༢༠༡༢ ཟླ་ ༡༡ ཚེས་ ༡༧ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༡༧ ཉིན་གྱི་སྔ་དྲོའི་ཆུ་ཚོད་ ༩ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་རམ་ས་ལའི་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུར་ཆིབས་སྒྱུར་བཀའ་དྲིན་བསྐྱངས་སྐབས་བོད་ཁྱིམ་སློབ་ཕྲུག་རྣམས་ཀྱིས་རུ་སྟར་བསྒྲིགས་ཏེ་ཕེབས་བསུ་དང་སྦྲགས་ཚོགས་ཁང་མདུན་༸ཞབས་སོར་འཁོད་སྐབས་རྒྱ་གར་བོད་དོན་རྒྱབ་སྐྱོར་གྱི་འབྲེལ་མཐུད་པ་མཁས་དབང་ཨན་ཀེ་ཊིརི་ཁ་ (N.K. Trikha) མཆོག་གིས་ཕེབས་བསུའི་མཇལ་དར་བརྐྱངས་འབུལ་དང་སྦྲགས་སྲིད་སྐྱོང་མཆོག་དང་ཕྱི་དྲིལ་བཀའ་བློན་མཆོག་གིས་སྤོས་སྣེས་སྔོན་བསུས་ཏེ་གདན་ཞུས་ཀྱིས་ཚོགས་མགོན་དུ་༸ཞབས་སོར་འཁོད་རྗེས་ཚོགས་བཅར་བ་ཡོངས་ལ་བཀའ་སློབ་ཕེབས་དོན། ཆོས་གྲོགས་ཕོ་མོ་ཚོ། བོད་མི་ཞིག་ཡིན་པའི་ཆ་ནས་ང་ཚོར་མཐའ་གཅིག་ཏུ་འཚེ་མེད་ཞི་བ་དང་བྱམས་བརྩེར་གཞི་བཅོལ་ཏེ་འཐབ་རྩོད་བྱ་རྒྱུའི་ལས་འགན་ལྗིད་པོ་ཞིག་ཡོད། ད་ལྟ་བོད་མི་རྣམས་ལ་ཧ་ཅང་གི་དཀའ་ངལ་ཆེན་པོ་འཕྲད་བཞིན་པའི་དུས་སྐབས་འདིར་ཁྱེད་རྣམས་རྒྱལ་སྤྱིའི་སྤྱི་ཚོགས་ཀྱི་ཆ་ཤས་ཤིག་ཡིན་པར་བརྟེན་བོད་མི་ཚོར་གདུང་སེམས་མཉམ་སྐྱེའི་རྒྱབ་སྐྱོར་མཚོན་ཆེད་འདིར་བོད་དོན་རྒྱབ་སྐྱོར་གྱི་ལྷན་ཚོགས་སུ་དངོས་སུ་ཕེབས་ཐུབ་པར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ངོས་ཀྱིས་བོད་མིའི་ཆབ་སྲིད་ཀྱི་འགོ་ཁྲིད་ནས་རྒས་ཡོལ་ཞུས་ཟིན་པར་བརྟེན། དེ་རིང་འདིར་ངོས་རང་བོད་མི་ཞིག་དང་ནང་པའི་དགེ་སློང་ཞིག་ཡིན་པའི་ཐོག་ནས་སྐད་ཆ་ཤོད་རྒྱུ་ཡིན། ངོས་ཀྱིས་ལོ་ངོ་ ༤༠༠ ཙམ་སོང་བའི་ཏཱ་ལའི་བླ་མས་བོད་མིའི་ཆབ་སྲིད་ཀྱི་འགོ་ཁྲིད་རྒྱུའི་རྒྱུན་དེ་དགའ་ཞིང་སྤྲོ་ཞིང་སྤོབས་སེམས་ལྡན་པའི་ཐོག་ནས་མཇུག་སྒྲིལ་བ་ཡིན།
