༢༠༡༢ ཟླ་ ༡༢ ཚེས་ ༡༣ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་སྒྲུབ་རྒྱུད་ཉི་མ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༡༣ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་འབྲས་སྤུངས་ཚོགས་ཆེན་དུ་བྱང་ཆུབ་ལམ་རིམ་གོ་སྒྲིག་ལྷན་ཚོགས་དང་། རི་བོ་དགེ་ལུགས་པ་སྤྱི། མོན་གྷོ་སེར་སྐྱ་མི་མང་བཅས་ནས་༸གོང་ས་མཆོག་ལ་བཀའ་དྲིན་གཏང་རག་མཚོན་ཆེད་མདོ་ལུགས་ཀྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུ་སྐབས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན།
དེ་རིང་འདིར་བརྟན་བཞུགས་གནང་རྒྱུ་བྱས། འདི་གར་དགའ་ལྡན་ཁྲི་རིན་པོ་ཆེ་མཚུངས་མེད་ཆོས་ཀྱི་རྗེ་འཇམ་མགོན་༸རྒྱལ་བའི་རྒྱལ་ཚབ་ཐུབ་བསྟན་ཉི་མའི་ཞལ་སྔ་ནས་དབུ་མཛད་དེ་ཆོས་རྗེ་རྣམ་པ་གཉིས་དང་། སེར་འབྲས་དགེ་གསུམ་གྱི་མཁན་པོ་ལས་ཟུར། ཆེན་པོ་ཧོར་གྱི་མཁན་པོ་དང་ཁྱེད་རང་ཚོ་མང་པོ་ཞིག་འདིར་འཛོམས་ཏེ་བརྟན་ཞུགས་གནང་གི་ཡོད་པར་ཐུགས་རྗེ་ཆེ་ཞུ་གི་ཡིན། འབྲས་སྤུངས་ཚོགས་ཆེན་འདི་འགོ་སྟོད་བརྒྱབ་པ་སྔ་ཤོས་ཞིག་རེད། དེའི་གཡས་གཡོན་ཕྱིས་སུ་བརྒྱབ་པ་དེ་དག་ཆེ་བ་དང་རྫིག་པ། སྤུས་དག་པ་ང་ཚོ་འཇིག་རྟེན་ཁ་དཔེ་དང་༸གོང་ས་ལྔ་པ་ཆེན་པོའི་རྣམ་ཐར་ནང་དུའང་གསུང་ཡོད་སྤྱི་རྟ་སྒལ་རལ་ཟེར་བ་ལྟར་སྤྱི་པའི་རྟ་ཕོ་དེ་སྒལ་པ་རལ་ཡོད། ཅེས་གསུངས་པ་བཞིན། གང་ལྟར་ཚོགས་ཁང་འདི་བྱིན་རླབས་ཅན་ཞིག་ཡིན། སྔ་མ་རྒན་པདྨ་རྒྱལ་མཚན་བཞུགས་པའི་སྐབས་ཐུགས་འཁུར་བསྐྱེད་པ་དེ་འདྲ་ཡིན། ངོས་ཀྱིས་འདིའི་ནང་རྒྱལ་སྟོང་པའི་ཞལ་ལུང་དང་མང་པོ་ཞིག་བཏོན་པ་རེད།
ངོས་རང་ཡང་ཚོགས་ཁང་འདིའི་ནང་ཆོས་འབྲེལ་དེ་འདྲ་ཞུས་ཏེ་ཧ་ཅང་ཞལ་དྲོ་པོ་ཡིན། དེ་རིང་འདིར་ཆོས་འབྲེལ་གལ་ཆེན་པོ་ཞིག་དུམ་བུ་གཅིག་ཚར་བ་རེད། མཇུག་ཏུ་བརྟན་བཞུགས་གནང་སྟེ་ཕྱི་ནང་གང་ཅི་ནས་རྟེན་འབྲེལ་ཕུན་སུམ་ཚོགས་པོ་སྒྲིག་རྒྱུ་ཞིག་ཆགས་ཡོད། ཁྱེད་རྣམ་ཚང་མས་ཐུགས་སྨོན་མཚམས་སྦྱོར་གནང་རོགས་གནང་། ངོས་ཀྱི་ངོས་ནས་ཆ་བཞག་ནའང་ཐམས་ཅད་མཁྱེན་པ་དགེ་འདུན་རྒྱ་མཚོ་འབྲས་སྤུངས་སུ་ཕེབས་པ་ནས་བཟུང་དཔལ་ལྡན་འབྲས་དཀར་སྤུངས་པར་ཐུན་མོང་མ་ཡིན་པའི་འབྲེལ་བ་ཡོད། ཅེས་གསུངས་ཡོད་ལ་ངོས་དེའི་སྐྱེ་ཕྲེང་ཞིག་རེད། དེར་བརྟེན་དེ་རིང་ཉིན་མཐའ་མ་དེར་དཔལ་ལྡན་འབྲས་དཀར་སྤུངས་པའི་ཚོགས་ཆེན་འདུ་ཁང་ནང་དུ་བརྟན་བཞུགས་ཁྱེད་