༢༠༡༢ ཟླ་ ༡༠ ཚེས་ ༡༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༠ ཉིན་ཨ་རིའི་གྲོས་ཚོགས་གོང་འོག་ཐུན་མོང་གི་རྒྱ་ནག་དང་འབྲེལ་བའི་འཛིན་སྐྱོང་ལས་དོན་ཚོགས་ཆུང་ནས་རྒྱ་ནག་ནང་འགྲོ་བ་མིའི་ཐོབ་ཐང་གནས་སྟངས་དང་ཁྲིམས་ལུགས་གནས་སྟངས་ཐོག་ཕྱི་ལོ་ ༢༠༡༢ ལོ་འཁོར་སྙན་ཐོ་བཏོན་ཡོད། སྙན་ཐོ་དང་འབྲེལ་བའི་ཐོག་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་ཀི་རི་ཡི་སི་སི་མི་ཐི་ Chris Smith ལགས་ཀྱིས་དེང་སྐབས་རྒྱ་ནག་ནང་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡོད་པའི་སྒྲུབ་བྱེད་དུ་རྒྱ་རིགས་ཁྲིམས་རྩོད་པ་སྐུ་ཞབས་ཁྲན་གུང་ཁྲན་ Chen Guangcheng དང་། རྒྱ་ནག་གཞུང་གིས་བཙན་དབང་འོག་མངལ་རླུགས་(Abortion) བཅུག་པའི་བུད་མེད་ཕེང་ཇན་མ་ཡི་ Feng Jianmei སོགས་ཀྱིས་ཉེན་ཁར་མ་འཛེམ་པར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་གནས་ཚུལ་རྣམས་སྤྱི་ཚོགས་དྲ་ལམ་ཐོག་སྤེལ་ཐབས་བྱས་པ་རྣམས་ལུང་འདྲེན་གནང་ཡོད། དེ་བཞིན་ལས་དོན་ཚོགས་ཆུང་གི་ཚོགས་གཞོན་གྲོས་ཚོགས་གོང་མའི་འཐུས་མི་སྐུ་ཞབས་ཤེ་རོ་ཌི་བྷོ་རོན་ Senator Sherrod Brown མཆོག་གིས་སྙན་ཐོ་དང་འབྲེལ་ནས་གསུང་དོན། ང་ཚོའི་སྙན་ཐོའི་ནང་གནད་དོན་བཅུ་དགུའི་ཐོག་ཞིབ་འཇུག་བྱེད་སྐབས། རྒྱ་ནག་ནང་གི་མི་མང་ཚོས་རང་ཉིད་ཀྱི་ཚེ་སྲོག་ལ་ཉེན་ཁ་ཆེན་པོའི་འོག་འགྲོ་བ་མིའི་ཐོབ་ཐང་དང་ཁྲིམས་ལུགས་དྲང་བདེན་ལག་བསྟར་ཡོང་རྒྱུ། དེ་བཞིན་ངལ་རྩོལ་བ་རྣམས་ཀྱི་ཐོབ་ཐང་སོགས་ལ་གཞུང་གིས་འགན་ཁུར་ཐོག་དྲང་བདེན་ཐོག་སྟངས་འཛིན་བྱེད་དགོས་པའི་འབོད་སྒྲ་ཡང་ཡང་བསྒྲགས་པ་རྣམས་ཧ་ཅང་གསལ་པོ་བཀོད་ཡོད། ཅེས་གསུངས་པ་མ་ཟད། བོད་དང་ཤིང་ཅང་སོགས་རྒྱ་ནག་གི་གྲངས་ཉུང་མི་རིགས་རྣམས་ཀྱི་སྐད་ཡིག་དང་ཆོས་དད། རིག་གཞུང་སོགས་ལ་རྒྱ་ནག་གཞུང་གིས་དམ་བསྒྲགས་ཧ་ཅང་ཆེ་རུ་གཏོང་བཞིན་པའི་སྲིད་བྱུས་ལ་ངོ་རྒོལ་སྤེལ་བཞིན་པ་དང། ལྷག་པར་བོད་ནང་ད་བར་བྱུང་མྱོང་མེད་པའི་བོད་མི་ ༥༠ བརྒལ་བས་རང་ལུས་མེར་སྲེག་བཏང་ཡོད། ཅེས་གསལ་བཤད་གནང་ཡོད་པ་བཅས།།