༢༠༡༢ ཟླ་ ༡༡ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༡༥ ཉིན་རྡ་ས་གངས་སྐྱིད་ལས་བྱེད་གསོལ་ཐབ་ཡང་སྟེང་ཚོགས་ཁང་དུ་ནང་སྲིད་ལས་ཁུངས་ནས་གོ་སྒྲིག་ཐོག་བོད་མིའི་སྒྲིག་འཛུགས་ནང་སྲིད་ཁྱབ་ཁོངས་ས་གནས་འགོ་འཛིན་ལས་ཁུངས་ཁག་གི་རྩིས་པ་ཚོར་ཉིན་དགུའི་རིང་གི་ཟབ་སྦྱོང་དབུ་འཛུགས་གནང་ཡོད།
དེ་ཉིན་སྔ་དྲོ་ཆུ་ཚོད་ ༡༡ ཐོག་སྐུ་མགྲོན་གཙོ་བོ་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་དང་། ནང་སྲིད་བཀའ་བློན་རྒྱ་རི་སྒྲོལ་མ་མཆོག ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས། ནང་སྲིད་སྡེ་ཚན་ཁག་གི་འགན་འཛིན་དང་འབྲེལ་ཡོད་ལས་བྱེད་རྣམ་པ། ཕྱོགས་མཐའི་ས་གནས་ཁག་གི་ཟབ་སྦྱོང་དུ་བཅར་མཁན་རྣམ་པ་བཅས་ཁྱོན་མི་གྲངས་ ༤༠ བརྒལ་བ་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་ཕུལ་རྗེས་སྣང་གསལ་ཞལ་ཕྱེ་གནང་། དེ་ནས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་ཀྱིས་ཁྲིམས་སྒྲིག་དང་མཐུན་པའི་རྩིས་པའི་དགོས་དམིགས་སྐོར་ངོ་སྤྲོད་གནང་གྲུབ་བསྟུན་ས་གནས་ཁག་གི་ཟབ་སྦྱོང་བ་སོ་སོས་རང་ཉིད་ཚོགས་བཅར་བ་རྣམས་ལ་ངོ་སྤྲོད་གནང་།
དེ་རྗེས་ནང་སྲིད་བཀའ་བློན་མཆོག་གིས་གསུང་གནང་དོན། གཞི་རྩའི་བོད་ཀྱི་རང་དབང་འཐབ་རྩོད་ཀྱི་ལོ་རྒྱུས་ནང་དུས་ཚོད་ཛ་དྲག་པོ་ཞིག་ལ་ཐུག་པའི་སྐབས་འདིར་ང་ཚོ་བོད་པ་སུ་འདྲ་ཞིག་ཡིན་ཡང་འཚོ་བ་སོགས་ཀྱི་ཆེད་སྐྱིད་པོ་བྱས་ཏེ་སྡོད་པའི་དུས་ཚོད་མིན་པ་ནི་རང་བཞིན་ཆགས་ཡོད། བོད་ནང་ན་གཞོན་ཕོ་མོ་རིམ་པ་བྱས་ཏེ་མང་པོ་ཞིག་གིས་རང་གི་རྒྱལ་ཁབ་དང་མི་རིགས། ལྷག་པར་དུ་༸གོང་ས་མཆོག་རང་ཡུལ་བོད་ལ་ཆིབས་སྒྱུར་ཐུབ་པ་ཞིག་དང་བོད་ལ་རང་དབང་གི་དགོས་པའི་དགོས་འདུན་ཆེད་རང་གི་རྩ་ཆེ་བའི་ལུས་པོ་མེར་སྲེག་གི་ལས་འགུལ་སྤེལ་བཞིན་ཡོད་པ་དང་། དེ་ཡང་རྒྱལ་ཁབ་དང་མི་རིགས་ཀྱི་ལ་རྒྱ་ཟེར་བ་ཆབ་སྲིད་ཀྱི་རྣམ་འགྱུར་ཤུགས་ཆེན་པོ་བསྟན་པའི་ལས་ཀ་ཙམ་མིན་པར་ང་ཚོ་ཚང་མས་སོ་སོར་འཁྲིས་པའི་ལས་