༢༠༡༢ ཟླ་ ༡༢ ཚེས་ ༢༠ རེས་གཟའ་ཕུར་བུ།

༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཨ་རིའི་སྲིད་འཛིན་སྐུ་ཞབས་ཨོ་བྷ་མ་མཆོག་ལ་འབུལ་རྒྱུའི་དོན་ཚན་གསུམ་ཅན་གྱི་བོད་དོན་རྒྱབ་སྐྱོར་གྱི་ཕྱག་བྲིས་ལ་ད་བར་གྲོས་ཚོགས་འཐུས་མི་གྲངས་ ༢༩ ཀྱིས་མཚན་རྟགས་བཀོད་འདུག

དེ་ཡང་བོད་རྒྱལ་ཁབ་དང་མི་རིགས་ཆེད་བོད་མིས་རང་ལུས་མེར་སྲེག་བཏང་བ་སོགས་ཀྱི་བོད་ནང་གི་གནས་སྟངས་ཛ་དྲག་ཆེ་རུ་འགྲོ་བཞིན་པའི་དུས་སྐབས་འདིར། ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་སྐུ་ཞབས་(Frank Wolf)ལགས་དང་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་(James McGovern)ལགས་གཉིས་ཀྱིས་གཙོས་ཕྱག་སྦྲེལ་གྲོས་ཚོགས་ཀྱི་འཐུས་མི་རྣམས་ནས་བོད་དོན་ལ་རྒྱབ་སྐྱོར་གྱི་མཚན་བསྡུ་རུབ་གནང་མུས་ཀྱིས་ཕྱི་ལོ་ ༢༠༡༢ ཟླ་ ༡༢ ཚེས་ ༡༩ ཉིན་ཨ་རིའི་སྲིད་འཛིན་བྷག་རཀ་ཨོ་བྷ་མ་མཆོག་ལ་ཕུལ་ཡོད་པའི་ནང་འཁོད་དོན། གཙོ་བོ་སྲིད་འཛིན་ཨོ་བྷ་མ་མཆོག་གིས་སྣེ་འཁྲིད་པའི་འཛམ་གླིང་རྒྱལ་ཁབ་འདྲ་མིན་མཉམ་རུབ་ཀྱིས་བོད་དོན་རྟྒོག་ཞིབ་ཚོགས་ཆུང་ཞིག་འཕྲལ་དུ་གསར་འཛུགས་དགོས་པ་དང་། རིང་མིན་བསྐོ་གཞག་བྱ་རྒྱུར་ཉེ་བའི་ཨ་རིའི་ཕྱི་སྲིད་བློན་ཆེན་དེ་བཞིན་བོད་ཀྱི་གནད་དོན་ཐོག་རྒྱུས་མངའ་དང་མཁྱེན་རྟོགས། དེ་བཞིན་སེམས་ཤུགས་ལྡན་པ་ཞིག་བསྐོ་གཞག་གནང་དགོས་པ། གཞན་ཡང་ཉེ་ཆར་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་ནི་ཝེ་པེ་ལས་མཆོག་གི་བོད་དོན་གསལ་བསྒྲགས་ཁག་གི་རྒྱབ་གཉེར་ཟུང་འབྲེལ་ཐོག་རྒྱ་ནག་གཞུང་ལ་གནོན་ཤུགས་སྤྲོད་དགོས་སྐོར་གསུངས་འདུག་པ་བཅས། །