༢༠༡༢ ཟླ་ ༡༠ ཚེས་ ༥ རེས་གཟའ་པ་སངས།
༄༅། །འདི་གར་ཕྱི་ལོ་ ༢༠༡༢ ཟླ་ ༡༠ ཚེས་ ༤ ཉིན་ཁུངས་ལྡན་གནས་ཚུལ་འབྱོར་གསལ་ལྟར་ན། ད་ལྟའི་བོད་རང་སྐྱོང་ལྗོངས་ཟེར་བའི་ཁོངས་གཏོགས་ནག་ཆུ་ས་ཁུལ་དུ་བོད་རིགས་ན་གཞོན་དགུ་གྲུབ་ཞུ་བ་ཞིག་གིས་ཕྱི་ཟླ་ ༡༠ ཚེས་ ༤ ཉིན་ནག་ཆུ་ས་ཁུལ་གྱི་ཁྲོམ་གཞུང་དུ་སྔ་དྲོའི་ཆུ་ཚོད་ ༡༠ ཡོལ་ཙམ་དུ་རང་ལུས་མེར་སྲེག་ཀྱི་ལས་འགུལ་སྤེལ་ཏེ་འདས་གྲོངས་སུ་གྱུར་རྗེས་རྒྱ་གཞུང་ནས་ཁོང་གི་སྐུ་ཕུང་ནང་མིར་རྩིས་སྤྲོད་མ་བྱས་པའི་གནས་ཚུལ་ཐོན་འདུག དེ་ཡང་ཁོང་གིས་རང་ལུས་མེར་སྲེག་གཏོང་སྐབས། ང་ཚོ་གང་དུ་སོང་ཡང་རང་དབང་མི་འདུག བོད་ལ་རང་དབང་དགོས། ྋརྒྱལ་བ་བསྟན་འཛིན་རྒྱ་མཚོ་བོད་ལ་ཕེབས་འཇུག་དགོས་ཞེས་སོགས་སྐད་འབོད་གནང་འདུག
དགུ་འགྲུབ་ལགས་ནི་ནག་ཆུ་ས་ཁུལ་འབྲི་རུ་རྫོང་ཁོངས་ཤག་ཆུ་གྲོང་བརྡལ་གྲོང་ཚོ་ཨང་ ༢༡ པ་ནས་ཡིན་པ་དང༌། ཕ་མིང་དུ་འབྲུག་རྒྱལ་ཚེ་འདས་དང༌། མ་མིང་དུ་བདེ་མོ་ཞུ་གི་ཡོད་ཅིང༌། ད་ལྟ་རང་ལོ་ ༤༣ ཙམ་དུ་སོན་གྱི་ཡོད། ཕྱི་ལོ་ ༢༠༠༥ ལོའི་ལོ་དཀྱིལ་དུ་རྒྱ་གར་དུ་ཡོང་སྟེ་ཤེས་རབ་དགའ་ཚལ་སློབ་གླིང་དུ་སློབ་གཉེར་བྱས་མྱོང་ཡོད་ཅིང༌། ཕྱི་ལོ་ ༢༠༠༦ ལོའི་ལོ་མཇུག་ཏུ་སློབ་གྲྭ་ནས་ལུགས་མཐུན་རྩ་དགོངས་ཞུས་ཏེ་རང་ཉིད་ཀྱི་ཕ་ཡུལ་དུ་ཕྱིར་ལོག་བྱས་ཡོད་པ་རེད། ཁོང་གི་ཕ་མ་གཅིག་པའི་སྤུན་མཆེད་ཁོང་རང་ཕུད་གཅེན་གཅུང་བཞི་ཡོད་པ་ནས། སྤུན་མཆེད་གཅིག་ཁྲེན་ཏུར་སློབ་གཉེར་བྱེད་མུས་སུ་ཡོད་པ་ནས་ཁ་ས་རང་ལུས་མེར་བསྲེགས་ཀྱི་ལས་འགུལ་ཐོན་རྗེས་སྤུན་མཆེད་དེ་སྤྱི་བདེ་ཉེན་རྟོག་པས་ཕ་ཡུལ་དུ་བསྐོང་སྒུག་བྱས་པའི་གནས་ཚུལ་ཐོན་ཡོད་འདུག་ཀྱང་ཞིབ་ཕྲ་གནས་ཚུལ་ཁ་གསལ་མི་འདུག
