༢༠༡༢ ཟླ་ ༡༡ ཚེས་ ༧ རེས་གཟའ་ལྷག་པ།
༄༅ །འདི་གར་ཕྱི་དྲིལ་དབྱིན་ཡིག་ཚན་པའི་གསར་འགོད་པ་འཇམ་དཔལ་གཞོན་ནུ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༡ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཡོ་ཀོ་ཧ་མ་རྒྱལ་སྤྱིའི་གསོལ་མགྲོན་ཁང་ནང་ (Yokohama
Intercontinental hotel) གསར་འགོད་ལྷན་ཚོགས་ཤིག་ཚུགས་སྐབས་བཀའ་སློབ་སྩལ་དོན། ཉེ་ལམ་རྒྱ་ནག་ནང་ཉི་ཧོང་ལ་ངོ་རྒོལ་བྱས་པར་བརྟེན། ངོས་རང་ཉི་ཧོང་དུ་མ་ཡོང་གོང་སེམས་འཚབ་ཕྲན་བུ་བྱུང། འོན་ཀྱང་རྒྱ་ནག་གི་མི་མང་མང་པོ་ཞིག་ནས་ངོས་རང་ཉི་ཧོང་འགྲོ་རྒྱུར་རྒྱབ་སྐྱོར་བྱེད་བཞིན་འདུག ངོས་རང་ལ་མགྲོན་འབོད་གནང་མཁན་མང་པོ་ཡོད་པར་བརྟེན། ལོ་མང་རིང་ནས་ཡུལ་འདིར་བསྐྱོད་བཞིན་ཡོད། ངོས་ཀྱིས་ཡུལ་འདིའི་ནང་པ་ཚོར་ཕྲན་བུའི་ཕན་ཐོགས་བྱེད་ཐུབ་ཀྱི་ཡོད་པ་མ་ཟད། ཉི་ཧོང་མང་ཚོགས་རྣམས་ལ་ངོས་ཀྱིས་ཉམས་མྱོང་བརྗེ་ལེན་བྱེད་རྒྱུ་དེ་ངོས་ཀྱི་འགན་ཞིག་ཀྱང་ཆགས་ཡོད།
ངོས་ཀྱིས་འདི་ལོ་ཨ་རིའི་ནང་རྟེན་གཞི་བྱས་པའི་ཧན་ཊར་གཙུག་ལག་སློབ་གྲྭར་ (Hunter college) བསྐྱོད་སྐབས་རྒྱ་རིགས་སློབ་ཕྲུག་དང་གཙུག་ལག་སློབ་དཔོན་སོགས་དང་ཐུག་འཕྲད་སྐབས་ངོས་རང་ཉི་ཧོང་དུ་བསྐྱོད་རྒྱུའི་ཐོག་བསམ་ཚུལ་ཇི་ཡོད་དྲིས་པར་ཚང་མས་རྒྱབ་སྐྱོར་བྱེད་བཞིན་འདུག ཅེས་བཀའ་སློབ་སྩལ་རྗེས་༸གོང་ས་མཆོག་གིས་མཛད་ཁུར་གཙོ་བོ་གསུམ་ཐོག་བཀའ་སློབ་སྩལ་དོན།
ངོས་ཀྱི་འགན་ཁུར་གཙོ་བོ་གསུམ་ཡོད་པ་རྣམས་ནི། འགྲོ་བ་མིའི་ནང་གི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུ། དེ་བཞིན་འཛམ་གླིང་ཁྱོན་ཡོངས་ཀྱི་ནང་པ་རྣམས་དུས་རབས་ ༢༡ པའི་ནང་པ་ཚད་ལྡན་ཞིག་ཡོང་ཐབས་བྱེད་དགོས་པའི་འབོད་སྐུལ་ཞུ་རྒྱུ་དེ་ཡིན། དེ་སྔ་ངོས་ལ་འགན་ཁུར་གཙོ་བོ་གསུམ་ཡོད་པ་ནས་གསུམ་པ་དེ་བོད་དོན་འཐབ་རྩོད་ཀྱི་འགོ་ཁྲིད་རྒྱུ་དེ་ཡིན་ནའང་། ཕྱི་ལོ་ ༢༠༠༡ ནས་ངོས་རང་བོད་མིའི་ཆབ་སྲིད་འགོ་ཁྲིད་ཀྱི་ལས་འགན་ནས་ཕྱེད་རྒས་ཡོལ་ཞུས་ཡོད། དེ་རྗེས་ཕྱི་ལོ་ ༢༠༡༡ ལོར་ངོས་ཀྱིས་བོད་མིའི་ཆབ་སྲིད་ཀྱི་དབང་ཆ་ཡོངས་རྫོགས་མང་གཙོའི་ལམ་ནས་ཐད་ཀར་མི་མང་གིས་འོས་འདེམས་བྱས་པའི་སྲིད་སྐྱོང་ལ་རྩིས་སྤྲོད་བྱས་པ་ནས་བཟུང་ངོས་ཀྱིས་རྒས་ཡོལ་ཆ་ཚང་ཞུས་ཟིན་པ་ཡིན། ཞེས་བཀའ་སློབ་སྩལ་རྗེས་གསར་འགོད་པའི་དྲི་བར་བཀའ་ལན་སྩལ།
སྐབས་དེར་གསར་འགོད་པ་ཞིག་གིས་རྒྱ་ནག་དང་ཉི་ཧོང་དབར་དེང་སྐབས་འབྲེལ་ལམ་ཇེ་སྡུག་ཏུ་འགྲོ་བཞིན་པའི་ཐོག་དགོངས་ཚུལ་ཇི་ཡོད་ཀྱི་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། རྒྱ་ནག་དང་ཉི་ཧོང་ཕན་ཚུན་གཉིས་ཀར་དགོས་ངེས་ཆགས་ཡོད་པ་ནི་འཛམ་གླིང་ཤར་ཕྱོགས་པ་ཚོར་ནུབ་ཕྱོགས་པ་དགོས་པ་དང་ནུབ་ཕྱོགས་པ་ཚོ་ལའང་ཤར་ཕྱོགས་པ་དགོས་ངེས་ཆགས་པ་དང་གཅིག་མཚུངས་ཆགས་ཡོད། གནས་སྟངས་འདི་ནི་དེང་སྐབས་འཛམ་གླིང་ནང་གི་དངོས་ཡོད་ཀྱི་གནས་སྟངས་ཤིག་ཆགས་ཡོད། དེར་བརྟེན་དབུ་ཁྲིད་ཚོ་གཙོ་བོར་གྱུར་བའི་མི་མང་ཚོས་ཕྱོགས་ཡོངས་ཀྱི་གནས་སྟངས་ཐོག་བསམ་བློ་བཏང་སྟེ་དངོས་ཡོད་སྟངས་ལ་གདོང་ལེན་གནང་ཐབས་བྱེད་དགོས་པ་ལས་འཕྲལ་གྱི་ཁེ་ཕན་དང་མི་མཐུན་པའི་བསམ་ཚུལ་ཕྲན་བུ་བྱུང་བ་དེས་ཕུགས་ཀྱི་ཁེ་ཕན་ལ་དགོག་རྐྱེན་བཟོ་རྒྱུ་དེ་མ་སྒྲིག་པ་ཞིག་ཡིན། དེང་སྐབས་དཀའ་ངལ་འཕྲད་སྐབས་མང་ཚོགས་ཀྱིས་ཁོང་ཁྲོའི་རྣམ་པ་ཧ་ཅང་ཤུགས་ཆེན་པོ་སྟོན་རྒྱུ་དེ་ཡང་ཕྱོགས་གཅིག་ནས་ཤེས་ཡོན་སློབ་གསོའི་ནང་ཡ་རབས་བཟང་སྤྱོད་ཐོག་སློབ་གསོ་མ་འདེང་བ་དང་།
གཉིས་ནས་རྒྱལ་ཁབ་འདྲ་མིན་སོ་སོའི་ཤེས་ཡོན་གྱི་ལམ་ལུགས་ནང་ཚད་ལས་བརྒལ་བའི་རྒྱལ་ཞེན་གྱི་ལྟ་བ་སྤེལ་ཐབས་བྱེད་བཞིན་པ་དེས་ཡིན། ཤེས་ཡོན་ལམ་ལུགས་དེ་འདྲའི་འོག་དངོས་ཡོད་གནས་སྟངས་ལ་གཞིར་བཞག་སྟེ་ཕྱོགས་ཡོངས་ཀྱི་གནས་སྟངས་ཐོག་བསམ་བློ་གཏོང་རྒྱུའི་ཚབ་ཏུ་ཕྱོགས་ལྷུང་གི་བསམ་པ་ཤུགས་ཆེ་རུ་བཏང་སྟེ། སེམས་འཚོར་ཧ་ཅང་སྤེལ་བཞིན་ཡོད་པ་ནི་དཔེར་ན། རྒྱ་ནག་ནང་ད་ཆ་རྒྱལ་ཞེན་གྱི་ལྟ་བ་ཧ་ཅང་སྤེལ་བཞིན་ཡོད། སྤྱིར་རྒྱ་རིགས་ཚོས་རང་གི་ཡུལ་དང་རིག་གཞུང་ལ་རྒྱལ་ཞེན་ངེས་པར་དུ་བྱེད་དགོས་ཀྱང་རྒྱ་མི་རིགས་དེ་འཛམ་གླིང་ནང་ཕྱོགས་ཏུ་གྱུར་བ་ཁོ་ན་ཡིན་བསམ་པའི་བསམ་བློ་དེ་ཡག་པོ་ཞིག་མིན། ང་ཚོས་དེང་རབས་གཞོན་སྐྱེས་མི་རབས་གསར་པ་ཚོས་ནོར་བ་རེད་ཅེས་ཁོང་ཚོར་ཁག་དཀྲི་བྱེད་མི་རུང་ཁོང་ཚོའི་ཤེས་ཡོན་ལམ་ལུགས་ནང་འཕྲལ་གྱི་ཁེ་ཕན་ཇི་འདྲ་བསྒྲུབ་དགོས་མིན་ཁོ་ནའི་ཐོག་སློབ་གསོ་བྱེད་བཞིན་ཡོད་པས་ཡིན།
་ཕྱོགས་མཚུངས་སྐབས་དེར་གསར་འགོད་པ་ཞིག་གིས་མང་གཙོའི་རིང་ལུགས་ཀྱི་གནས་སྟངས་དང་ལམ་ལུགས་དེར་ཞན་ཆ་ཇི་ཡོད་ཀྱི་དྲི་བ་ཕུལ་བར་༸གོང་ས་མཆོག་གིས་བཀའ་ལན་ཕེབས་དོན། མང་གཙོའི་ལམ་ལུགས་དེར་སྐྱོན་ཡོད་ཀྱང་ང་ཚོར་འདེམས་ཀ་ཡག་ཤོས་ཡོད་པ་ནི་ལམ་ལུགས་དེ་རང་ཡིན་པ་དང་། མང་གཙོའི་ཐབས་ལམ་ཁོ་ནའི་ཐོག་ནས་རྒྱ་ནག་ནང་བརྟན་ལྷིང་དང་འཆམ་མཐུན་གྱི་སྤྱི་ཚོགས་ཤིག་བསྐྲུན་ཐུབ་རྒྱུ་ཡིན་པ་དང་། བརྟན་ལྷིང་དང་འཆམ་མཐུན་གྱི་སྤྱི་ཚོགས་བསྐྲུན་དགོས་ན། ཁྲིམས་ལུགས་ལ་རང་དབང་དང་གསར་འགོད་རང་དབང་ཁྲིམས་ཀྱི་དབང་འགྱུར་དགོས། དེ་འདྲ་བྱུང་ན་དབུལ་ཕྱུག་དབར་གྱི་ཁྱད་པར་ཉུང་དུ་གཏོང་ཐུབ།
དེ་ལས་ལྡོག་སྟེ་འཆམ་མཐུན་བསྐྲུན་རྒྱུར་སྙད་དེ་རང་གི་མི་མང་ཐོག་གསང་བ་དང་གཉའ་གནོན་བྱས་པ་སོགས་ལ་བརྟེན་ནས་རྒྱ་ནག་རྒྱལ་ནང་གི་བདེ་འཇགས་སྲུང་སྐྱོབ་ཀྱི་འགྲོ་གྲོན་དེ་ཕྱིའི་བདེ་འཇགས་ཀྱི་འགྲོ་སོང་ལས་ཆེ་བ་ཡོང་བཞིན་ཡོད། དེར་བརྟེན་རྒྱ་ནག་གི་དགྲ་བོ་ངོ་མ་དེ་རྒྱལ་ནང་དུ་ཡོད་པར་ངོས་འཛིན་བྱེད་བཞིན་ཡོད་པ་ཧ་ཅང་གསལ་པོ་མཚོན་བཞིན་ཡོད། ཅེས་བཀའ་ལན་སྩལ། དེ་ཉིན་གྱི་སྔ་དྲོར་༸གོང་ས་མཆོག་གིས་ཀོ་རི་ཡའི་དད་ལྡན་པ་ཁག་གཅིག་ལ་མཇལ་ཁ་དང་བཀའ་སློབ་སྩལ་ཡོད། ༸གོང་ས་མཆོག་གིས་ཕྱི་ཚེས་ ༧ ཉིན་རྒྱལ་ས་ཊོཀ་ཁྱོར་ཉི་ཧོང་ཚན་རིག་པ་དང་ལྷན་ཚན་རིག་དང་འཕྲུལ་ཆས། ནང་ཆོས་སོགས་ཀྱི་ཐོག་བགྲོ་གླེང་མཛད་རྒྱུ་ཡིན་འདུག་པ་བཅས།།
