༢༠༡༢ ཟླ་ ༡༡ ཚེས་ ༢༢ རེས་གཟའ་ཕུར་བུ།
༄༅། །བརྒྱུད་ལམ་ཁག་ནས་གནས་ཚུལ་སྤེལ་གསལ་ལྟར་ན། ཕྱི་ལོ་ ༢༠༡༢ ཟླ་ ༡༡ ཚེས་ ༢༢ ཉིན་གྱི་བོད་ནང་གི་དགོང་དྲོའི་ཆུ་ཚོད་ ༡༠།༠༠ ཡས་མས་སུ་བོད་མདོ་སྨད་ཀན་སུའུ་ཞིང་ཆེན་ཀན་ལྷོ་ཁུལ་ཀླུ་ཆུ་རྫོང་མ་ངེས་ཞང་གི་ཁོང་གཏོགས། ཤིས་ཚང་ཚོ་བ་བཅུ་གཉིས་ཀྱི་ནང་ཚན་དཔལ་སྒུར་ནགས་རི་ཚོ་བའི་རང་ལོ་ ༢༣ ཡིན་པའི་རྒྱལ་གཅེས་པ་རྟ་མགྲིན་སྐྱབས་ལགས་ཀྱིས། ཀླུ་ཆུ་རྫོང་དང་ཐག་ཉེ་བའི་ཀླུ་ཆུའི་འགྲམ་ངོགས་སུ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་ཆེད་རང་ལུས་མེར་སྲེག་བཏང་རྗེས་འདས་གྲོངས་སུ་གྱུར་འདུག རྒྱལ་གཅེས་པ་རྟ་མགྲིན་སྐྱབས་ལགས་ནི་ཕ་ཚེ་འདས་ཚེ་རིང་བཀྲ་ཤིས་དང་རང་ལོ་ ༤༧ ཡིན་པའི་མ་སྒྲོ་མ་འཚོ་འམ་སྒྲོལ་སྒྲོལ་གཉིས་ཀྱི་བུ་ཡིན་ཞིང་། ཁོང་ལ་སྤུན་མཆེད་གསུམ་ཡོད་འདུག
རྒྱལ་གཅེས་པ་ཁོང་ ༢༠༠༦ ལོར་ཤིས་ཚང་དགོན་པར་ཞུགས་ཡོད་འདུག་ལ། སྐབས་དེར་ཁོང་གི་གྲྭ་མིང་ལ་འཇམ་དབྱངས་དགེ་འདུན་འབོད་ཀྱི་ཡོད་འདུག ཕྱི་ལོ་ ༢༠༠༧ ལོར་སྐྱ་སར་བབ་ཏེ་ད་ལྟའི་བར་འབྲོག་སར་བསྡད་ཡོད།།