མང་གཙོའི་ལམ་ནས་འོས་འདེམས་བྱས་པའི་སྲིད་སྐྱོང་བློ་བཟང་སེང་གེ་ལགས་ཧར་ཝ་ཌི་གཙུག་ལག་སློབ་གྲྭ་ནས་སློབ་ཐོན་གནང་བ་ཞིག་རེད། ངོས་ཀྱིས་རྒྱུན་དུ་གཞན་ལ་ངོ་སྤྲོད་བྱེད་སྐབས་ཁོང་རང་ནི་ངོས་ཀྱི་ཆབ་སྲིད་ཀྱི་འགོ་ཁྲིད་ཡིན་ཞེས་བརྗོད་ཀྱི་ཡོད། འོན་ཀྱང་ངོས་རང་ཏཱ་ལའི་བླ་མའི་གོ་གནས་ནས་དགོངས་པ་ཞུ་རྒྱུ་མེད། དེར་བརྟེན་ཆོས་ཕྱོགས་ནས་ངོས་རང་ད་ལྟའང་ཁོང་གི་འགོ་ཁྲིད་ཡིན། ཞེས་ཞལ་ཤོབ་དང་སྦྲགས་བཀའ་སློབ་སྩལ་རྗེས་མུ་མཐུད་བཀའ་སློབ་སྩལ་དོན། ངོས་རང་འདིར་ཡོང་དགོས་དོན་གཙོ་བོ་ནི་ཁྱེད་རྣམ་པར་གུས་བཀུར་ཞུ་ཆེད་ཡིན། ང་ཚོར་རྒྱབ་སྐྱོར་བྱེད་རྒྱུ་དེ་ནི་བོད་མིར་རྒྱབ་སྐྱོར་བྱས་པ་ཙམ་མིན་པར། དྲང་བདེན་དང་འཚེ་མེད་ཞི་བར་རྒྱབ་སྐྱོར་བྱས་པ་ཞིག་ཆགས་ཡོད། དེར་བརྟེན་རྣམ་པ་ཚོར་གུས་འདུད་ཞུ་རྒྱུ་ནི་ངོས་ཀྱི་འོས་འགན་ཞིག་ཀྱང་ཆགས་ཡོད། དེར་བརྟེན་ངོས་རང་འདིར་བཅར་བ་ཡིན། གོ་ལ་ཁྱོན་ཡོངས་ཀྱི་གནས་སྟངས་ལ་གཞིགས་ཚེ་བདེན་དོན་ཆེད་འཐབ་རྩོད་བྱེད་མཁན་མི་སྒེར་དང་ཚོགས་པ་སོགས་འདྲ་མིན་མང་པོ་ཞིག་ཡོད་པ་མ་ཟད། སྐབས་རེ་དྲག་པོའི་རྒོལ་རྡུང་འོག་དཀའ་ངལ་མྱོང་བཞིན་པའང་ཡོད། དེ་དག་ཁྲོད་ནས་མང་པོ་ཞིག་ལ་བདེན་པ་རང་ཉིད་ལ་ཡོད་ཀྱང་བདེན་དོན་རྩོད་རྒྱུའི་ཐབས་ལམ་འཚེ་བའི་ལས་ལ་བརྟེན་པར་སོང་མཇུག་འབྲས་ངན་པ་འཐོན་བཞིན་ཡོད། བོད་མིའི་འཐབ་རྩོད་ལྟ་བུར་མཚོན་ན་ཐོག་མ་འགོ་འཛུགས་སྐབས་ནས་མཐའ་གཅིག་ཏུ་འཚེ་བ་མེད་པའི་ལམ་འབའ་ཞིག་ལ་བརྟེན་ཡོད།
ངོས་ཀྱིས་བསམ་པར་བོད་མི་རང་ལུས་མེར་སྲེག་གཏོང་མཁན་ཚོས་སོ་སོའི་ཚེ་སྲོག་བློས་གཏོང་བྱེད་ཐུབ་རྒྱུའི་བློ་སྤོབས་དང་ཆོད་སེམས་ཡོད་སྟབས་ཁོང་ཚོས་གལ་ཏེ་མི་གཞན་ལ་འཚེ་བའི་བྱ་སྤྱོད་སྤེལ་འདོད་ཀྱི་བསམ་པ་ཡོད་ན་ཁོང་ཚོས་ལས་སླ་པོའི་ཐོག་ནས་གཞན་ལ་འཚེ་