དགུ་འགྲུབ་ལགས་ཀྱིས་ད་ལོའི་ཕྱི་ཟླ་ ༣ ཚེས་ ༡༤ ཉིན་ཁོང་ནས་དྲ་གནས་ཐོག་ཞལ་ཆེམས་ལྟ་བུར་ཚེ་སྲོག་གི་རྡུང་བའི་རྒྱལ་རྔ་ཞེས་པ་དང༌། དེ་མིན་སྤུན་ཟླའི་བརྩེ་སེམས་ཞེས་པ་ཁོང་རང་ནས་འབྲི་རྩོམ་བྱས་ཏེ་དྲ་གནས་ཐོག་བཞག་ཐུབ་པ་ལྟར་གཤམ་དུ་འདྲེན་བཀོད་ཞུས་ཡོད།
ཚེ་སྲོག་གི་རྡུང་བའི་རྒྱལ་རྔ༌།
སྐྱིད་སྡུག་དང་ལས་དབང་གཅིག་པའི་གངས་ཅན་པའི་དམིགས་ཡུལ་ནི། རང་བཙན་གཙང་མའི་སྒོ་ནས་ྋགོང་ས་མཆོག་བོད་དུ་གདན་འདྲེན་ཞུ་རྒྱུ་ནི་ང་ཚོའི་མངོན་འདོད་ཡིན། འོན་ཀྱང་༸གོང་ས་མཆོག་གིས་འཚེ་མེད་ཞི་བའི་སྒོ་ནས་དབུ་མའི་ལམ་གྱི་སྲིད་བྱུས་གཏན་ལ་ཕབ་སྟེ་རང་སྲིད་རང་སྐྱོང་གི་ཐོབ་ཐང་ལ་འབད་བརྩོན་གནང་བ་ལ། བོད་མི་ས་ཡ་དྲུག་གི་ཁོང་གི་བཀའ་དགོངས་སྤྱི་བོར་བཀུར་ཏེ་ཡུན་རིང་རེ་སྒུག་བྱས་ཀྱང༌། རྒྱ་གཞུང་གིས་དེའི་ཕྱོགས་ལ་ཐུགས་ཁུར་དང་རྒྱབ་སྐྱོར་ཕུད། བོད་པའི་བདེ་སྡུག་གླེང་བ་ཙམ་གྱིས་འཛིན་བཟུང་དང་མནར་གཅོད་ཚད་ལས་རྒལ་བ་གཏོང་བས་མ་ཚད། ྋགོང་ས་མཆོག་ལ་མཚན་སྨད་དང་བོད་འདི་ཀྲུང་གོའི་ཆ་ཤས་ཡིན་པའི་དམ་བཅའ་བརྟན་པོ་མེད་ཚེ། ལྐོག་གསོད་གཏོང་སྟེ་གར་སོང་ཆ་མེད་དུ་འགྲོ་བ་ལས། བོད་མིའི་བདེ་སྡུག་ལ་དོ་སྣང་དང་དྲིལ་བསྒྲགས་ཅི་ཡང་མེད་སྟབས།
ང་ཚོས་ཞི་བའི་འཐབ་རྩོད་ནི་རྣོ་ངར་ཆེ་རུ་བཏང་སྟེ། བོད་པའི་དངོས་ཡོད་ཀྱི་གནས་ཚུལ་རྣམས་དྲིལ་བསྒྲགས་དང་བདེན་དཔང་གི་ཆེད་དུ། རང་ལུས་མེ་རུ་མཆོད་དེ་བོད་རང་བཙན་གྱི་འབོད་སྒྲ་སྒྲོགས་དོན། ཀྱེ་ནམ་མཁའི་ལྷ་ཆེན་པོ་ཁྱེད་ཀྱི་སྤྱན་ཟུང་བོད་ལ་གཟིགས་དང༌། མ་ཡུམ་གྱི་ས་ཆེན་པོ་ཁྱེད་ཀྱི་བྱམས་བརྩེ་བོད་ལ་དགོངས་དང༌། བར་གནས་ཀྱི་འཛམ་གླིང་ཡོངས་ཀྱིས་དྲང་བདེན་ལ་མཐོང་ཆེན་གནང་རོགས། དྭངས་གཙང་ཁ་བའི་ལྗོངས་འདིར་དམར་པོ་ཁྲག་ལ་བསྒྱུར་བས་མ་ཚད། དྲག་པོ་དམག་གིས་ས་གཞི་བཀང་སྟེ་བར་མི་ཆད་པའི་དྲག་གནོན་རྒོད་ཀྱང༌། དཔའ་ངར་ཞུམ་པ་མེད་པའི་གངས་ཕྲུག་རྣམས་ཀྱིས་བློ་གྲོས་ཀྱི་གཞུ་མོ་བཀུག ཚེ་སྲོག་གི་མདའ་མོ་འཕེན་ཏེ། དྲང་བདེན་གྱི་གཡུལ་ངོ་ཟློག་རྒྱུ་ཡིན། མཇུག་ཏུ་ཁ་བ་རི་པའི་ཕུ་ནུ་མིང་སྲིང་ཚོས། འདྲ་མཉམ་དང་རང་དབང་གི་ཐོབ་ཐང་ལོངས་སུ་སྤྱོད་ཕྱིར། གངས་ཅན་པའི་སྤྱི་དོན་ལ་གཙོ་བོ་དང༌། སྒེར་དོན་ལ་ཕལ་པ་བྱེད་དེ། རྡོག་རྩ་ཆིག་སྒྲིལ་གྱི་མདུན་དུ་སྐྱོད་རྒྱུ་ནི་ངའི་རེ་བ་ཡིན། འབྲི་རུ་བ་དགུ་གྲུབ་ནས། ཕྱི་ལོ་ ༢༠༡༢ ཟླ་ ༣ ཙེས་ ༡༤ ཅེས་འཁོད་ཡོད་འདུག་པ་དང༌།
སྤུན་ཟླའི་བརྩེ་སེམས།
ཁ་བ་རི་པའི་ཕུ་ནུ་མིང་སྲིང་ཚོས་འདས་སོང་ལ་ཕྱི་མི་ཞིག་བལྟས་ཚེ། ཕངས་སེམས་དང་ཁོང་ཁྲོ་སྐྱོ་གདུང་དང་མིག་ཆུ་ཞིག་ལས་དགའ་སྤྲོའི་རྣམ་པ་མ་མཐོང་ཡང༌། མདུན་ནས་བསུ་བའི་ཆུ་འབྲུག་གནམ་ལོ་གསར་ཚེས་འདིའི་ནང་ནས་ཁྱེད་རྣམས་སྐུ་ཁམས་བདེ་ཐང་དང་བྱ་བ་ལམ་འགྲོ་རེ་སྒུག་མངོན་འགྱུར་ཡོང་བའི་སྨོན་འདུན་ཡང་ཡང་ཞུ་བ་དང་ཆབས་ཅིག་ཁྱེད་རྣམས་ཀྱིས་རང་རིགས་ཀྱི་སྤོབས་པ་གཟེངས་སུ་བསྟོད་དེ། རང་ཕྱོགས་སུ་ཕམ་ཁ་དང་གྱོང་གུད་ཅི་ཙམ་བྱུང་ཡང་བློ་སྟོབས་མ་ཉམས་པའི་སྒོ་ནས་ཆིག་སྒྲིལ་ལ་འབད་འབུངས་དམ་ཟབ་ཡོང་བའི་རེ་བ་ཤིན་ཏུ་ཆེ། འབྲི་རུ་དགུ་གྲུབ་ནས་ཞེས་འཁོད་ཡོད་འདུག
