༢༠༡༢ ཟླ་ ༡༢ ཚེས་ ༣༡ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་བར་ལམ་སྐུ་བསྙུན་གྱིས་སྨན་བཅོས་རིམ་འགྲོ་ཅི་ཡོང་ཞུས་ཀྱང་དང་སྐྱེད་མ་བྱུང་བར་ཕྱི་ལོ་ ༢༠༡༢ ཟླ་ ༡༢ ཚེས་ ༣༠ ཉིན་གྱི་ཐོ་རེངས་ཆུ་ཚོད་ ༤ ཙམ་ལ་དགོངས་པ་རྫོགས་པའི་ཡིད་སྐྱོའི་གནས་གནས་ཚུལ་ཐོན་པར་ཐུགས་ཕམ་དང་བཅས་དམ་པ་དེ་ཉིད་ཀྱིས་ཚེ་རབས་ཕྲེང་བ་ནས་བསགས་པའི་སྡིག་སྒྲིབ་བྱང་ཞིང་མངོན་མཐོ་ངེས་ལེགས་ཀྱི་གོ་འཕང་མགྱོགས་ནས་མྱུར་དུ་ཐོབ་ཆེད་ཕྱི་ཚེས་ ༣༡ ཉིན་གྱི་ཕྱེད་ཡོལ་ཆུ་ཚོད་ ༢ པའི་ཐོག་ལས་བྱེད་གསོལ་ཚང་ཡང་སྟེང་ཚོགས་ཁང་དུ་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་བོད་མི་མང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཀྱིས་ཆུ་ཚོད་ ༣ བར་སྨོན་ལམ་གསུང་འདོན་དང་དེ་ནས་མྱ་ངན་གུས་འདུད་ཀྱི་གདུང་སེམས་མཉམ་སྐྱེ་མཚོན་སླད་ལས་ཁུངས་ཁག་སྒོ་བརྒྱབ་ཡོད།
དེ་ཡང་མཆོད་འབུལ་སྨོན་ལམ་སྐབས་སྲིད་སྐྱོང་བློ་བཟང་སེང་གེ་མཆོག་གིས་བཀའ་བློན་ཁྲི་ཟུར་བསོད་ནམས་སྟོབས་རྒྱལ་དམ་པ་མཆོག་གི་ལོ་རྒྱུས་སྙིང་བསྡུས་ངོ་སྤྲོད་ཞུས་པ་གཤམ་གསལ།
ཁོང་ནི་ཕྱི་ལོ་ ༡༩༣༥ ལོར་ཁམས་བྲག་གཡབ་ཏུ། མཛེས་བཅུ་ཚང་ཁྱིམ་ཚང་དུ་སྐུ་འཁྲུངས། དགུང་ལོ་ ༧ ནས་ཆབ་མདོ་དང་བྲག་གཡབ་ཏུ་འབྲི་ཀློག་དང། སུམ་རྟགས་སོགས་རིག་གནས་དང་ནང་དོན་རིག་པ་བཅས་ལ་སློབ་སྦྱོང་གནང། དགུང་ལོ་ ༡༩ ལ་ལྷ་སར་ཕེབས་ཏེ་རྭ་སྟོད་གྲྭ་ཚང་དུ་བསྡུས་གྲྭ་ནས་འགོ་བཙུགས་ཏེ་གཞུང་ཆེན་བཀའ་པོད་ལྔར་སློབ་གཉེར་གནང།