བ་བྱེད་ཐུབ་རྒྱུ་རེད། རང་ལུས་མེར་སྲེག་གཏོང་མཁན་ཚོའི་བྱ་སྤྱོད་དེ་སྤྱིར་སྟངས་འཚེ་བའི་རྣམ་པ་ཕྲན་བུ་ཡོད་པ་ལྟ་བུ་མངོན་ཡང་དོན་དངོས་ཐོག་ཁོང་ཚོའི་ཀུན་སློང་ནང་མི་གཞན་ལ་འཚེ་བ་བྱ་རྒྱུའི་བསམ་བློ་ནམ་ཡང་མེད། དེར་བརྟེན་ཁྱེད་ཚོས་རྒྱབ་སྐྱོར་གནང་བ་དེས་བོད་མི་ཚོའི་སེམས་ལ་བློ་སྤོབས་དང་སྙིང་སྟོབས་སྐྲུན་རྒྱུ་ཡིན། ཕྱོགས་མཚུངས་མཐའ་གཅིག་ཏུ་འཚེ་མེད་ཞི་བའི་ཐབས་ལམ་ལ་རྟེན་ནས་བདེན་པའི་འཐབ་རྩོད་ཀྱི་ལས་འགུལ་སྤེལ་མཁན་ཚོར་རྒྱབ་སྐྱོར་གནང་རྒྱུ་ཧ་ཅང་གལ་ཆེན་པོ་ཆགས་ཡོད། དེ་འདྲ་མ་བྱུང་ན་བོད་མི་དང་འདྲ་བར་འཚེ་མེད་ཞི་བའི་ཐབས་ལམ་ཐོག་ནས་བདེན་དོན་གཙོད་མཁན་གཞན་ཚོས་འཚེ་བ་མེད་པའི་ཐབས་ལམ་ཐོག་ནས་གྲུབ་འབྲས་གང་ཡང་འཐོན་རྒྱུ་མ་རེད་བསམས་ནས་ཐོག་མ་ཉིད་ནས་འཚེ་བ་མེད་པའི་ཐབས་ལམ་ལ་རེ་སྟོང་ཆགས་ཏེ་འཚེ་བའི་ལས་ལ་རེ་བ་རྒྱག་རྒྱུ་མ་གཏོགས་མེད་བསམས་ཏེ་འཚེ་མེད་ཞི་བ་དང་གཉིས་སྨན་གྱི་ཐབས་ལམ་སོགས་ལ་དོ་སྣང་མི་བྱེད་རྒྱུའི་ཉེན་ཁ་ཡོད། དེ་འདྲ་བྱུང་བ་ཡིན་ན་མཐའ་གཅིག་ཏུ་ནོར་བ་རེད། ངོས་ཀྱིས་རྒྱུན་དུ་འཚེ་བ་དེ་ཁོང་ཁྲོ་ལས་ཡོང་བཞིན་ཡོད། ཁོང་ཁྲོ་དེ་ནང་གི་བསམ་བློའི་བློ་སྤོབས་མ་འདངས་བའི་རྐྱེན་ལས་ཡོང་བཞིན་ཡོད།
གལ་ཏེ་རང་ཉིད་ཀྱི་བསམ་བློའི་ནང་བློ་སྤོབས་དང་འདེང་ཚོད་ཡོད་ཚེ་དཀའ་ངལ་དེ་དག་ཕན་ཚུན་སྐད་ཆ་བཤད་ནས་སེལ་རྒྱུའི་གོ་སྐབས་ཧ་ཅང་མང་པོ་ཡོད། དེ་འདྲའི་སྙིང་སྟོབས་དང་བློ་སྤོབས་མེད་ཚེ་མེ་མདའ་བེད་སྤྱོད་མ་བྱེད་དཀའ་མེད་ཆགས་བཞིན་ཡོད། དེར་བརྟེན་དོན་དངོས་ཐོག་འཚེ་བ་མེད་པའི་ཐབས་ལམ་དེ་བསམ་བློའི་ནུས་པ་མཚོན་བཞིན་ཡོད། བོད་དོན་འཐབ་རྩོད་ཀྱི་གཙོས་གོ་ལའི་ནང་འཚེ་མེད་ཞི་བའི་ཐབས་ལམ་ཐོག་ནས་འཐབ་རྩོད་བྱེད་མཁན་ཚོར་ངེས་པར་དུ་རྒྱབ་སྐྱོར་བྱས་ཏེ་རྒྱལ་ཁ་ཐོབ་ཐུབ་རྒྱུ་