༢༠༡༢ ཟླ་ ༡༠ ཚེས་ ༢༢ རེས་གཟའ་ཟླ་བ།
༄༅། །གསར་འགྱུར་བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། མདོ་སྨད་བླ་བྲང་བསང་ཆུ་རྫོང་འབོ་ར་ཞང་དུ་རྒྱལ་གཅེས་པ་ལྷ་མོ་སྐྱབས་ལགས་ཀྱིས་རྒྱ་གཞུང་ལ་ཞི་རྒོལ་ཆེད་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་འདུག
ཕྱི་ལོ་ ༢༠༡༢ ཟླ་ ༡༠ ཚེས་ ༢༠ ཉིན་བོད་ནང་གི་ཉིན་གུང་ཆུ་ཚོད་ ༢།༠༠ ཡས་མས་སུ། མདོ་སྨད་བླ་བྲང་བསང་ཆུ་རྫོང་འབོ་ར་དགོན་པའི་ཉེ་འགྲམ་གྱི་ལམ་ཆེན་ཨང་རྟགས་ ༢༡༣ ཅན་གྱི་སྟེང་། འབོ་ར་སྒྲོག་འགབ་མ་སྡེ་བའི་ཕ་སྟོབས་ལྡན་དང་མ་སྙིང་མོ་ཐར་ལོ་གཉིས་ཀྱི་བུ། རང་ལོ་ ༢༧ ཡིན་པའི་རྒྱལ་གཅེས་པ་ལྷ་མོ་སྐྱབས་ལགས་ཀྱིས། དགོན་པའི་གཡས་ངོས་དང་ཐག་མི་རིང་བའི་འབོ་ར་མདོ་སྡེ་བའི་མདུན་ཕྱོགས་སུ་རང་ལུས་མེར་སྲེག་བཏང་སྟེ་ཀི་རིང་ཞིག་དང་བཅས་༸རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས། ཞེས་སོགས་སྐད་འབོད་གནང་ཡོད་ཀྱང་། གནས་ཚུལ་ཡོང་ཁུངས་ནས་ནང་དོན་གསལ་བོ་ཐོས་མི་འདུག
ཁོང་དགོན་པའི་ཕྱོགས་སུ་རྒྱུགས་སྐབས། ནམ་རྒྱུན་བདེ་འཇགས་ལ་བསྙད་དེ་སྐོར་གཡེང་བྱེད་བཞིན་པའི་ཉེན་རྟོག་པ་ཁག་གཅིག་ལམ་ཆེན་འགྲམ་དུ་ཡོད་པ་ཚོས་དང་ཐོག་ཁོའི་སྟེང་དུ་རྒྱུགས་ཀྱང་། རྒྱལ་གཅེས་པ་ཁོང་ཚམ་ཚོམ་མེད་པར་ཉེན་རྟོག་པ་ཚོའི་ཕྱོགས་སུ་ཕར་རྒྱུགས་སྐབས་ཉེན་རྟོག་མི་སྣ་ཚོ་བྲོས་འདུག ད་དུང་མུ་མཐུད་ཁོང་གི་ལུས་སྟེང་གི་མེ་ལྕེ་དམར་ལམ་ལམ་དུ་འབར་བཞིན་གོམ་པ་ཁ་ཤས་མདུན་དུ་རྒྱུགས་རྗེས་ཐང་ལ་འགྱེལ་ཏེ་སྐུ་གྲོངས་འདུག
གནས་ཚུལ་ཡོང་ཁུངས་ལྟར་ན། ཉེན་རྟོག་པ་དང་དེར་འདུས་སེར་སྐྱ་མི་མང་གི་བར་འཁྲུག་རྩོད་ཅུང་ཙམ་ཤོར་འདུག་ཀྱང་། གྲྭ་མང་དང་མི་མང་གིས་འདས་པོའི་སྐུ་ཕུང་འབོ་ར་དགོན་པའི་ཚོགས་ཆེན་འདུ་ཁང་གི་སྒོ་འཕྱོར་དུ་གདན་དྲངས་ཏེ་དགོན་པའི་གྲྭ་མང་ཡོངས་ཀྱིས་སྨོན་ལམ་གསུང་འདོན་གནང་འདུག དེ་བཞིན་དུས་ཡུན་རིང་པོ་མ་འགོར་བར་ཉེ་འཁོར་གྱི་མི་མང་གིས་གནས་ཚུལ་དེ་ཐོས་ནས་དགོན་པར་འབྱོར་འདུག གྲྭ་མང་གིས་སྨོན་ལམ་གསུང་གྲུབ་པ་དང་དེར་འདུས་འབོ་རའི་ཚོ་བ་བཞིའི་མང་ཚོགས་དང་གྲྭ་མང་གིས་མ་ཎི་རྒྱང་འཐེན་བྱས་ཏེ་སྐུ་ཕུང་སྒྲོག་འགབ་མ་སྡེ་བའི་ཁོང་གི་ཁྱིམ་དུ་གདན་འདྲེན་བྱས་འདུག
འདས་པོ་ཁོང་གི་བཟའ་ཟླའི་མིང་ལ་རྡོ་རྗེ་སྐྱིད་དང་། ད་ལོར་རང་ལོ་༢༨ཡས་མས་དང་། ཁོང་གཉིས་ལ་བྱིས་པ་འབྲུག་མོ་མཚོ་དང་། པདྨ་མཚོ་ཟེར་བའི་བུ་མོ་གཉིས་ཡོད་པ་ལས་གཅིག་ད་ལོ་རང་ལོ་ ༡༠ དང་གཅིག་ད་ལོར་རང་ལོ་ ༧ ཡིན་འདུག་པ་བཅས།།
