༢༠༡༢ ཟླ་ ༡༡ ཚེས་ ༡༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༡༦ ཉིན་དབུ་འཛུགས་གནང་བའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ་དེ་ཕྱི་ཚེས་ ༡༨ ཉིན་མཇུག་སྒྲིལ་གནང་ཡོད།
དེ་ཡང་མཇུག་བསྡོམས་མཛད་སྒོར་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་ཚོགས་བཅར་བ་ཡོངས་ལ་ཐེངས་འདིའི་ཚོགས་ཆེན་ཐོག་གཏན་འབེབས་བྱུང་བའི་ལས་འཆར་རྣམས་ལག་བསྟར་ཡོང་བའི་འབོད་སྐུལ་ཤུགས་ཆེ་གནང་བ་དང་། ལྷག་པར་ཚོགས་ཆེན་དུ་ཕེབས་པའི་རྒྱ་རིགས་ཉི་ཤུ་ཙམ་ཡོད་པ་ཁོང་རྣམས་ལ་རྒྱ་སྐད་ཐོག་འཚམས་འདྲི་ཞུས་པ་དང་ལྷན་གསུང་དོན། བོད་ནང་གི་ད་ལྟའི་ཛ་དྲག་གནས་སྟངས་འདིའི་བྱུང་རྐྱེན་ནི་རྒྱ་ནག་གཞུང་གི་ནོར་འཁྲུལ་ཅན་གྱི་སྲིད་བྱུས་ལག་བསྟར་བྱེད་བཞིན་ཡོད་པར་བརྟེན་ནས་བྱུང་བ་ཞིག་ཡིན་པ་དང་
བོད་ནང་བོད་མི་གྲངས་ ༧༦ གིས་རྒྱ་ནག་གཞུང་དང་མི་མང་ལ་བོད་ནང་གི་བོད་མིའི་དཀའ་སྡུག་དེ་དག་གསལ་སྟོན་ཡོང་ཆེད་སོ་སོའི་རྩ་ཆེའི་ཚེ་སྲོག་ལེགས་སྐྱེས་སུ་ཕུལ་ཡོད་པ་རེད་ཅེས་དང་།
དེ་བཞིན་བཀའ་བློན་མཆོག་གིས་མུ་མཐུད་གསུང་དོན། ༸གོང་ས་༸སྐྱབས་མགོན་ཆེན་པོ་མཆོག་དང་བོད་མི་རྣམས་ཀྱི་རེ་བ་གནང་བ་བཞིན་ཐེངས་འདིའི་ཚོགས་ཆེན་དུ་ཕེབས་པ་རྣམས་ནས་རང་དབང་ཐོག་ནས་བསམ་བློ་གཏོང་ཐུབ་པ་དང་། དྲང་བདེན་ལ་དགའ་བའི་རྒྱ་མི་རིགས་གྲོགས་པོ་རྣམས་ལ་འབོད་སྐུལ་ཞུ་རྒྱུར། ཁྱེད་རྣམས་ཀྱིས་བོད་ནང་གི་དངོས་ཡོད་གནས་སྟངས་དེ་རྒྱ་ཆེ་བའི་རྒྱ་རིགས་མི་མང་རྣམས་ལ་བརྒྱུད་བསྒྲགས་གནང་རྒྱུ་དང་། བོད་མི་རིགས་ཀྱི་གནད་དོན་དང་དེའི་མཐའ་མའི་ཐག་གཅོད་ནི་རྒྱ་རིགས་མི་མང་དང་བོད་རིགས་མི་མང་ལ་རག་ལས་ཡོད། ཅེས་གསུང་བཤད་གནང་ཡོད།
ཐེངས་འདིའི་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་ཐོག་རྒྱལ་ཁབ་ཁག་མི་འདྲ་བ་ ༤༣ ནས་བོད་དོན་རྒྱབ་སྐྱོར་གནང་མཁན་ཚོགས་པ་སྒྲིག་འཛུགས་ཁག་དང་། བོད་རིགས་སྤྱི་མཐུན་ཚོགས་པ། དེ་བཞིན་སྐུ་ཚབ་དོན་གཅོད་བཅས་ནས་ཁྱོན་མི་གྲངས་ ༢༠༠ བརྒལ་བ་མཉམ་ཞུགས་གནང་ཡོད། ཁོང་རྣམས་ཀྱིས་འབྱུང་རྒྱུར་ལོ་གཅིག་ནང་ལས་དོན་ལག་བསྟར་གྱི་འཆར་གཞི་ཁག་གཅིག་ཀྱང་གཏན་འབེབས་གནང་ཡོད་པ་བཅས།།