འགན་ངེས་པར་ཏག་ཏག་འཁྱེར་དགོས་པའི་དུས་ལ་འབབ་ཡོད། བོད་ཀྱི་བདེན་མཐའ་སེལ་རྒྱུ་དང་རྩ་དོན་ཆེད་བོད་མིའི་སྒྲིག་འཛུགས་འདི་སྲ་བརྟན་གྱི་ནུས་པ་ལྡན་པ་དང་༸གོང་ས་མཆོག་གིས་ཐུགས་རེ་ལྟར་ཡང་དག་པའི་མང་གཙོའི་སྒྲིག་འཛུགས་ལ་ད་ལྟ་བར་དུ་དཀའ་ངལ་སྐྱོན་མཁན་བཀའ་ཟུར་དང་སྲིད་སྐྱོང་སོགས་རིམ་པ་བྱོན་ཡོད་ལ་མང་གཙོའི་སྒྲིག་འཛུགས་ནང་ལ་འཁྲིས་པའི་ལས་འགན་དེ་གལ་ཆེ་ཤོས་ཞིག་ཆགས་ཡོད། ཅེས་སོགས་ཀྱི་གསུང་བཤད་གནང་ཡོད།
དེ་རྗེས་སྐུ་མགྲོན་གཙོ་བོ་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག་གིས་གསུང་བཤད་གནང་དོན། དེ་རིང་འབྲེལ་བ་ཆགས་ཟབ་སྦྱོང་ནང་མཉམ་བཞུགས་གནང་མཁན་རྣམ་པར་འཚམས་འདྲི་ཞུ་རྒྱུ་དང་། ས་གནས་འགོ་འཛིན་ལས་ཁུངས་ཁག་གི་རྩིས་པ་ཚང་མ་དགུང་ལོ་གཞོན་གཞོན་དང་ཕྱག་ལས་གནང་གི་རེད་བསམ་པ་དེ་འདྲ་འདུག ཞེ་དྲག་དགའ་པོ་བྱུང་། ང་ཚོ་ཐོག་མར་གཞུང་ཞབས་ནང་འཛུལ་བའི་སྐབས་ལ་བསམ་པ་བཞིན་ཡོང་རྒྱུ་སྣ་ཚོགས་ཡོད། འདིའི་ནང་རྩིས་ཀྱི་རྒྱབ་ལྗོངས་ཡོད་པའི་ཐོག་རྩིས་པ་དང་ལས་དྲུང་གནང་མཁན་ཡོད། རྩིས་པ་དང་ལས་དྲུང་རྒྱབ་ལྗོངས་མེད་པའི་ཐོག་ནས་ཕྱག་ལས་གནང་མཁན་ཡང་ཡོད། བཙན་བྱོལ་བོད་མིའི་སྒྲིག་འཛུགས་ཀྱི་འགྲོ་སྟངས་ཀྱི་ཆ་ནས་ཁྱད་ལས་པའི་ལས་བྱེད་ས་བཅད་གཅིག་ཡོད། དེ་མིན་ལས་བྱེད་དེ་དག་གར་བཏང་གོ་ཆོད་ཅིག་དགོས་ཀྱི་ཡོད། བོད་མིའི་སྒྲིག་འཛུགས་ལ་སྦྱིན་བདག་དམིགས་བསལ་མེད་ཀྱང་སྦྱིན་བདག་དེ་བོད་ཕྱི་ནང་གཉིས་ཀྱི་བོད་མི་རྣམས་ཆགས་ཀྱི་ཡོད། དེའི་འགན་འཁྱེར་མཁན་བཀའ་ཤག་དང་བཀའ་བློན་རྣམ་པ་རེད། ང་ཚོའི་རེ་བར་གཞུང་ཞབས་རྣམ་གར་བཏང་གོ་ཆོད་ཅིག་བྱུང་ན་བསམ་གྱི་ཡོད། དེ་འདྲའི་ཆ་ནས་རྒྱབ་ལྗོངས་གང་ཡོད་མིན་ལ་མ་བལྟོས་པར་བཀའ་ཤག་གི་ལས་འགན་བཀོད་སྒྲིག་དང་།