དེ་རྗེས་ཕྱི་ལོ་ ༡༩༥༩ ལོར་མི་སི་མ་རི་བརྒྱུད་རྒྱ་གར་དུ་བྲོས་བྱོལ་དུ་ཕེབས་ནས་ཕྱི་ལོ་ ༡༩༦༠ ལོར་ཝ་རཱ་ཎཱ་སིར་རྟེན་གཞི་བྱས་པའི་ལེགས་སྦྱར་མཐོ་རིམ་སློབ་གྲྭར་ལེགས་སྦྱར་གྱིསྐད་ཡིག་དང། ཧིན་དིའི་སྐད་ཡིག མཚན་ཉིད་བཅས་ལ་སློབ་གཉེར་གནང་བ་དང། དེ་ནས་སློབ་ཐོན་གནང་རྗེས་རང་གཞུང་གི་བཀའ་དགོངས་ལྟར་ཝར་ཎཱ་ཧིན་དུ་གཙུག་ལག་སློབ་གཉེར་ཁང་དུ་ཉམས་ཞིབ་ཀྱི་ཕྱག་ལས་གནང་། ཕྱི་ལོ་ ༡༩༦༣ ལོར་གཞུང་ཞབས་སུ་ཞུགས་ཏེ། ཆོས་དོན་ལྷན་ཁང་ནང་ཕྱག་ལས་གནང། ཕྱི་ལོ་ ༡༩༧༠ ལོར་བོད་ཀྱི་གཞོན་ནུ་ལྷན་ཚོགས་གསར་འཛུགས་ཀྱི་ཕྱག་ལས་གནང། ཕྱི་ལོ་ ༡༩༧༡ ལོར་དྲིལ་བསྒྲགས་དྲུང་ཆེ་གཞོན་པར་བསྐོ་གཞག་བྱུང། ཕྱི་ལོ་ ༡༩༧༦ ལོར་བཀའ་དྲུང་གཞོན་པར་གནས་སྤོས་བསྐོ་གཞག་བྱུང།
དེ་རྗེས་ཕྱི་ལོ་ ༡༩༨༠ ལོར་དྲིལ་བསྒྲགས་དྲུང་ཆེར་གནས་སྤོས་བསྐོ་གཞག་བྱུང། ཕྱི་ལོ་ ༡༩༨༣ ལོར་ལས་བྱེད་བདག་གཉེར་ཁང་གི་ཚོགས་མིར་བསྐོ་གཞག་བྱུང། དེ་ནས་ཕྱི་ལོ་ ༡༩༩༡ ལོར་ཆབ་སྲིད་ཚོགས་ཆུང་གི་རྒྱུན་ལས་དྲུང་ཆེར་བསྐོ་གཞག་བྱུང། ཕྱི་ལོ་ ༡༩༩༣ ལོར་བཀའ་བློན་དུ་འདེམས་ཐོན་བྱུང་སྟེ། ཕྱི་ལོ་ ༡༩༩༣ ནས་ ༡༩༩༦ བར་སྐབས་ ༡༠ བཀའ་ཤག་གི་ནང་སྲིད་དང་འཕྲོད་བསྟེན་གྱི་བཀའ་བློན་གནང་ཐོག ཕྱི་ལོ་ ༡༩༩༥ ནས་བཀའ་བློན་ཁྲི་པའི་མཛད་འགན་བཞེས།
དེ་ནས་ཕྱི་ལོ་ ༡༩༩༧ ལོར་སླར་ཡང་བཀའ་བློན་དུ་འདེམས་ཐོན་བྱུང་སྟེ། ཕྱི་ལོ་ ༢༠༠༡ བར་སྐབས་ ༡༡ བཀའ་ཤག་གི་བཀའ་བློན་ཁྲི་པའི་མཛད་འགན་བཞེས་ཐོག་ནང་སྲིད་དང། བདེ་སྲུང། ཆོས་རིག་བཅས་ཀྱི་བཀའ་བློན་གནང། དེ་ནས་ཕྱི་ལོ་ ༢༠༠༡ ལོར་བཀའ་བློན་གྱི་ལས་ཡུན་ཚང་རྗེས་བགྲེས་ཡོལ་དུ་ཕེབས་ཏེ་བཞུགས་མུར། ཕྱི་ལོ་ ༢༠༠༢ ནས་ད་བར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་༸གོང་ས་མཆོག་གི་མཛད་རྣམ་རྩོམ་སྒྲིག་སྡེ་ཚན་གྱི་ཕྱག་ལས་གནང་བཞིན་ཡོད། ཕྱི་ལོ་ ༢༠༡༡ ལོ་མཇུག་ཙམ་ནས་བསྙུན་བཞེས་སྨན་བཅོས་གནང་མུས་ཡོད་ཀྱང། བློ་ཕམ་པ་ཞིག་ལ་ཕྱི་ལོ་ ༢༠༡༢ ཟླ་ ༡༢ ཚེས་ ༣༠ ཐོ་རེངས་ཆུ་ཚོད་ ༤ ཙམ་ལ་སྐུ་ཚེའི་འཕེན་པ་རྫོགས་འདུག དམ་པ་ཁོང་གི་ཤུལ་ལྷག་ནང་མི་སྐུ་ཟླ་དང་སྲས་མོ་གསུམ་འདུག་པ་བཅས་ཀྱི་ལོ་རྒྱུས་སྙིང་བསྡུས་སུ། ཞེས་ངོ་སྤྲོད་གྲུབ་བསྟུན། སྲིད་སྐྱོང་མཆོག་གིས་གསུང་དོན།
དེ་རིང་ང་ཚོ་འདིར་འཛོམས་དགོས་དོན་ནི་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་དགོངས་པ་རྫོགས་ཏེ་ཡིད་སྐྱོའི་གནས་ཚུལ་ཐོན་པར་བརྟེན་དམ་པ་ཁོང་གི་ཆེད་མྱ་ངན་གུས་འདུད་དང་ནང་མིར་ཐུགས་གསོའི་སླད་དུ་ཡིན། དམ་པ་ཁོང་གི་ལོ་རྒྱུས་སྙིང་བསྡུས་ཞུས་པ་དང་འབྲེལ་བཀའ་ཤག་གིས་རྒྱུན་དུ་ཞུ་བཞིན་ཡོད་པ་ནི། ད་ལྟ་བར་བོད་མིའི་སྒྲིག་འཛུགས་དང་རྩ་དོན་རྩོད་རྒྱུའི་གཞི་རྩ་བརྟན་པོ་ཡོང་རྒྱུ་གཙོ་བོ་༸གོང་ས་མཆོག་གི་ཐུགས་རྗེ་བཀའ་དྲིན་དང་ཡང་སྒོས་མི་རབས་རྒན་པས་དཀའ་ངལ་བརྒྱབ་པའི་ཐུགས་རྗེ་བཀའ་དྲིན་ལ་བརྟེན་ནས་ཡིན་ཞེས་ཞུ་བཞིན་ཡོད། བཀའ་ཟུར་བསོད་ནམས་སྟོབས་རྒྱལ་མཆོག་ནི་ང་ཚོས་མིག་དཔེར་འཇོག་ཡུལ་གཙོ་བོ་ཞིག་ཆགས་ཀྱི་ཡོད། གང་ཡིན་ཞུས་ན་ལོ་ངོ་མང་པོའི་རིང་ལྷག་བསམ་རྣམ་དག་ཐོག་བོད་སྤྱི་པའི་རྩ་དོན་སྒྲུབ་མཁན་ཞིག་ཆགས་ཡོད། མི་རབས་རྒན་པའི་བཀའ་དྲིན་གཞིར་བཞག་ཐོག་ང་ཚོ་མི་རབས་གསར་པས་འགན་ཁུར་གྱིས་ལྷག་བསམ་རྣམ་དག་ཐོག་ཞབས་ཕྱི་ཞུ་རྒྱུ་དང།
དེ་བཞིན་མི་རབས་རྒན་པས་དཀའ་ལས་བརྒྱབ་སྟེ་འབྲས་བུ་ཡོད་པ་དེ་དག་གོང་འཕེལ་གཏོང་རྒྱུ་ང་ཚོའི་འགན་ཡིན་པས་ཚང་མས་མ་བརྗེད་པ་གནང་རོགས་ཞུ་རྒྱུ་ཡིན། ད་རེས་བློ་ཕམ་གྱི་གནས་ཚུལ་ཞིག་ལ་མི་རབས་རྒན་པ་སྐུ་ངལ་སྐྱོན་མཁན་དེ་འདྲ་ཞིག་འདས་གྲོངས་ཕྱིན་པར་ཚང་མས་ཐུགས་སྨོན་ཡག་པོ་གནང་རོགས་ཞུ་རྒྱུ་ཡིན། ཞེས་གསུངས་རྗེས་ཞལ་འདོན་དབུ་འཛུགས་གནང་ཡོད་པ་བཅས་སུ།།
