༢༠༡༢ ཟླ་ ༡༡ ཚེས་ ༥ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༢ ཟླ་ ༡༡ ཚེས་ ༥ ཉིན་བཏང་གནས་ནང་འཁོད་དོན། ལོ་ལྟར་ཐེ་ཝན་ཤར་ཕྱོགས་ཁུལ་དུ་(TAROKO MARATHON)ཞེས་པའི་རྒྱང་རྒྱུགས་འགྲན་ཚོགས་ཆེན་མོ་སྤེལ་བཞིན་ཡོད་པ་ལྟར། ཕྱི་ལོ་ ༢༠༡༢ ལོའི་རྒྱང་རྒྱུགས་འགྲན་ཚོགས་ཆེན་མོའི་ནང་རྒྱལ་སྤྱིའི་སློབ་ཕྲུག་བོད་དོན་རྒྱབ་སྐྱོར་ཚོགས་པ་ཐེ་ཝན་ཡན་ལག་གི་སློབ་ཕྲུག་ཚོགས་པས་མཉམ་ཞུགས་གནང་ཡོད་པ་རེད།
ཕྱི་ཟླ་ ༡༡ ཚེས་ ༣ རེས་གཟའ་སྤེན་པ་ཉིན་ཐེ་ཝན་གྱི་ཡུལ་མིས་གཙོས་རྒྱལ་ཁབ་གྲངས་ ༢༨ ནས་ཕེབས་པའི་ལུས་རྩལ་བ་ཁྱོན་མི་གྲངས་ཁྲི་བརྒལ་བས་རྒྱང་རྒྱུགས་ཆེན་མོའི་ནང་མཉམ་ཞུགས་གནང་ཡོད་པ་དང་། དེའི་ཁྲོད་སློབ་ཕྲུག་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་རྒྱུན་ལས་སོགས་མི་གྲངས་བཅུ་ཙམ་གྱིས་གདོང་པར་བོད་ཀྱི་རྒྱལ་དར་བྲིས་པ་དང་། ལུས་སྟེང་དང་ལག་ཐོག་ཏུ་བོད་ཀྱི་རྒྱལ་དར་དང་། བོད་ཀྱི་མཚོན་རྟགས་གཡག་གི་འདྲ་གཟུགས་སོགས་འཁྱེར་ཏེ་འགྲན་རྒྱུགས་ནང་མཉམ་ཞུགས་གནང་བ་ཙམ་མ་ཟད། སྡིངས་ཆའི་སྟེང་ལངས་ཏེ་བོད་ནང་འགྲོ་བ་མིའི་ཐོབ་ཐང་གི་གནས་སྟངས་སྐོར་ངོ་སྤྲོད་གནང་ཡོད། སློབ་ཕྲུག་ལིན་ལགས་ཀྱི་པུས་མོའི་ནད་རྙིང་གིས་རྐྱེན་པས་འགྲན་རྒྱུགས་ཆ་ཚང་ནང་ཞུགས་མ་ཐུབ་ཀྱང་། ཁོང་པའི་རེ་བར་ལོ་རྗེས་མར་འབད་བརྩོན་བྱ་རྒྱུའི་སེམས་ཤུགས་ཡོད། རྒྱུ་མཚན་ནི་བོད་ནང་གི་བོད་མིས་རང་གི་མངོན་འདོད་མཚོན་ཆེད་ཉེས་རྡུང་དང་། བཙོན་འཇུག གཅེས་པའི་ལུས་སྲོག་ཚུན་བློས་གཏོང་ཐུབ་ཀྱི་ཡོད་པས། རང་ཉིད་ཀྱི་ལུས་པོའི་རྔུལ་ཆུ་དང་ངལ་བ་ནི་གང་ཡང་མ་རེད་ཅེས་བརྗོད་ཡོད།
ཐེངས་འདིའི་འགྲན་ཚོགས་ནང་སློབ་ཕྲུག་བོད་དོན་རྒྱབ་སྐྱོར་ཚོགས་པའི་ཆས་གོས་སོགས་ལ་དོ་སྣང་བྱེད་ཡུལ་དུ་གྱུར་བ་མ་ཟད། གསར་འགྱུར་བརྒྱུད་ལམ་ཐོག་དམིགས་བསལ་བཀོད་ཐོན་བྱུང་ཡོད། ལྷག་དོན་ཐེངས་འདིའི་འགྲན་ཚོགས་ནང་སློབ་ཕྲུག་བོད་དོན་རྒྱབ་སྐྱོར་ཚོགས་པར་སྤྱི་ཡོངས་ཀྱི་ཆས་གོས་དམིགས་བསལ་གྱི་བྱ་དགའ་ཨང་དང་པོ་ཐོབ་ཡོད་པ་བཅས། །
