༢༠༡༢ ཟླ་ ༡༢ ཚེས་ ༡༠ རེས་གཟའ་ཟླ་བ།
༄༅།།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་ ༢༣ འཁོར་བའི་དུས་དྲན་དང་འགྲོ་བ་མིའི་ཐང་ཉིན་མོའི་མཛད་སྒོ་དེ་བཞིན། ཕྱི་ལོ་ ༢༠༡༢ ཟླ་ ༡༢ ཚེས་ ༡༠ རེས་གཟའ་ཟླ་བའི་སྔ་དྲོ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་དུ་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་དབུས་ཕྱག་སྦྲེལ་ཁྲིམས་ཞིབ་པ་གཞན་རྣམ་གཉིས་མཆོག་དང། སྲིད་ཚབ་མཆོག་གིས་གཙོས་ཕྱག་སྦྲེལ་བཀའ་བློན་རྣམ་པ། སྤྱི་འཐུས་ཚོགས་གཙོ་མཆོག་གིས་དབུས་ཕྱག་སྦྲེལ་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ། རྒྱ་གར་དང་བོད་རིགས་གསར་འགོད་པ། དེ་བཞིན་གཉུག་མར་གནས་པ་དང་གློ་བུར་དུ་ལྷག་པའི་བོད་མི་སེར་སྐྱ་རྒན་དར་གཞོན་གསུམ་སོགས་ཁྱོན་མི་གྲངས་སུམ་སྟོང་བརྒལ་བ་འདུ་འཛོམས་ཀྱིས་ཐོག་མར་བོད་ཀྱི་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པར་སྲིད་སྐྱོང་མཆོག་གིས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེངས་འཛུགས་གནང་ཡོད། དེ་རྗེས་བོད་ཕྱི་ནང་གཉིས་སུ་རང་ལུས་མེར་སྲེག་བཏང་བའི་རྒྱལ་གཅེས་པ་ཕོ་མོ་རྣམས་ལ་མྱ་ངན་གུས་འདུད་མཚོན་ཆེད་ངག་བཅད་སྐར་མ་གཅིག་ཞུས་གྲུབ་མཚམས།
བོད་ཀྱི་ཟློས་གར་ཚོགས་པས་ནོ་བེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་ཡོད།
དེ་རྗེས་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་ནས་ལས་བྱེད་བགྲེས་ཡོལ་ཐོན་པ་བཞི་དང་། འཕྲོད་བསྟེན་ལས་ཁུངས་ནས་འཕྲོད་བསྟེན་ཁྱབ་ཁོངས་ལས་བྱེད་པས་གཙོས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ཞབས་ལོ་ ༢༥ འཁོར་བའི་ལས་བྱེད་ཁག་གཅིག་ལ་འཕྲོད་བསྟེན་ལས་ཁུངས་ཀྱིས་དོ་དག་ལས་བྱེད་རྣམ་པ་ངོ་སྤྲོད་གནང་བ་དང་འབྲེལ་སྲིད་ཚབ་མཆོག་གིས་ལེགས་མཚོན་བྱ་དགའ་གནང་། དེ་ནས་བོད་མི་མང་སྤྱི་འཐུས་ཚོགས་ཚོགས་གཙོ་མཆོག་གིས་རྒྱལ་སྤྱིའི་ཆ་འཕྲིན་གསར་ཁང་ནས་ THE TIBET POST ཞེས་པའི་དབྱིན་ཡིག་ཚགས་པར་འདོན་སྤེལ་ཞུ་རྒྱུའི་ཚགས་པར་དབུ་འབྱེད་གནང།
དེ་རྗེས་ཆེས་མཐོའི་ཁྲིམས་ཞིབ་པ་ཆེ་བ་མཆོག་གིས་བོད་ཀྱི་ཟློས་གར་ཚོགས་པས་ཕྱི་ལོ་ ༢༠༡༢ ལོར་གསར་འདོན་ཞུས་པའི་འོད་སྡེར་ཁག་གཅིག་དབུ་འབྱེད་གནང་རྗེས། སྲིད་ཚབ་མཆོག་གིས་ཕྱི་དྲིལ་ལས་ཁུངས་ཀྱིས་ཕྱོགས་སྒྲིག་པར་བསྐྲུན་ཞུས་པའི་(འབར་བཞིན་པའི་བོད།)ཅེས་པའི་དཔེ་དེབ་དབུ་འབྱེད་གནང་གྲུབ་རྗེས་བཀའ་ཤག་གི་གསུང་བཤད་གནང། དེ་ནས་བོད་མི་མང་སྤྱི་འཐུས་ཚོགས་གཙོ་མཆོག་གིས་སྤྱི་འཐུས་ཀྱི་གསུང་བཤད་གནང། དེ་ནས་ཧིན་བོད་མཛའ་འབྲེལ་ཚོགས་པས་བོད་དོན་ཐོག་གདུང་སེམས་མཉམ་སྐྱེ་མཚོན་ཆེད་བོད་ཕྱི་ནང་གཉིས་ཀྱི་ནང་ད་བར་བོད་བསྟན་སྲིད་དང་མི་རིགས། རང་
དབང་གི་དོན་དུ་ལུས་སྲོག་ལོངས་སྤྱོད་བློས་གཏོང་གནང་མཁན་གྱི་རྒྱལ་གཅེས་པ་ཕོ་མོ་འདས་གསོན་ཡོངས་ཀྱི་ཆེད་མཆོད་འབུལ་སྨོན་ལམ་ཚོགས་ཡོད། བོད་ཀྱི་ཟློས་གར་ཚོགས་པ་ནས་མངའ་རིས་སྦར་སྐྱོག་གི་འཁྲབ་གཞས་བསྟན་པ་རྒྱལ་མཚན་ཞེས་པ་དང། བོད་ཀྱི་ཟློས་གར་ཚོགས་པ་ནས་འབའ་གཞས་སྦ་ཝ་སྐྱིད་པའི་ཆོས་གླིང་ཞེས་པ། དཔེ་སྟོན་སློབ་གྲྭ་ནས་དབུས་ཁུལ་གྱི་བྲོ་གཞས་མི་རིགས་ཚེ་རིང་མ་ལ་ཞེས་པ། བོད་ཁྱིམ་ཉིན་སློབ་ནས་ཨོཾ་མ་ཎི་པདྨེ་ཧཱུྃ།ཞེས་པ། དེ་བཞིན་ཡོངས་གླིང་སློབ་གྲྭ་ནས་རང་གཞུང་གཅེས་འཛིན་ཞེས་པའི་གཞས་སྣ་ཁག་བསྟན་ཡོད། མཛད་སྒོའི་མཐའ་མར་དེར་འདུས་མང་ཚོགས་ཀྱིས་བདེན་ཚིག་སྨོན་ལམ་གསུང་འདོན་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས།།
