༢༠༡༢ ཟླ་ ༡༡ ཚེས་ ༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༤ ཉིན་རེས་གཟའ་ཉི་མའི་ཉིན་དཔལ་ལྡན་རྒྱུད་སྟོད་གྲྭ་ཚང་དུ་རྒྱུད་སྟོད་དགོན་པ་ནས་གོ་སྒྲིག་འོག་བོད་བསྟན་སྲིད་ཆེད་རང་ལུས་མེར་སྲེག་གི་ལམ་ནས་རྒྱ་གཞུང་གི་གདུག་རྩུབ་ཅན་གྱི་སྲིད་བྱུས་ལ་ཞི་རྒོལ་གནང་མཁན་རྒྱལ་གཅེས་པ་ཕོ་མོ་འདས་ཡོངས་ཀྱི་སླད་མཆོད་འབུལ་སྨོན་ལམ་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༠༠ བའི་ཐོག་བཞུགས་སྒར་རྡ་སའི་ཉེ་འགྲམ་དཔལ་ལྡན་རྒྱུད་སྟོད་གྲྭ་ཚང་དུ་རྒྱུད་སྟོད་མཁན་རིན་པོ་ཆེ་ལོ་དགོན་སྤྲུལ་སྐུ་བསྟན་འཛིན་ཆོས་བཟང་མཆོག་དང་བླ་མ་དབུ་མཛད་ཐུབ་བསྟན་བསྟན་འཛིན་མཆོག་རྣམ་གཉིས་དབུ་བཞུགས་ཐོག རྒྱུད་སྟོད་གྲྭ་ཚང་གི་མཁན་བླ་འདུས་མང་ཡོངས་དང་། བཙུན་དགོན་འཇམ་དབྱངས་ཆོས་གླིང་དང་སྒྲོལ་མ་གླིང་གི་བཙུན་མ། དེ་བཞིན་བཞུགས་སྒར་རྡ་ས་དང་ནོར་གླིང་ཉེ་འཁྲིས་ཀྱི་སེར་སྐྱ་མི་མང་བཅས་ཁྱོན་མི་ ༦༠༠ ལྷག་འདུ་འཛོམས་ཐོག་སྤྱིར་བོད་བསྟན་སྲིད་མི་རིགས་དང་རང་དབང་དོན་དུ་རང་ལུས་མེར་སྲེག་གཏོང་མཁན་གྱི་རྒྱལ་གཅེས་པ་ཕོ་མོ་ཡོངས་དང་། ཡང་སྒོས་ཁོང་རྣམ་པའི་ཤུལ་ལུས་ནང་མི་རྣམས་ལ་གདུང་སེམས་མཉམ་སྐྱེ་ཆེད། རྒྱུད་སྟོད་གྲྭ་ཚང་གི་མཁན་བླ་འདུས་མང་ཡོངས་ནས་དཔལ་རྡོ་རྗེ་འཇིགས་བྱེད་ཀྱི་བདག་འཇུག་གི་ཆོ་གའི་སྒོ་ནས་མཆོད་འབུལ་སྨོན་ལམ་ཚོགས་གནང་བ་མ་ཟད། ཉིན་གཅིག་རིང་གི་མཆོད་འབུལ་སྐབས་རྒྱུད་སྟོད་གྲྭ་ཚང་གིས་དེར་འདུས་དགེ་བཙུན་སྔགས་གསུམ་ལ་སྐུ་འགྱེད་དང་གསོལ་ཇ། དེ་བཞིན་སྨོན་ལམ་དུ་ཕེབས་པའི་མི་མང་སོགས་ལ་ཉིན་གུང་ཞལ་ལག་ཀྱང་བཤམས་ཡོད།
སྤྱིར་བཏང་རྒྱ་ནག་གཞུང་ནས་བོད་མི་རིགས་ལ་གཉའ་གནོན་དང་བཤུ་གཞོག་དཔལ་འབྱོར་དབྱེ་འབྱེད། དེ་བཞིན་བོད་མིའི་འགྲོ་སྡོད་སྤྱོད་གསུམ་གྱི་རང་དབང་བཙན་འཕྲོག་གིས་བོད་མིར་དྲག་རྡུང་ཁོ་ནའི་སྲིད་བྱུས་ལག་བསྟར་བྱས་ཏེ་མི་ལོ་ལྔ་བཅུ་ལྷག་བརྒལ་བ་འགྲོ་མུས་ཡིན་པར་བརྟེན། ཆེས་གདུག་རྩུབ་ཅན་གྱི་སྲིད་བྱུས་དེར་བོད་མི་རྣམས་བཟོད་ཐབས་བྲལ་ཏེ་ཕྱི་ལོ་ ༢༠༠༩ ཟླ་ ༢ ཚེས་ ༢༧ ཉིན་དགེ་འདུན་པ་བཀྲ་བྷེ་ལགས་ཀྱིས་འགོ་འཛུགས་ཀྱི་ད་བར་གཞིས་ལུགས་བོད་མི་ཁྱོན་གྲངས་ ༦༢ གིས་བོད་བསྟན་སྲིད་དང་བོད་མི་རིགས་ཆེད་རང་ལུས་མེར་སྲེག་བཏང་སྟེ་རྒྱ་གཞུང་ལ་ཞི་རྒོལ་གནང་ཡོད་པ་བཅས། །