ཧ་ཅང་གལ་ཆེན་པོ་ཆགས་ཡོད། ང་ཚོས་འཐའ་གཅིག་ཏུ་འཚེ་མེད་ཞི་བ་དང་གཉིས་སྨན་ཀྱི་ཐབས་ལམ་ལག་བསྟར་བྱེད་བཞིན་པར་བརྟེན་རྒྱ་རིགས་ཤེས་ལྡན་མི་སྣ་དང། མང་གཙོ་དོན་གཉེར་བ་གཙོ་བོར་གྱུར་བའི་ཆོས་གྲོགས་ཕོ་མོ་མང་པོ་ཞིག་ནས་ཀྱང་ང་ཚོར་རྒྱབ་སྐྱོར་གནང་བཞིན་ཡོད་པ་མ་ཟད། རྒྱབ་སྐྱོར་བྱེད་མཁན་ཇེ་མང་དུ་གྲོ་བཞིན་ཡོད། འདི་ནི་རྒྱལསྤྱིའི་གནས་སྟངས་ཐོག་ནས་ཞུས་པ་ཡིན།
དེ་ནས་བོད་ཀྱི་གནད་དོན་རྐྱང་པའི་ཐོག་ནས་བརྗོད་ན། ངོས་ཀྱིས་ལོ་མང་རིང་ནས་བོད་ཀྱི་གནད་དོན་སྐོར་འགྲེལ་བརྗོད་བྱེད་སྐབས་འགྲོ་བ་མིའི་ཐོབ་ཐང་རྐྱང་པའི་གནད་དོན་ཞིག་མིན་པར་བོད་ཀྱི་ཁོར་ཡུག་གི་གནད་དོན་དེ་ཆགས་ཡོད། ཁོར་ཡུག་གི་གནད་དོན་ལ་བསམ་ཤེས་སྤུ་ཙམ་མེད་པའི་ཐོག་ནས་ཤིང་སྣ་གང་བྱུང་གཅོད་འབྲེག་བྱེད་པ་དང་རང་བྱུང་གཏེར་དངོས་གང་བྱུང་སྔོག་འདོན་བྱེད་བཞིན་ཡོད། དེར་བརྟེན་ངོས་ཀྱི་རྒྱ་གར་བའི་ཆོས་གྲོགས་ཤིག་གིས་བརྗོད་རྒྱུར། མཐོ་སྒང་བོད་ཀྱི་ས་ཆའི་ཆགས་བབ་ཧ་ཅང་མཐོ་བོ་ཡིན་པ་དང་གནམ་གཤིས་སྐམ་པོ་ (Dry climate) ཡིན་པར་བརྟེན་ཁོར་ཡུག་ཉམ་ཆགས་ཕྱིན་པ་དེ་བསྐྱར་གསོ་བྱ་རྒྱུར་དུས་ཚོད་ཡུན་རིང་འགོར་རྒྱུ་ཡིན་པ་བརྗོད་བྱུང་། བོད་ཀྱི་ཁོར་ཡུག་དེ་ཧ་ཅང་གཉེན་འཕྲང་ཆེན་པོ་ཞིག་ཡིན། ས་ཆའི་ཆགས་བབ་ཐོག་ནས་བརྗོད་ཚེ་བོད་ལ་འཛམ་གླིང་སའི་ཡངས་ཐོག ཅེས་བརྗོད་བཞིན་ཡོད་པ་དེ་བདེན་པ་རེད། ང་ཚོས་འཛམ་གླིང་ས་ཁྲར་ལྟ་སྐབས་འབུར་དུ་ཐོན་ནས་ཡོད་པའི་བོད་ཀྱི་ས་ཆར་གངས་ཧ་ཅང་མང་པོ་འབབ་བཞིན་པར་བརྟེན། པ་ཀི་སི་ཐན་ནས་རྒྱ་ནག་བར་གྱི་རྒྱུག་ཆུ་ཆེ་ཁག་ཚང་མའི་འབྱུང་ཁུངས་དེ་བོད་ཆགས་ཡོད། སྤྱིར་སྟངས་ངོས་ཀྱིས་རྒྱུག་ཆུའི་ཐོག་སློབ་སྦྱོང་བྱེད་མྱོང་གང་ཡང་མེད། ངོས་ཀྱིས་བསམ་པར་རྒྱུག་ཆུ་དེ་དག་མི་འབོར་ཐེར་འབུམ་མང་པོའི་འཚོ་གནས་དང་འབྲེལ་བ་ཆགས་ཡོད།
