༢༠༡༢ ཟླ་ ༡༡་ཚེས་ ༢ རེས་གཟའ་པ་སངས།
༄༅། །བོད་མིའི་འདི་ཕྱི་གཉིས་ཀྱི་༸སྐྱབས་གནས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཉི་ཧོང་གི་དད་ལྡན་པ་སོགས་ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར། བཀའ་བཞེས་ཐོབ་སྟེ་ཕྱི་ལོ་ ༢༠༡༢ ཟླ་ ༡༡ ཚེས་ ༢ ཉིན་གྱི་སྔ་དྲོ་ཆུ་ཚོད་ ༨།༤༠ ཐོག་རྡ་ས་བཞུགས་སྒར་ཕོ་བྲང་ནས་ཕེབས་འགྲོའི་ཐོག་ག་གྷལ་གནམ་ཐང་དུ་ཆིབས་སྒྱུར་བསྐྱངས་སྐབས་དད་ལྡན་སེར་སྐྱ་མི་མང་རྣམས་ནས་ལག་ཏུ་དཀར་གཙང་མཇལ་དར་ཐོགས་ཏེ་ཞལ་མཇལ་དང་ཕེབས་སྐྱེལ་ཞུས་ཡོད།
དེ་ཡང་མགོན་པོ་གང་ཉིད་མཆོག་ག་གྷལ་གནམ་ཐང་བར་དབུས་བོད་མིའི་སྒྲིག་འཛུགས་ཀྱི་བདེ་སྲུང་ལས་ཁུངས་ཀྱི་བཀའ་བློན་འབྲོང་ཆུང་དངོས་གྲུབ་མཆོག་སོགས་ཀྱིས་ཕེབས་སྐྱེལ་ཞུས་ཡོད། གནམ་ཐང་ནས་མཁའ་ལམ་བརྒྱུད་ལྡི་ལི་དང་། དེ་ནས་ཉི་ཧོང་དུ་ཆིབས་སྒྱུར་བསྐྱང་སྟེ་ཕྱི་ཟླ་ ༡༡ ཚེས་ ༤ ཉིན་གྱི་སྔ་དྲོ་ཉི་ཧོང་ཡོ་ཀོ་ཧ་མར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་གའི་པེ་སི་ཕེག་ཚོགས་ཁང་དུ་དད་ལྡན་ཆོས་ཞུ་བ་རྣམས་ལ་དགེ་བཤེས་གླང་རི་ཐང་པས་མཛད་པའི་༼བློ་སྦྱོང་ཚིག་བརྒྱད་མའི།༽གསུང་ཆོས་བཀའ་དྲིན་སྩལ་རྒྱུ་དང་། ཉིན་རྒྱབ་མི་མང་ལ་༼རྐྱེན་ངན་བྱུང་སྐབས་བཟང་ཕྱོགས་ཀྱི་རེ་བ།༽ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག
ཕྱི་ཚེས་ ༦ ནས་ ༧ བར་ཉིན་གྲངས་གཉིས་རིང་མགོན་པོ་གང་ཉིད་མཆོག་གིས་ཉི་ཧོང་གི་རྒྱལ་ས་ཊོཀ་ཁྱོར་དུ་དེ་གའི་ཚན་རིག་པ་དང་། དགེ་འདུན་པ། ནང་པའི་མཁས་དབང་བཅས་དང་ལྷན་ནང་ཆོས་ཕྱི་ནང་གི་ཚན་རིག་ཅེས་པའི་བརྗོད་གཞིའི་ཐོག་གི་བགྲོ་གླེང་ལ་ལྷན་ཞུགས་མཛད་རྒྱུ་དང་། ཕྱི་ཚེས་ ༡༡ ཉིན་ཉི་ཧོང་ཨོ་ཀི་ནཱ་ཝར་དེ་གའི་བྷུ་དྷོ་ཀན་ཚོགས་ཁང་དུ་དཀའ་ངལ་ལས་འགྲོལ་བའི་ནུས་ཤུགས་དང་། མ་འོངས་པའི་མི་རབས་གཞོན་སྐྱེས་ཚོའི་སྐོར་ལམ་སྟོན་བཀའ་སློབ་སྩལ་རྒྱུ། ཕྱི་ཚེས་ ༡༣ ཉིན་ཉི་ཧོང་རྒྱལ་ས་ཊོཀ་ཁྱོར་ནང་༸གོང་ས་༸སྐྱབས་མགོན་ཆེན་པོ་མཆོག་གིས་དེ་གའི་མི་མང་གི་ལས་གཞི་སེམས་ཁམས་ཚན་རིག་སོགས་ཀྱི་བྱེད་སྒོ་ཁག་ནང་ལྷན་ཞུགས་མཛད་རྒྱུ་ཡིན་འདུག་པ་བཅས། །