རང་ཚོས་གནང་། ངོས་ཀྱིས་ཀྱང་སྨོན་ལམ་རྒྱག་རྒྱུའི་གོ་སྐབས་བྱུང་བ་ཧ་ཅང་ཡག་པོ་བྱུང་། ཚང་མར་ཐུགས་རྗེ་ཆེ་ཞུ་རྒྱུ་ཡིན། བདུན་ཕྲག་གཉིས་ལྷག་ཙམ་རིང་འབྲེལ་ཡོད་ཚང་མས་ཧུར་ཐག་འབད་ཐག་གནང་བར་ཐུགས་རྗེ་ཆེ་ཞུ་གི་ཡིན། ཡང་ལོ་རྗེས་མ་ལམ་རིམ་འཕྲོས་དེ་དག་སེ་ར་ཆོས་སྒར་དུ་བྱ་རྒྱུའི་རྩིས་རེད། ཡང་ང་ཚོ་རྗེས་སུ་མཇལ་ཐུབ་རྒྱུ་རེད། དེ་ནས་ཕྱི་ཟླ་ ༡ ནང་ངོས་རང་འབྲས་སྤུངས་སུ་ཚར་གཅིག་སླེབས་ཀྱི་ཡོད། ཚན་རིག་ཚོགས་འདུ་འཚོགས་རྒྱུ་ཞིག་ཡོད་པ་དེ་ནམ་རྒྱུན་འདས་པའི་ལོ་སུམ་ཅུ་ཙམ་རིང་དུས་དུས་སུ་ཚན་རིག་ཚོགས་འདུ་འཚོགས་རྒྱུ་ཞིག་བྱས་ཏེ་གང་ལྟར་ཚོགས་པ་དེ་བཙུགས་ནས་ལོ་ ༢༥ ཙམ་ཕྱིན་ཡོད། ཉེ་ཆར་ནིའུ་ཡོཀ་ལ་ཚོགས་འདུ་ཚོགས་པ་རེད། དུས་དུས་སུ་ང་ཚོ་ཚོགས་འདུ་ཚོགས་ཀྱི་ཡོད། སྐབས་རེ་ལྡི་ལི་དང་མང་ཆེ་བ་རྡ་སར་ཚོགས་ཀྱི་ཡོད། ཁ་སེང་ངོས་ཀྱིས་བསམ་འཆར་ཞིག་ཁོང་རྣམ་པར་ཞུས་པ་ཡིན།
ད་རེས་འབྲས་སྤུངས་སུ་གཅིག་ཚོགས་ཀྱི་ཡིན་ན། ཕྱོགས་གཅིག་ནས་ངོས་རྒལ་ཡོལ་བྱས་ཏེ་གང་ལྟར་སྐུ་ཕྲེང་དགེ་འདུན་རྒྱ་མཚོ་ནས་བཟུང་འབྲས་སྤུངས་བླ་མ་ཆགས་ཡོད། འབྲས་སྤུངས་སུ་གཅིག་ཚོགས་ཐུབ་ན་༸རྒྱལ་བ་སྐུ་ཕྲེང་གོང་མ་ཚོའི་གདན་ས་ཆགས་ཡོད་ལ་ཚན་རིག་མཁས་དབང་ཤ་སྟག་ཡོང་གི་ཡོད། ཁོང་རྣམ་པའི་འགྲེལ་བཤད་རྒྱག་རྒྱུ་དེ་དག་ཡོང་གི་རེད་ལ་དེ་དག་སློབ་གཉེར་བ་ཚོས་གསན་ཐུབ་ན་ཡང་དགེ་མཚན་ཞིག་ཡོད་པ་ལྟ་བུ་རེད། དེ་བཞིན་ཚན་རིག་པ་ཚོའི་ངོས་ནས་ཡིན་རུང་ང་ཚོས་འདིར་དཔལ་ན་ལེནྡྲའི་ཆོས་རྒྱུད་དྲི་མ་མེད་པ་ཞིག་ཡིན། དེའང་རིགས་པའི་ལམ་ནས་བརྡར་ཤར་དཔྱད། དེ་འདྲའི་ཆོས་བརྒྱུད་དེ་འཛིན་སྐྱོང་སྤེལ་གསུམ་བྱེད་མཁན་གྱི་བསྟི་གནས་གལ་ཆེ་ཤོས་གྲས་ཤིག་ཆགས་ཡོད་སྟབས། དེ་གཅིག་གཟིགས་ཐུབ་ན་ཁོང་རྣམ་པ་ཚོར་ཡང་བོད་རང་གི་ལོ་རྒྱུས་ཐོག་ནས་བསླབ་པ་སློབ་གཉེར་དང་སློབ་སྦྱོང་བྱེད་སྟངས་དེ་འདི་འདྲ་ཞིག་ཡིན་པ་འདྲ་དགོངས་རྒྱུ་ཞིག་དང་། ཁོང་རྣམ་པ་ཚོའང་དེ་ཤེས་རྒྱུ་ཞིག་དང་ང་ཚོ་བཙན་བྱོལ་དུ་ཡོད་པའི་སྐབས་འདིར་ང་ཚོས་བོད་ཀྱི་ཆོས་རིག་གཞུང་སྤྱི་དང་། ལྷག་པར་དཔལ་ན་ལེནྡྲའི་ཆོས་རྒྱུད་དེ་བདག་པོ་གང་འདྲ་རྒྱག་གི་ཡོད་པ་འདི་དག་གཟིགས་ཐུབ་པ་བྱུང་ན་ཡག་པོ་རེད་བསམ་དྲན་བྱུང་། དེར་བརྟེན་རྗེས་སུ་ཕྱི་ཟླ་བ་ ༡ ཕྱི་ཚེས་ ༡༧ ནས་ང་ཚོ་འདིར་འཚོགས་རྒྱུ་ཞིག་རེད། བཀྲིས་བདེ་ལེགས་ཐུགས་རྗེ་ཆེ། ཞེས་བཀའ་སློབ་སྩལ་ཡོད་པ་བཅས། །
