༢༠༡༢ ཟླ་ ༡༠ ཚེས་ ༡༡ རེས་གཟའ་ཕུར་བུ།
འཇིགས་མེད་རྒྱ་མཚོ་ལགས།
༄༅། །འདི་གར་ཕྱི་ལོ་ ༢༠༡༢ ཟླ་ ༡༠ ཚེས་ ༤ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། ཨ་མདོ་བླ་བྲང་དགོན་པའི་དགེ་འདུན་པ་མགོ་ལོག་འཇིགས་མེད་དམ་འཇིགས་མེད་རྒྱ་མཚོ་དང༌། ཡང་འཇིགས་མེད་མགོ་རིལ་ལམ་འཇིགས་མེད་རྒྱ་མཚོ་་གཉིས་ཀྱི་གནས་སྟངས་ཛ་དྲག་ཅན་དུ་གྱུར་ཡོད་འདུག འཇིགས་མེད་མགོ་རིལ་ལམ་འཇིགས་མེད་རྒྱ་མཚོ་ནི་བླ་བྲང་དགོན་པའི་དགེ་འདུན་པ་ཡིན་པ་དང༌། རྒྱ་ནག་གཞུང་ནས་ཆབ་སྲིད་ཀྱི་ལས་འགུལ་སྤེལ་བའི་ཉེས་མིང་དང་དོགས་གཞི་འོག་ད་བར་ཐེངས་བཞི་ཙམ་འཛིན་བཟུང་བཀག་ཉར་བྱས་མྱོང་ཡོད་པ་དང༌། མཐའ་མ་ཕྱི་ལོ་ ༢༠༡༡ ཟླ་ ༨ པའི་ནང་བཀག་ཉར་བྱས་རྗེས་ ༢༠༡༢ ལོར་དངོས་སུ་འཛིན་བཟུང་བྱས་སྐོར་ནང་མིར་བརྡ་ཐོ་བཏང་ཡོད། ཁོང་ནས་ ༢༠༠༨ ལོར་རྒྱ་ནག་གཞུང་ནས་བོད་མི་རྣམས་ལ་གཞི་རྩ་མེད་པའི་མནར་གཅོད་ཇི་ལྟར་བཏང་མིན་སོགས་ཀྱི་དངོས་ཡོད་གནས་སྟངས་ཁག་བརྙན་འཕྲིན་ཐོག་དངོས་སུ་ཐོན་ཏེ་ཕྱི་ཕྱོགས་སུ་བརྒྱུད་བསྒྲགས་གནང་ཡོད་པ་རེད། ཁོང་འཛིན་བཟུང་བྱས་རྗེས་གཙོད་གྲོང་ཁྱེར་དུ་ཡོད་པའི་མགྲོན་ཁང་ཞིག་ནང་གསང་རྒྱ་དམ་པོས་བཀག་ཉར་བྱས་རྗེས་འདྲི་རྩད་བྱས་ཡོད་པ་དང༌།
ཉེ་དུས་ཤེས་རྟོགས་བྱུང་བ་ལྟར་ན། ཁོང་ལན་ཀྲའུ་ས་གནས་སུ་ཡོད་པའི་བཙོན་པའི་སྨན་ཁང་ཞིག་ཏུ་སྨན་བཅོས་བྱེད་བཞིན་ཡོད་འདུག་ཅིང༌། ཁོང་ལ་ཁྲག་ཤེད་དང༌། སྙིང་དང་ཕོ་བ། མཆིན་པའི་ནད་གཞི་བཅས་ནད་རིགས་མི་འདྲ་བ་ལྔ་ཙམ་ཡོད་སྐོར་རྒྱ་གཞུང་འབྲེལ་ཡོད་ལས་བྱེད་ཀྱིས་གྲེལ་བཤད་བྱས་འདུག ཁོང་གི་སྤུན་མཆེད་ནས་སྨན་བཅོས་ལྟ་སྐྱོང་འོག་གློད་བཀྲོལ་བཏང་རོགས་ཞེས་ཞུས་ཀྱང༌། ད་བར་གློད་བཀྲོལ་གཏོང་མེད་པ་རེད། ཁོང་ལ་ད་བར་ཐག་གཅོད་ཀྱང་གང་ཡང་མ་བྱས་པར་མུ་མཐུད་བཀག་ཉར་བྱེད་མུས་ཡིན་པ་དེ་ནི་རྒྱ་ནག་གཞུང་ནས་དུས་རྒྱུན་དུ་བོད་མི་ཆབ་སྲིད་བཙོན་པ་རྣམས་ལ་ཚད་ལས་འདས་པའི་ཉེས་བརྡུང་བཏང་