ད་ཆ་མཐོ་སྒང་བོད་ཀྱི་ཤིང་སྣ་གཅོད་འབྲེག་ཚད་ལས་བརྒལ་བ་སོགས་ཀྱིས་ཉེར་ལེན་ལ་བརྟེན་ནས། ཁོར་ཡུག་ལ་དོ་ཕོག་ཕྱིན་པའི་མངོན་རྟགས་སུ་རྒྱུག་ཆུ་དེ་དག་ནས་ཆུ་ལོག་བྱུང་བ་དང། མཚམས་རེ་རྒྱུག་ཆུའི་ཤུགས་ཚད་ཧ་ཅང་ཉུང་དུ་ཕྱིན་པ། དཔེར་ན་མཚོ་སྔོན་པོ་ལྟ་བུར་ཆ་མཚོན་ན། དེང་སྐབས་མཚོ་སྔོན་པོའི་ཆུ་ཚད་ཧ་ཅང་ཉུང་དུ་ཕྱིན་ཡོད་པ་ཉམས་ཞིབ་པ་མང་པོས་བརྗོད་བཞིན་འདུག ངོས་རང་ཐོག་མར་སྐུ་འབུམ་ནས་ལྷ་སར་བསྐྱོད་སྐབས་མཚོ་སྔོན་པོའི་ཉེ་འགྲམ་དུ་མཚན་དགོང་མོ་གཅིག་བསྡད་པ་རེད། སྐབས་དེར་ངོས་རང་ལོ་བཞི་ལ་སོན་ཡོད། ཉིན་དེའི་དྲོ་ངོས་རང་མཚོ་སྔོན་པོའི་ཉེ་འགྲམ་དུ་གོམ་པ་བརྒྱབ་སྟེ་འགྲོ་སྐབས་མཚོ་འགྲམ་དུ་ཉ་གཅིག་ཤི་ཡོད་པ་མཐོང་བྱུང་བ་དེ་ནི་དུས་ད་ལྟའང་ཧ་ཅང་གསལ་པོ་དྲན་བཞིན་འདུག སྐབས་དེར་མཚོ་སྔོན་པོ་ཧ་ཅང་དྭངས་ཤིང་ཁ་དོག་སྔོ་ཐིང་ངེར་ཡོད་པ་དྲན་བཞིན་འདུག དེ་ནས་ཨཡི་རེཤི་ཁོར་ཡུག་ཉམས་ཞིབ་པ་གཅིག་གིས་ངོས་ལ་རྒྱ་རིགས་ཁོར་ཡུག་ཉམས་ཞིབ་པ་གཅིག་གིས་བྲིས་པའི་རྩོམ་ཞིག་བསྟན་བྱུང་།
རྩོམ་ཡིག་དེའི་ནང་མཐོ་སྒང་བོད་ཀྱི་ཁོར་ཡུག་དེ་འཛམ་གླིང་གི་སྣེ་གསུམ་པ་ལྟ་བུ་ཡིན་པ་བརྗོད་འདུག རྒྱུ་མཚན་ནི་མཐོ་སྒང་བོད་ཀྱིས་གོ་ལའི་ཚ་དྲོད་ལ་ཕན་གནོད་གང་བྱུང་བ་དེ་འཛམ་གླིང་ཤར་སྣེ་དང་ལྷོ་སྣེར་ཕན་གནོད་དང་གཅིག་མཚུངས་ཡིན། དེར་བརྟེན་བོད་ཀྱི་ཁོར་ཡུག་དེ་ཧ་ཅང་གལ་ཆེན་པོ་ཆགས་ཡོད། དེ་སྔ་ཨུ་རུ་སུ་དམར་པོའི་རྒྱལ་ཁབ་ལ་གཟིགས་དང་། ཁོང་ཚོས་སྐབས་གཅིག་ལ་བཟོ་གྲྭ་ཆེན་པོ་རྒྱག་རྒྱུ་མ་གཏོགས་ཁོར་ཡུག་ལ་དོ་སྣང་རྩ་བ་ནས་མ་བྱས་པའི་ཉེར་ལེན་ལ་རྟེན་ནས་དུས་ད་ལྟའང་རྗེས་འབྲས་སྨིན་བཞིན་ཡོད། བོད་དེའང་དེ་མཚུངས་རྒྱ་རིགས་མང་པོ་ཞིག་གིས་བོད་ཀྱི་ཁོར་ཡུག་གི་གནད་འགག་ཤེས་ཀྱི་མེད།
དེ་ནས་ཀྲུ་རུ་ཆིན་སྲིད་བློན་སྐབས་ཁོར་ཡུག་ཐོག་ཉེན་ཁ་ཆེ་བའི་བོད་ཀྱི་ས་ཁུལ་ཁག་གཅིག་ནང་ཤིང་སྣ་གཅོད་འབྲེག་བྱེད་རྒྱུ་མཚམས་འཇོག་དགོས་པའི་ལམ་སྟོན་བྱས་ཡོད། འོན་ཀྱང་ལྐོག་ཟའི་བྱ་སྤྱོད་འོག་ས་གནས་རྒྱ་ནག་གཞུང་གི་དཔོན་རིགས་དང་ཚོང་པ་ལག་འབྲེལ་བྱས་ཏེ་ལམ་སྟོན་དེ་དག་ལ་བརྩི་སྲུང་མ་བྱས་པ་མ་ཟད། རྒྱ་ནག་ཚོང་ལས་ཚན་པ་མང་པོ་ཞིག་གིས་འདོད་རྔམ་ཐོག་ནས་བོད་ཀྱི་ཤིང་སྣ་དང་རྒྱུག་ཆུ་མང་པོ་བག་མེད་ལོངས་སུ་སྤྱོད་དང་སྤྱོད་བཞིན་ཡོད། འདི་ནི་བོད་ཀྱི་གནད་དོན་གལ་ཆེན་པོ་ཞིག་ཆགས་ཡོད།
ཆབ་སྲིད་གནད་དོན་ཐོག་ནས་བརྗོད་ན། བོད་རྒྱ་གཉིས་མོས་མཐུན་བྱུང་མཚམས་བདུན་ཕྲག་འགའ་ཤས་ནང་གནས་སྟངས་ཞི་སྒྲིག་ཐུབ་ངེས་ཡིན། འོན་ཀྱང་ཁོར་ཡུག་ཐོག་ཉམས་ཆགས་སོང་ཚར་བ་ཡིན་ན་ཆབ་སྲིད་ཀྱི་དཀའ་ངལ་སེལ་ནའང་ཁོར་ཡུག་གི་དཀའ་ངལ་དེ་མ་སེལ་བར་ལྷག་སྡོད་རྒྱུ་རེད། དེར་བརྟེན་ཁོར་ཡུག་གནད་དོན་དེ་ཧ་ཅང་ཛ་དྲག་པོ་ཞིག་ཆགས་ཡོད་པས་དེར་ཆོས་གྲོགས་ཚོས་བསམ་བློ་གཏོང་རོགས། བོད་ཀྱི་རིག་གཞུང་ཐོག་ནས་བརྗོད་ན། བོད་དུ་ནང་ཆོས་དར་སྒོ་བཙུགས་པ་ནས་བཟུང་ན་ལཎྜའི་པཎ་གྲུབ་འཕགས་པ་ཀླུ་སྒྲུབ་དང་ཐོགས་མེད། སངས་རྒྱས་སྐྱངས་སོགས་རྒྱ་གར་གྱི་ནང་པའི་སློབ་དཔོན་མཁས་གྲུབ་གཉིས་ལྡན་བསམ་གྱིས་མི་ཁྱབ་པ་དུ་མར་བྱོན་པ་རྣམས་ལས་བརྒྱུད་པའི་རིག་གཞུང་ཧ་ཅང་ཕྱུག་པོ་ཞིག་དར་འཕེལ་བྱུང་ཡོད། སྤྱིར་པཱ་ལིའི་གཞུང་ཡོད་ཀྱང་གཙོ་བོ་ལེགས་སྦྱར་གཞུང་ལ་ཁུངས་གཏུགས་ནས་བྱུང་ཡོད། བོད་དུ་ནང་ཆོས་མ་དར་གོང་དུ་བོན་ཆོས་དར་ཟིན་ཡོད། བོན་གཞུང་ནས་སྨན་བཅས་ཀྱི་རིག་པ་སོགས་རིག་པའི་གཞུང་ལུགས་མང་དག་ཅིག་ཡོད། ནང་ཆོས་དར་རྗེས་བོན་ཆོས་ཀྱང་ཡར་རྒྱས་ཕྱིན་ཡོད།
