༢༠༡༢ ཟླ་ ༡༡ ཚེས་ ༢༠ རེས་གཟའ་མིག་དམར།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༢ ཟླ་ ༡༡ ཚེས་ ༢༠ ཉིན་བོད་ནང་གི་སྔ་དྲོའི་ཆུ་ཚོད་ ༨།༣༠ ཡས་མས་སུ་བོད་མདོ་སྨད་བླ་བྲང་བསང་ཆུ་རྫོང་ཨ་མཆོག་ཚོ་བ་བརྒྱད་ཀྱི་ནང་གསེས་ཁྱི་ངན་སྡེ་བའི་རང་ལོ་ ༣༤ ལ་སོན་པའི་རྒྱལ་གཅེས་པ་ཚེ་རིང་དོན་གྲུབ་ལགས་ཀྱིས། ཨ་མཆོག་རྒྱ་གར་ཐང་གི་གཏེར་ཁ་སྔོག་སའི་སྒོ་འགྲམ་དུ་རང་ལུས་མེར་སྲེག་བཏང་སྟེ་རྒྱ་གཞུང་གི་དྲག་གནོན་ཅན་གྱི་སྲིད་བྱུས་ལ་ངོ་རྒོལ་བྱས་ཏེ་འདས་གྲོངས་སུ་གྱུར་འདུག
རྒྱལ་གཅེས་པ་ཁོང་གི་ཕའི་མིང་ལ་ཀླུ་འབུམ་རྒྱལ་དང་མའི་མིང་ལ་འབྲུག་མོ་མཚོ་ཡིན་པ་དང་། ཁོང་གི་སྤུན་མཆེད་མིང་ལ་བཀྲ་ཤིས་རྒྱ་མཚོ་དང་སྒྲོལ་མ་སྐྱིད་ཡིན་འདུག དེ་བཞིན་ཁོང་གི་བཟའ་ཟླའི་མིང་ལ་རྟ་མགྲིན་འཚོ་ཟེར་ཞིང། ཀོང་གཉིས་ལ་་བྱིས་པ་གཉིས་ཡོད་པའི་གཅིག་གི་མིང་ལ་ལྷ་གོ་ཡིན་འདུག རྒྱལ་གཅེས་པ་ཁོང་ནི་མི་གཤིས་ཧ་ཅང་བཟང་བས་དུས་རྒྱུན་དུ་འཛུམ་ཤིག་ཤིག་ཏུ་སྡོད་པ་ཞིག་ཡིན་པས། སྡེ་མི་ཀུན་ཀྱང་ཧ་ཅང་དགའ་སའི་མི་སྣ་ཞིག་ཡིན་ལ། དུས་རྒྱུན་དུ་བོད་མི་རིགས་ཀྱི་བདེ་སྡུག་ལ་དོ་སྣང་ཆེ་ཞིང་བོད་དོན་སྐོར་གླེང་སྐབས་ཚོར་ཤུགས་རྣོ་ལ་སེམས་ཁུར་ཆེས་ཆེར་ཡོད་མཁན་ཞིག་ཡིན་འདུག་པ་བཅས།།