སྟེ་ཚ་འདྲི་བྱས་རྗེས་ཆབ་སྲིད་བཙོན་པ་རྣམས་ནད་གཅོང་བཟོས་ཏེ་ནང་མིར་རྩིས་སྤྲོད་བྱེད་པའམ་ནད་གཞིའི་དབང་གིས་རྐྱེན་འདས་སོང་བ་སོགས་འགྲེལ་བརྗོད་བྱས་ཏེ་མཐའ་མ་བཙོན་པ་དེ་དག་འདས་གྲོངས་སུ་འགྲོ་གི་ཡོད་པ་ལྟར། འཇིགས་མེད་རྒྱ་མཚོ་ལགས་ལའང་ད་ལྟ་གཟུགས་བབས་ནད་གཅོང་དུ་གྱུར་ཡོད་ཀྱང་ད་དུང་ཐག་གཅོད་དང་གློད་བཀྲོལ་གང་ཡང་མ་བྱས་པར་འཇོག་སྟངས་ལ་གཞིགས་ཚེ། མཐའ་མ་བཙོན་ཁང་ནང་འདས་གྲོངས་སུ་འགྲོ་རྒྱུའི་ཛ་དྲག་གནས་སྟངས་ཆགས་ཡོད་འདུག
དེ་མིན་བླ་བྲང་དགོན་པའི་དགེ་འདུན་པ་མགོ་ལོག་འཇིགས་མེད་དམ་འཇིགས་མེད་རྒྱ་མཚོ་ཡང་རྒྱ་ནག་གཞུང་ནས་ཕྱི་ལོ་ ༢༠༠༨ ལོར་འཇིགས་བྲལ་ཞེས་པའི་གློག་བརྙན་དཔར་ལེན་བྱས་པ་དང་འབྲེལ་བ་ཡོད་པར་བསྙད་བཏགས་པ་སོགས་ལས་ད་བར་སྔ་རྗེས་ཐེངས་གསུམ་ཙམ་འཛིན་བཟུང་བཀག་ཉར་བྱས་མྱོང་ཡོད་པ་མ་ཟད། ལྷག་པར་སྔ་ལོ་ ༢༠༡༡ ལོ་དཀྱིལ་དུ་རྒྱ་ནག་གཞུང་གི་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བླ་བྲང་དགོན་དུ་ཡོང་གཏན་འཁེལ་སྐབས། འཇིགས་མེད་རྒྱ་མཚོ་ལགས་ལ་ས་གནས་ཉེན་རྟོག་པས་གནས་སྐབས་དགོན་པ་ནས་ཁ་བྲལ་ཏེ་འགྲོ་དགོས་པའི་བཙན་བཀའ་བཏང་ཡོད་འདུག་པ་མ་ཟད། ཉེ་དུས་ ༢༠༡༢ ཟླ་ ༩ ཚེས་ ༢༠ ཉིན་བླ་བྲང་དགོན་ནས་གཙོད་གྲོང་ཁྱེར་ཁུལ་དུ་བསྐྱོད་རྗེས་གར་སོང་ཆ་མེད་དུ་གྱུར་ཏེ་ད་བར་སྤུན་ཉེ་འབྲེལ་ཚོས་རྩད་གཅོད་ག་ཚོད་བྱས་ཀྱང་ཤེས་རྟོགས་མེད་པར་གྱུར་ཡོད་པ་མ་ཟད། མགོ་ལོག་འཇིགས་མེད་རྒྱ་མཚོ་ལགས་ནི་རྒྱུན་གཏན་ནས་ས་གནས་སྤྱི་བདེ་ཉེན་རྟོག་པས་དམིགས་བསལ་དོ་དམ་བྱ་ཡུལ་གྱི་མི་སྣའི་གྲས་ཤིག་ཡིན་སྟབས། རྒྱུན་གཏན་བསུན་གཙེར་དང་སྡང་ཟུག་ཆེ་ཙམ་ཡོད་པར་བརྟེན། ས་གནས་ཡུལ་མི་ཚོས་ཁོང་རྒྱ་ནག་གཞུང་གི་སྤྱི་བདེ་ཚན་པས་གསང་བའི་ཐོག་འཛིན་བཟུང་བཀག་ཉར་བྱས་ཏེ་ཉེ་འབྲེལ་ཚོར་བརྡ་ལན་ཙམ་ཡང་མ་བྱས་པར་བཙན་ཤེད་ཀྱིས་ཚ་འདྲི་བྱེད་ཀྱི་མེད་དམ་སྙམ་པའི་བློ་དོགས་བྱེད་བཞིན་ཡོད་འདུག་པ་བཅས།།
