༢༠༡༢ ཟླ་ ༡༢ ཚེས་ ༡ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༡༢ ཚེས་ ༡ ཉིན་འཛམ་གླིང་གཉན་ནད་རེག་དུག་ཉིན་མོ་དང་སྟབས་བསྟུན་བཀའ་ཤག་ཡང་སྟེང་ཚོགས་ཁང་ནང་རང་རེའི་སྤྱི་ཚོགས་ཁྲོད་གཉན་ནད་རེག་དུག་ནད་གཞིའི་ཐོག་གོ་རྟོགས་སྤེལ་སླད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གསར་དུ་བཟོ་བསྐྲུན་གནང་བའི། གཉན་ནད་རེག་དུག་རྩ་མེད་བཟོ་རྒྱུའི་ཕྱོགས་སུ་བསྐྱོད་པ། ཞེས་པའི་གློག་བརྙན་དེའི་གསར་འགོད་གསལ་བསྒྲགས་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་ ༩།༤༥ ཐོག་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་དང་། དྲུང་འཕར་ཚེ་རྒྱལ་ལགས། དྲུང་གཞོན་འཕྲིན་ལས་དཔལ་མོ་ལགས། དེ་བཞིན་གསར་འགོད་པ། འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་བཅས་ཁྱོན་མི་གྲངས་ ༢༠ བརྒལ་བ་འདུ་འཛོམས་ཀྱིས་ཐོག་མར་འཕྲོད་བསྟེན་དྲུང་ཆེས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་འཛམ་གླིང་གཉན་ནད་རེག་དུག་ཉིན་མོ་སྲུང་བརྩིའི་གསུང་བཤད་ཡིག་ཐོག་ཡོད་པ་དེ་སྒྲོགས་སྦྱང་གནང་།
དེ་རྗེས་འཕྲོད་བསྟེན་དྲུང་ཆེས་གོང་ཞུས་གཉན་ནད་རེག་དུག་དང་འབྲེལ་བའི་གློག་བརྙན་དེ་དབུ་འབྱེད་གནང་རྗེས་གློག་བརྙན་དེ་བསྟན་གནང་སོང་། དེ་ནས་འཕྲོད་བསྟེན་དྲུང་ཆེས་གློག་བརྙན་བཟོ་བསྐྲུན་གནང་མཁན་ད་ཆ་རྒྱ་གར་གྱི་གསར་འགྱུར་བརྒྱུད་ལམ་ཨེན་ཌི་ཊི་ཝི་(NDTV)ནང་ཕྱག་ལས་གནང་བཞིན་པ་བསོད་ནམས་ཚེ་བརྟན་ལགས་དང་། ཁོང་ལ་ཕྱག་རོགས་གནང་མཁན་ལྡི་ལིར་རྟེན་གཞི་བྱས་པའི་(River Bank Studio)ཞེས་པར་ཕྱག་ལས་གནང་མཁན་བསྟན་འཛིན་མཁས་དཔག་ལགས་རྣམ་གཉིས་ལ་འཕྲོད་བསྟེན་ལས་ཁུངས་ཀྱི་ངོས་ནས་ཐུགས་རྗེ་ཆེ་ཞུའི་མཇལ་དར་ཕུལ་ཡོད། དེ་རྗེས་འཕྲོད་བསྟེན་དྲུང་ཆེས་གསར་འགོད་པའི་དྲི་བར་ལན་འདེབས་གནང་སྟེ་གསར་འགོད་གསལ་བསྒྲགས་མཇུག་བསྒྲིལ་བ་བཅས།།
