༢༠༡༢ ཟླ་ ༡༡ ཚེས་ ༢༢ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེན་པོ་ཧོར་གྱི་མཆོག་སྤྲུལ་བསྟན་འཛིན་འཇམ་དཔལ་ཆོས་ཀྱི་བཤེས་གཉེན་མཆོག་གིས་དབུས་དད་ལྡན་ཆོས་ཞུ་བ་རྣམས་ལ་བྱང་ཆུབ་སེམས་བསྐྱེད་དང་དགེ་བསྙེན་སྡོམ་པ་འབོག་ཆོག་མཛད་རྗེས་གསང་བདག་ཕྱག་ན་རྡོ་རྗེའི་བཀའ་དབང་བཀའ་དྲིན་སྩལ།
དེ་ཉིན་སྔ་དྲོ་ཆུ་ཚོད་ ༦།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་ནས་ཆེན་པོ་ཧོར་གྱི་མཆོག་སྤྲུལ་བསྟན་འཛིན་འཇམ་དཔལ་ཆོས་ཀྱི་བཤེས་གཉེན་མཆོག་དང་ཀལ་མུག་སྤྱི་མཐུན་རྒྱལ་ཁབ་ཀྱི་ནང་པའི་གཙོ་འཛིན་ཏེ་ལོ་རིན་པོ་ཆེ་མཆོག་གིས་སྤོས་སྣེས་སྔོན་བསུས་ཏེ་༸གོང་ས་མཆོག་ཕོ་བྲང་ནས་གདན་ཞུས་ཀྱི་ཐེག་ཆེན་ཆོས་གླིང་གཙུག་ལག་ཁང་དུ་བཀའ་དབང་གི་སྒྲུབ་བཞག་སྔོན་དུ་བཏང་བའི་སྒོ་ནས་ཆུ་ཚོད་ ༩ ཐོག་བཞུགས་ཁྲིར་༸ཞབས་སོར་འཁོད་རྗེས་དབང་གི་བདག་བསྐྱེད་དབུ་འཛུགས་དང་འབྲེལ་བྱང་ཆུབ་སེམས་བསྐྱེད་དང་། 
ཁྱིམ་པ་ཕོ་མོ་རྣམས་ལ་དགེ་བསྙེན་གྱི་སྡོམ་འབོག་ཆོག གསང་བདག་ཕྱག་ན་རྡོ་རྗེའི་དབང་གི་སྟ་གོན་དང་དངོས་གཞི་བཅས་སྩལ་རྗེས་ཉིན་རྒྱབ་དབང་གི་འཕྲོ་སྐྱོང་སྩལ་རྗེས་ཆེན་པོ་ཧོར་གྱི་དད་ལྡན་ཆོས་ཞུ་བས་གཙོས་ཆོས་བ་ཞུ་རྣམས་ཀྱི་ཆོས་ཉམས་ལེན་ཐོག་ལ་འབད་འབུངས་དགོས་པའི་སྐུལ་མ་མཛད་རྗེས་སོག་ཡུལ་ནས་ཆེད་དུ་བཅར་བའི་ཆོས་ཞུ་བ་རྣམས་ལ་ཉིན་གཉིས་ཀྱི་ཆོས་འབྲེལ་དེའི་སྐོར་གྱི་དོགས་དྲི་འབུལ་རྒྱུའི་གོ་སྐབས་སྩལ་བ་བཞིན་ཁོང་རྣམ་པའི་དྲི་བ་ཁག་ལ་བཀའ་ལན་བཀའ་དྲིན་ཆེ་བ་སྩལ་ཏེ་ཐེངས་འདིའི་ཆོས་འབྲེལ་ཡོངས་སུ་ལེགས་པར་གྲུབ་པ་བཅས།།
