བུཀ་པེ་ཇི་ Facebook page ཞེས་གསར་བསྐྲུན་བྱས་པ་དེ་ཡང་ཉིན་དེར་དཔལ་ལྡན་སྲིད་སྐྱོང་མཆོག་གིས་དབུ་འབྱེད་གནང་སྟེ་བོད་དོན་ཐོག་རྒྱལ་སྤྱིའི་རྒྱབ་སྐྱོར་ཇེ་ཆེར་རག་ཐབས་གནང་རྒྱུ་ཡིན་འདུག རྒྱལ་སྤྱིའི་སྤྱི་ཚོགས་ཀྱིས་བོད་ནང་ཛ་དྲག་གི་གནས་སྟངས་དེར་ཡར་ལན་གང་ཡང་མ་བྱས་པར་བཏང་སྙོམས་སུ་འཇོག་མི་རུང་།

སྲིད་གཞུང་ཁག་དང་རྒྱལ་སྤྱིའི་སྒྲིག་འཛུགས་ཁག འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ། དེ་བཞིན་མི་སྒེར་བཅས་ཀྱིས་རྒྱ་ནག་གཞུང་ལ་གྲོས་མོལ་གྱི་ལམ་ནས་བོད་ཀྱི་གནད་དོན་སེལ་དགོས་པའི་རེ་འདུན་འདོན་རྒྱུའི་ལས་འགུལ་ཤུགས་ཆེ་རུ་བཏང་བ་ཡིན་ན་ནུས་པ་ཞིག་ཐོན་ངེས་ཡིན། བོད་མི་རང་ལུས་མེར་སྲེག་གཏོང་མཁན་རྣམས་ཀྱིས་༸གོང་ས་མཆོག་བོད་དུ་གདན་འདྲེན་ཞུ་དགོས་པ་དང་། བོད་ལ་རང་དབང་དགོས་པའི་འབོད་ཚིག་སྒྲོག་བཞིན་ཡོད།།