ང་ཚོས་ནང་ཆོས་ཉམས་ལེན་བྱེད་རྒྱུ་དེ་ཕྱག་མཆོད་འབུལ་དང་སྨོན་ལམ་རྒྱག་རྒྱུ། ཡིད་ཆེས་བྱེད་རྒྱུ་ཙམ་མིན་པར་ཤེས་ཡོན་དང་ཐད་ཀར་འབྲེལ་བ་ཡོད། ན་ལཎྜ་ནས་དར་བའི་རིག་པའི་གཞུང་ལུགས་དེ་དག་གཙོ་བོ་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱིས་ཟིན་པའི་ཐོག་ནས་རིག་པས་དཔྱད་པ་བྱས་ཏེ་དངོས་པོའི་གནས་ལུགས་གཏན་ལ་འབེབས་བཞིན་ཡོད་པ་ཟད། ནང་སེམས་བརྒྱུད་དང་འབྲེལ་བའི་ཉོན་མོངས་པའི་བློར་གཉེན་པོ་བསྟེན་ཏེ་འགོག་ཐུབ་རྒྱུའི་ནུས་པ་ཡོད། སྟོན་པ་རང་ཉིད་ཀྱིས་དཔྱད་པ་བྱེད་དགོས་པ་བཀའ་གནང་ཡོད། ཐབས་ལམ་འདི་ནི་དེང་དུས་ཚན་རིག་གི་ཐབས་ལམ་དང་ཕལ་ཆེར་འདྲ་པོ་ཆགས་ཡོད། ངོས་རང་ལྟ་བུར་ཆ་མཚོན་ན་འདས་པའི་མི་ལོ་ ༥༣ རིང་རྒྱལ་ཁབ་འདྲ་མིན་ཁག་གི་ནང་དུ་ནང་པའི་ཆོས་གྲོགས་མང་པོ་དང་ཐུག་འཕྲད་བྱུང་སྐབས་བོད་བརྒྱུད་ནང་བསྟན་དེ་གཞན་དང་བསྡུར་བ་ཡིན་ན་ཧ་ཅང་ཚད་མཐོན་པོར་སོན་པ་ཞིག་ཡིན་པའི་ར་སྤྲོད་བྱུང་།
འོན་ཀྱང་བོད་པའི་དགོན་པ་འགའ་ཤས་ནང་རྟག་ཏུ་ཆོ་ག་ཕྱག་ལེན་རྐྱང་པར་དུས་འདའ་བཞིན་ཡོད་ཀྱང་ངོས་ཀྱིས་དེར་མོས་མཐུན་རྩ་བ་ནས་མེད། ང་ཚོར་ན་ལཎྜ་ནས་དར་བའི་བོད་བརྒྱུད་ནང་བསྟན་འདི་བཞིན་རིག་པ་གཙོ་བོར་བྱས་ནས་དངོས་པོའི་གནས་ལུགས་གཏན་ལ་ཕབ་དགོས་པར་བརྟེན། དེང་སྐབས་ང་ཚོས་ཚན་རིག་པ་དང་ལྷན་བགྲོ་གླེང་མང་པོ་བྱས་དང་བྱེད་མུས་ཡིན། ཁོང་ཚོ་ནི་ནང་པ་དང་ཆོས་པ་དེ་འདྲ་མིན། ཚན་རིག་པ་ཚོས་རྟག་དཔྱད་ཀྱི་ལམ་ནས་བདེན་དོན་འཚོལ་བཞིན་ཡོད་པར་བརྟེན་ང་ཚོ་ཕན་ཚུན་ཐབས་ལམ་འདྲ་མཚུངས་སུ་ཡོད། སྤྱིར་ཚན་རིག་པ་ཚོས་གཙོ་བོ་ཕྱི་དངོས་པོ་ཚད་མཇལ་རྒྱུ་ཡོད་པ་དང་རྩིས་རྒྱག་རྒྱུ་ཡོད་པར་གཞི་རྩ་བཟུང་སྟེ་དེན་དོན་འཚོལ་བཞིན་ཡོད། འོན་ཀྱང་ལོ་བཅུ་ཙམ་སྔོན་ནས་འཛམ་གླིང་ནང་ཚན་རིག་པ་གྲགས་ཅན་པ་མང་པོ་ཞིག་གིས་སེམས་དང་འཚོར་བའི་རྣམ་གཞག་སྐོར་དོ་སྣང་བྱེད་སྒོ་བཙུགས་ཡོད། ཅེས་སོགས་ཀྱི་བཀའ་སློབ་སྩལ་ཡོད་པ་བཅས།།
