༢༠༡༢ ཟླ་ ༡༡ ཚེས་ ༣༠ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༢༢ ཉིན་ཕ་རན་སིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཁང་ནང་བོད་དོན་རྒྱབ་སྐྱོར་གྱི་གྲོས་འཆར་དེར་གོ་བསྡུར་ལྷུག་པོ་བྱུང་རྗེས་ཕྱི་ཚེས་ ༢༧ ཉིན་ཕ་རན་སིའི་གྲོས་ཚོགས་གོང་མའི་ French Senate ནང་བོད་དོན་རྒྱབ་སྐྱོར་གྱི་གྲོས་ཆོད་བཞག་ཡོད། གྲོས་འཆར་འདོན་མཁན་ནི་གྲོས་ཚོགས་གོང་མའི་ནང་ཡོད་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཡིན་འདུག གྲོས་ཆོད་འདི་འདྲ་འཇོག་དགོས་པའི་རྒྱུ་མཚན་གཙོ་བོ་ནི། བོད་ནང་ད་ལྟའི་འཆར་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཏུ་འགྲོ་བཞིན་ཡོད་པ་དང་། ཡུ་རོབ་སྤྱི་མཐུན་ཚོགས་པས་ཉེ་ལམ་འགྲོ་བ་མིའི་ཐོབ་ཐང་གི་དམིགས་བསལ་སྐུ་ཚབ་འཐུས་མི་གསར་འཛུགས་གནང་བ་དེ་དང་རྗེས་སུ་མཐུན་པའི་ཐོག་ནས་བོད་ཀྱི་གནད་དོན་དེ་བཞིན་ཡུ་རོབ་སྤྱི་མཐུན་ཚོགས་པས་གལ་གནད་ཆེ་ཤོས་ཤིག་ཏུ་ངོས་འཛིན་ཐུབ་ཆེད་དུ་ཡིན་འདུག
དེ་ཡང་གྲོས་ཆོད་ཀྱི་ནང་དོན་སྙིང་བསྡུས་ཤིག་འདིར་བཀོད་ན། བོད་ནང་ཛ་དྲག་གི་གནས་སྟངས་མུ་མཐུད་གནས་བཞིན་པར་བརྟེན། རྒྱལ་སྤྱིའི་སྤྱི་ཚོགས་ཀྱིས་བོད་མིའི་དཀའ་ངལ་ལ་རྒྱབ་སྐྱོར་གནང་དགོས། རྒྱ་ནག་གཞུང་གིས་བོད་ས་བཙན་འཛུལ་བྱས་ནས་ལོ་ངོ་བཅུ་ཕྲག་ལྔ་རིང་བོད་མི་ཚོས་མྱོང་བཞིན་པའི་དཀའ་ངལ་དེར་རྒྱལ་སྤྱིའི་སྤྱི་ཚོགས་ཀྱིས་དོ་སྣང་མ་བྱས་པར་བོད་མི་ཚོར་རོགས་རམ་བྱེད་མ་ཐུབ་པར་བརྟེན། ད་ལྟའི་ཛ་དྲག་གི་གནས་སྟངས་འདིའི་རྒྱུ་རྐྱེན་ལྟ་བུ་ཆགས་ཡོད། ཕྱི་ལོ་ ༢༠༠༨ ལོ་ནས་བོད་ནང་དུ་བོད་མི་ཚོས་རྒྱ་ནག་གཞུང་ལ་ཞི་རྒོལ་བྱས་རྗེས་རྒྱ་ནག་གཞུང་གིས་བོད་མིའི་ཐོག་དྲག་གནོན་དང་དམ་བསྒྲགས་ཧཅང་བྱས་ཡོད། རྒྱུ་མཚན་དེར་བརྟེན་བོད་རྒྱ་ཕྱོགས་གཉིས་ཀར་གཉིས་སྨན་གྱི་ཐབས་ལམ་ལག་བསྟར་དོན་ཁྱོལ་ཡོང་ཆེད་འགོག་རྐྱེན་བཟོས་ཡོད། བཙན་བྱོལ་བོད་མིའི་དབུ་ཁྲིད་དང་རྒྱལ་སྤྱིའི་དབུ་ཁྲིད་རྣམས་ལ་སྐབས་བབ་ཛ་དྲག་གི་ལས་འགན་གལ་ཆེ་ཤོས་ནི་བོད་ནང་དུ་བོད་མི་ཚོས་རང་ལུས་མེར་སྲེག་གཏོང་རྒྱུའི་མཚོན་འུ་ཐུག་ཐབས་ཟད་ཀྱི་ལས་འགུལ་རིགས་མ་སྤེལ་རོགས་ཞེས་འབོད་སྐུལ་ཞུ་རྒྱུ་དེ་ཆགས་ཡོད། འདས་པའི་ལོ་གཉིས་ཙམ་རིང་བོད་མི་ལྔ་བཅུ་ལྷག་གིས་རང་ལུས་མེར་སྲེག་བཏང་ཡོད། ཡུ་རོབ་སྤྱི་མཐུན་ཚོགས་པས་རྒྱ་ནག་དང་ལྷན་ལོ་འཁོར་འགྲོ་བ་མིའི་ཐོབ་ཐང་ལྷན་ཚོགས་སྐབས་བོད་ཀྱི་གནད་དོན་སྐོར་གླེང་ཡོད། འོན་ཀྱང་ཕྱོགས་ཡོངས་ནས་ལྟ་སྐབས་རྒྱ་ནག་རྒྱལ་ཡོངས་ནང་འགྲོ་བ་མིའི་ཐོབ་ཐང་གི་གནས་སྟངས་ཐོག་ཡར་རྒྱས་ཀྱི་རྣམ་པ་གང་ཡང་བྱུང་མེད་པ་མ་ཟད། བོད་ནང་གི་གནས་སྟངས་ཇེ་སྡུག་ཏུ་ཕྱིན་ཡོད། དེར་བརྟེན་ཡུ་རོབ་སྤྱི་མཐུན་ཚོགས་པས་བོད་ནང་དུ་བོད་མིའི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་རྒྱུ་ཙམ་མ་ཟད། གྲོས་མོལ་གྱི་ལམ་ནས་བོད་རྒྱ་གཉིས་སྨན་གྱི་ཐབས་ལམ་ཐོག་བོད་མིའི་དཀའ་ངལ་སེལ་ཐབས་ཆེད་འབད་བརྩོན་གང་ཡོད་གནང་དགོས།
ཨ་རིའི་གཞུང་གིས་ཕྱི་ལོ་ ༡༩༩༧ ལོར་ཨ་རིའི་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་རྗེས་འདས་པའི་ལོ་ངོ་ ༡༥ ནང་རྒྱ་ནག་གཞུང་དང་འབྲེལ་བ་བཟང་པོ་རྒྱུན་འཁྱོང་ཐོག་བོད་དོན་རྒྱབ་སྐྱོར་བྱ་རྒྱུའི་ཆབ་སྲིད་ཀྱི་ལངས་ཕྱོགས་བརྟན་པོ་འཛིན་བཞིན་ཡོད་པ་དེ་ནི་ཡུ་རོབ་སྤྱི་མཐུན་ཚོགས་པ་ལས་བོད་དོན་རྒྱབ་སྐྱོར་ཤུགས་ཆེ་བ་ཆགས་ཡོད། ཅེས་སོགས་འཁོད་ཡོད་པ་བཅས།།