དེ་བཞིན་ནང་སྲིད་ལས་ཁུངས་ཀྱི་ལས་འགན་བཀོད་སྒྲིག་དེ་དག་ཚགས་ཚུད་པོ་དང་མཐར་ཕྱིན་པ་ལྷག་བསམ་རྣམ་དག་གིས་ལས་འགན་ཞུ་དགོས་པ་གལ་ཆེན་པོ་རེད། སྒྲིག་འཛུགས་ངོས་ནས་ད་རེས་རྩིས་ཀྱི་ཟབ་སྦྱོང་གོ་སྒྲིག་གནང་བ་དེའང་མཐུན་རྐྱེན་སྐྲུན་པ་ཞིག་ངོས་འཛིན་བྱེད་ཀྱི་ཡོད། དངོས་ཡོད་གནས་སྟངས་ལ་རྩིས་པའི་ལས་འགན་སོང་ད་རེས་མཐར་ཕྱིན་པ་ཞིག་སྦྱང་སྟེ་སྔོན་མ་ལས་ཀ་གང་ཞུ་གི་ཡོད་པ་དེའི་སྟེང་ཚགས་ཚུད་དུ་བཏང་རྒྱུའི་འབད་བརྩོན་བྱེད་དགོས་པ་སེམས་བཅངས་བྱེད་དགོས་པ་གལ་ཆེན་པོ་རེད། སྤྱིར་བཏང་སྒྲིག་འཛུགས་གང་འདྲ་ཞིག་ཡིན་ཡང་ཟབ་སྦྱོང་སྤྲོད་དགོས་ཀྱི་ཡོད། སྒྲིག་འཛུགས་དེའི་ལས་དོན་བྱེད་ཕྱོགས་ཀྱི་བསམ་བློའི་འཁྱེར་བཟོ་དང་། ལས་ཀ་གང་ཡིན་པ་དེའི་གནད་འགག་ཤེས་རྒྱུ་ཁག་གཉིས་རེད། རྣམ་པ་ཚོར་ཐུགས་ཕན་གསོས་པའི་རེ་བ་ཞུ་གི་ཡོད། རྩིས་པ་ལྟ་བུ་ཆ་བཞག་ན་རྩིས་ཀྱི་གནས་སྟངས་ཡག་པོ་ཡོད་ཀྱང་། ལྷག་བསམ་དང་བསམ་བློའི་འཁྱེར་ཕྱོགས་མ་འདང་བའི་ཐོག་ནས་ལས་ཀ་ཚགས་ཚུད་མི་ཡོང་བ་དང་། ལྷག་བསམ་དང་སེམས་ཤུགས་ཆེན་པོ་ཡོད་ཀྱང་། རྩིས་ཀྱི་རྒྱབ་ལྗོངས་དང་གནད་འགག་མི་ཤེས་པའི་ཐོག་ནས་ལ་ཀ་ཚགས་ཚུད་མི་ཡོང་བའི་རྒྱུ་རྐྱེན་ཆོས་ཉིད་རེད། དོན་གནད་གཉིས་ཐོག་ནུས་པ་ཐོན་པའི་སློབ་གསོ་ཐེབས་པའི་གླེང་སྟེགས་ཀྱི་ཟབ་སྦྱོང་འདི་ཚོགས་ཡོད། དེ་བཞིན་སྒྲིག་གཞི་དང་མ་འགལ་བའི་ཐོག་དངུལ་རྩིས་ཉིན་རེ་བཞིན་གཙང་མ་བཟོ་དགོས་སྐོར། ཅེས་སོགས་ཀྱི་དབུ་འབྱེད་གསུང་བཤད་གནང་རྗེས་ནང་སྲིད་ཟུང་དྲུང་ཚེ་དབང་སྒྲོལ་མ་ལགས་ཀྱིས་ཐུགས་རྗེ་ཆེ་ཞུས་ཏེ་དབུ་འབྱེད་མཛད་སྒོ་ལེགས་པར་གྲུབ།
ཐེངས་འདིའི་རྒྱ་གར་ནང་གི་གཞིས་ཆགས་ཁག་གི་ས་གནས་འགོ་འཛིན་ལས་ཁུངས་ཁག་ནས་རྩིས་པ་ ༣༣ མཉམ་བཞུགས་ཀྱི་ཉིན་གྲངས་ ༩ རིང་གཞི་རྩའི་རྩིས་ཀྱི་ངོ་སྤྲོད་དང་། རྩིས་ཁྲ་བཟོ་སྟངས། དངུལ་རྩིས་བཏང་འཛིན། སྔོན་རྩིས་འབུལ་ཕྱོགས། སྔོན་རྩིས་འཆར་འབུལ་ཞུ་ཕྱོགས། tallyབེད་སྤྱོད་བྱ་ཕྱོགས། ཨར་རྒྱག་ལས་གཞི་དང་འབྲེལ་བའི་བྱེད་སྒོ་ལམ་སྟོན་དང་། དབུས་ས་གཉིས་ཀྱི་རྩིས་ཁྲ་ཉར་ཕྱོགས། རྩིས་ཞིབ་སྙན་ཐོ་མཇུག་གནོན་ཞུ་དགོས་བཅས་ཀྱི་ཐད་དབུས་ལས་ཁུངས་ཀྱི་རྩིས་ཀྱི་ཆེད་ལས་རྐང་འཛིན་པ་མི་སྣ་ ༨ ཙམ་ནས་ཟབ་འཁྲིད་གནང་རྒྱུ་ཡིན་འདུག་པ་བཅས།།
