༢༠༡༢ ཟླ་ ༡༠ ཚེས་ ༡༡ རེས་གཟའ་ཕུར་བུ།
༄༅། །འདི་གར་བོད་མིའི་སྒྲིག་འཛུགས་ཕྱི་དྲིལ་ཁོར་ཡུག་ཚན་པས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཕྱི་དྲིལ་ཁོར་ཡུག་ཚན་པའི་འགན་འཛིན་བསྟན་འཛིན་ནོར་བུ་ལགས་ཀྱིས་ཕྱི་ཟླ་ ༡༠ ཚེས་ ༩ ཉིན་ལ་དྭགས་ལྕོག་ལམ་གསར་བོད་ཁྱིམ་སློབ་གྲྭའི་སློབ་ཕྲུག་རྒན་པ་ཁག་གཅིག་ལ་འཛམ་གླིང་གི་སྣེ་གསུམ་པ་མཐོ་སྒང་བོད། ཅེས་པའི་བརྗོད་གཞིའི་ཐོག་བོད་ཀྱི་ཁོར་ཡུག་སྐོར་གོ་རྟོགས་སྤེལ་ཡོད། སྐབས་དེར་འགན་འཛིན་གྱིས་མཐོ་སྒང་བོད་དེ་ཨེ་ཤི་ཡ་དང་འཛམ་གླིང་ནང་གལ་གནད་ཆེན་པོ་ཇི་འདྲ་ཆགས་ཡོད་སྐོར་དང། དེང་སྐབས་རྒྱ་ནག་གཞུང་གི་སྲིད་བྱུས་འོག་བོད་ཀྱི་སྣོད་བཅུད་གཉིས་ཀར་དོ་ཕོག་ཧ་ཅང་འབྱུང་བཞིན་པ་དང།
ལྷག་པར་རྒྱ་ནག་གཞུང་གིས་བོད་ཀྱི་ས་ཁུལ་ནང་གང་བྱུང་གཏེར་ཁ་སྔོག་འདོན་བྱས་དང་བྱེད་མུས་ཡིན་པར་བརྟེན། སྲིད་བྱུས་དེའི་རྗེས་འབྲས་ཇི་བྱུང་སོགས་ཞིབ་ཕྲ་པར་རིགས་ལམ་ནས་འགྲེལ་བཤད་གནང་ཡོད།ཕྱོགས་མཚུངས་བོད་ནི་ས་མཐོ་ཞིང་ལྷོ་ཨེ་ཤི་ཡའི་དབྱར་ཞོད་དུས་ཐོག་བབ་མིན་དེ་བོད་ཀྱི་ཁོར་ཡུག་ལ་རག་ལུས་སྐོར་དང། དེ་བཞིན་རྒྱ་གར་གཙོ་བོར་གྱུར་བའི་རྒྱལ་ཁབ་མང་པོའི་རྒྱུག་ཆུའི་འབྱུང་ཁུངས་ལྟ་བུ་ཆགས་ཡོད། བོད་ནང་རྒྱ་ནག་གཞུང་གིས་གང་བྱུང་འཛུགས་སྐྲུན་བྱས་པར་བརྟེན། བོད་ཀྱི་ས་བཅུད་ལ་ཧ་ཅང་གནོད་འཚེ་བཟོ་བཞིན་ཡོད། ཕྱི་ལོ་ ༡༩༩༨ ལོར་རྒྱ་ནག་ནང་ཆུ་ལོག་ཧ་ཅང་ཤུགས་ཆེ་བྱུང་བའི་དབང་གིས་བོད་ནང་ཤིང་སྣ་གང་བྱུང་གཅོད་འབྲེག་བྱ་རྒྱུར་རྒྱ་ནག་གཞུང་གིས་ཁྲིམས་བཅད་ཡོད་ཚུལ་བརྗོད་བཞིན་ཡོད་ནའང།
དེང་སྐབས་འཛུགས་སྐྲུན་ལ་ཁ་གཡར་ནས་བོད་ཀྱི་ཤིང་སྣ་མུ་མཐུད་གཅོད་འབྲེག་བྱས་ཏེ་རྒྱ་ནག་ཏུ་འོར་འདྲེན་བྱེད་བཞིན་ཡོད་སྐོར་གསལ་བཤད་གནང་ཡོད།
ཕྱོགས་མཚུངས་ཁེ་ན་ཌ་དང་ཧོང་ཀོང་གི་ཚོང་ལས་སྡེ་ཚོགས་གཉིས་ཟུང་འབྲེལ་ཐོག་ནས་ཆུ་ཚོང་རྒྱག་སྐབས་བོད་ཀྱི་རྒྱལ་ས་ལྷ་སའི་བྱང་ངོས་ནས་མཐུང་ཆུའི་འགྱིག་སྣོད་རྒྱ་ནག་མཚོ་འགྲམ་གྱི་ས་ཁུལ་ཁག་ཏུ་འཚོང་བཞིན་ཡོད་པ་དང། ཚོང་ལས་སྡེ་ཚོགས་ཀྱི་མིང་དུ་ ༥༡༠༠ ཞེས་བཏགས་པའི་གོ་དོན་ནི། མཐུང་ཆུ་དེ་དག་གི་འབྱུང་ཁུངས་ས་ཆའི་མཐོ་ཚད་ཡིན་པ་མཚོན་བཞིན་ཡོད། ཅེས་འགྲེལ་བཤད་གནང་རྗེས་སློབ་མ་ཚོའི་དྲི་བ་རྣམས་ལ་ལན་འདེབས་གནང་ཡོད་པ་བཅས།།
