༢༠༡༢ ཟླ་ ༡༢ ཚེས་ ༢༤ རེས་གཟའ་ཟླ་བ།
༄༅། །བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་ལྡན་ཨུ་རུ་སུའི་ཆོས་ཞུ་བ་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་མགོན་པོ་གང་ཉིད་མཆོག་གིས་རྒྱ་གར་རྒྱལ་ས་ལྡི་ལི་གསར་པའི་ནང་ཕྱི་ལོ་ ༢༠༡༢ ཟླ་ ༡༢ ཚེས་ ༢༤ ནས་བཟུང་ཉིན་གྲངས་བཞིའི་ཨུ་རུ་སུ་སོགས་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་རྣམས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་གི་ཆོས་འབྲེལ་དབུ་འཛུགས་བསྐྱངས་འདུག
དེ་ཡང་གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཆོས་འབྲེལ་དེ་བཞིན་སྔ་དྲོའི་ཆུ་ཚོད་ ༩། ༣༠ ནས་ ༡༡། ༣༠ བར་དང་ཉིན་རྒྱབ་ཆུ་ཚོད་ ༡ ནས ༣ སྩལ་རྒྱུ་ཡིན་པ་མ་ཟད། ཕྱི་ཚེས་ ༢༦ ཉིན་གྱི་ཕྱེད་ཡོལ་མགོན་པོ་གང་ཉིད་མཆོག་གིས་དད་ལྡན་ཆོས་ཞུ་བ་རྣམས་ལ་སངས་རྒྱས་སྨན་བླའི་བཀའ་དབང་ཡང་སྩལ་རྒྱུ་ཡིན་འདུག
ཐེངས་འདིའི་ཆོས་འབྲེལ་དེ་བཞིན་དྲ་རྒྱའི་ཐོག་ཨུ་རུ་སུ་དང་བོད་སྐད། རྒྱ་སྐད། དབྱིན་སྐད། སོག་སྐད་བཅས་ནང་སྐད་བསྒྱུར་གནང་བ་དང་སྦྲགས་གཟིགས་ཐུབ་པའི་མཐུན་རྐྱེན་བསྐྲུན་ཡོད་པ་བཅས། །
