༢༠༡༢ ཟླ་ ༡༠ ཚེས་ ༡༢ རེས་གཟའ་པ་སངས།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ཝར་ཇི་ནི་ཡ་མངའ་སྡེའི་གྲོང་ཁྱེར་ཝི་ལི་ཡམ་བྷག་སིའི་(Williamsburg) དུ་༸ཞབས་སོར་འཁོད་དེ་དགེ་ལས་སློབ་མ་ཁྱོན་མི་གྲངས་ ༨༠༠༠ བརྒལ་བར་བྱམས་བརྩེའི་སྐོར་བཀའ་སློབ་སྩལ་གྲུབ་བསྟུན། མང་ཚོགས་ཀྱི་དྲི་བར་བཀའ་ལན་མཛད། དེ་རྗེས་༸གོང་ས་མཆོག་གིས་གཙུག་ལག་སློབ་ཁང་གི་སློབ་མ་ཁག་གཅིག་དང་ལྷན་མཇལ་འཕྲད་མཛད་ཡོད། དེའི་ཁོངས་སུ་རྒྱ་ནག་ནས་ཡིན་པའི་སློབ་མ་ཡང་ཡོད། སྐབས་དེར་རྒྱ་རིགས་སློབ་མ་ཞིག་གིས་ཕྱི་ལོ་ ༢༠༠༨ ལོར་བོད་ས་ཡོངས་སུ་བོད་མིས་ཞི་རྒོལ་ལ་ཁག་དཀྲིས་ཏེ་རྔམ་སྟོན་བྱས་པ་དེ་རྒྱ་ཧན་མི་རིགས་ལ་ངོ་རྒོལ་བྱས་པ་ཞིག་མིན་ནམ། ཞེས་དྲི་བ་ཞུས་པར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་རྩོད་བཞིན་ཡོད་པ་ལས་རྒྱ་ནག་གཞུང་གིས་བོད་ཀྱི་གནད་དོན་ཐོག་དྲིལ་བསྒྲགས་ལོག་པ་བྱེད་བཞིན་པ་དེར་རྒྱ་ནག་མི་མང་ཚོས་མགོ་སྐོར་ཐེབས་རྒྱུ་མེད།
ཅེས་བཀའ་ལན་སྩལ་བ་དང་སྦྲགས་༸གོང་ས་མཆོག་གིས་འདས་པའི་ལོ་ངོ་ ༦༠ རིང་གི་ལོ་རྒྱུས་ངོ་མ་ཇི་བྱུང་སོགས་ཀྱི་གནས་སྟངས་ཞིབ་ཕྲ་གསལ་བཤད་མཛད་པ་དང་ལྷན་བཀའ་ལན་སྩལ་དོན། ཕྱི་ལོ་ ༡༩༥༩ ལོའི་བོད་མིའི་ཞི་བའི་སྒེར་ལངས་ཆེན་མོ་མ་བྱུང་གོང་ལ་བོད་མི་མང་པོས་བོད་ནང་དུ་ཡོད་པའི་རྒྱ་ནག་གཞུང་གི་ས་གནས་རྒྱ་ནག་དཔོན་རིགས་ཚོས་བོད་མིའི་ཐོག་འཛིན་བཞིན་པའི་སྲིད་བྱུས་ལ་སྐྱོན་བརྗོད་ཡང་ཡང་ཡོང་གི་ཡོད་པར་བརྟེན། རིམ་བཞིན་རྒྱ་ནག་གཞུང་གི་འབྲེལ་ཡོད་ས་གནས་དཔོན་རིགས་ཚོའི་བྱེད་ཕྱོགས་ལ་བོད་མི་ཚོས་ཡིད་ཆེས་ཆུང་དུ་ཕྱིན་མཐར་ཕྱི་ལོ་ ༡༩༥༥།༡༩༥༦ ལོར་བོད་མིའི་ཞི་བའི་སྒེར་ལངས་འགོ་འཛུགས་སྐབས་ཐད་ཀར་དྲག་གནོན་བྱས་པ་མ་གཏོགས། བོད་མིའི་མངོན་འདོད་ཇི་ཡིན་ཐོག་བསམ་ཤེས་རྩ་བ་ནས་བྱས་མེད། མའོ་ཙེ་ཏུང་གིས་དཀའ་ངལ་འཕྲད་ཚེ་ཁོང་ལ་ཐད་ཀར་འབྲེལ་བ་བྱེད་དགོས་བརྗོད་པར་བརྟེན། ངོས་ཀྱིས་ཁོང་ལ་ཞུ་སྙན་ཐེངས་གསུམ་བཞི་བཏང་ཡང་ཡ་ལན་གང་ཡང་མ་བྱུང། ལོ་གཉིས་ཙམ་གོང་རྒྱ་རིགས་ཆོས་གྲོགས་ཤིག་ངོས་དང་ཐུག་འཕྲད་བྱུང། ཁོང་ངོས་དང་མ་ཐུག་སྔོན་ཆེད་མངགས་བོད་ཀྱི་གནད་དོན་རྟོགས་ཆེད་བོད་དུ་བསྐྱོད་སྐབས། བོད་ཀྱི་རྒྱལ་ས་ལྷ་སའི་ཇོ་ཁང་མདུན་དུ་བོད་མི་རྣམས་རྐྱང་ཕྱག་འབུལ་བཞིན་པའི་མདུན་དུ་བོད་མིའི་ཆོས་དད་ལ་གུས་བརྩི་སྤུ་ཙམ་མེད་པའི་ཐོག་ནས་རྒྱ་མིའི་དམག་སྦྱོང་བྱེད་བཞིན་པ་མཐོང་ལུགས་བརྗོད་བྱུང། དེར་བརྟེན་ཁོང་གིས་གལ་ཏེ་བོད་ནང་ཁ་བྲལ་བ་ཡོད་ན་ཁ་བྲལ་གཏོང་མཁན་དེ་རྒྱ་མི་རེད། ཅེས་ངོས་ལ་བརྗོད་བྱུང། ཞེས་བཀའ་ལན་སྩལ་བ་མ་ཟད། ལྷན་ཚོགས་མཇུག་སྡོམ་ཁར་༸གོང་ས་མཆོག་གིས་རྒྱ་རིགས་ཚོར་བཀའ་སློབ་སྩལ་དོན། རྒྱ་རིགས་ཆོས་གྲོགས་ཕོ་མོ་ཚོས་རྒྱ་ནག་གཞུང་གིས་དྲིལ་བསྒྲགས་ལོག་པ་མང་དག་ཅིག་སྤེལ་བ་དེ་དག་ལ་ཡིད་ཆེས་མ་གནང་རོགས། བོད་མི་རྣམས་ནས་རྒྱ་མི་རིགས་དང་རྒྱ་ནག་གི་གནའ་བོའི་རིག་གཞུང་ཕྱུག་པོ་ཡོད་པ་དེ་དག་ལ་བརྩི་བཀུར་ཆེན་པོ་ཞུ་བཞིན་ཡོད། ཕྱོགས་མཚུངས་བོད་མི་ཚོ་གང་ཡང་མི་ཤེས་མཁན་ཀླ་ཀློ་ལྟ་བུ་མིན་པར་བྱུང་རབས་ལོ་རྒྱུས་ལྡན་པའི་མི་རིགས་ཤིག་དང་། རང་གི་ཐུན་མིན་ཆོས་དང་རིག་གཞུང། སྐད་ཡིག གོམས་གཤིས་སོགས་ཕྱུག་པོ་ཡོད་པའི་མི་རིགས་ཤིག་ཡིན། ང་ཚོས་བོད་རྒྱ་གཉིས་སྨན་གྱི་ལངས་ཕྱོགས་བཟུང་སྟེ་བོད་ཀྱི་གནད་དོན་སེལ་ཐབས་བྱེད་བཞིན་ཡོད། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་མིང་དོན་མཚུངས་པའི་རང་སྲིད་རང་སྐྱོང་གི་ཐོབ་ཐང་རྩོད་བཞིན་ཡོད། དེར་བརྟེན་ཁྱེད་ཚོ་རང་དབང་ལུང་པའི་ནང་ཡོད་པའི་རྒྱ་མི་རིགས་ཚོས་གོ་སྐབས་བཟུང་སྟེ་རང་གི་མིག་གཉིས་དང་རྣ་ཅོག་གཉིས་ཀྱི་སྒོ་མོ་ཡངས་པོར་ཕྱེ་ནས་ཕྱོགས་ཡོངས་ཀྱི་གནས་སྟངས་ལ་གཞི་བཅོལ་ཏེ་བོད་མིའི་དངོས་ཡོད་དཀའ་ངལ་ཇི་ཡིན་ཤེས་ཐབས་གནང་རྒྱུ་ཧ་ཅང་གལ་ཆེན་པོ་ཆགས་ཡོད། དུས་རབས་ ༢༠ དེ་མི་གསོད་ཁྲག་སྦྱོར་གྱི་དུས་རབས་ཤིག་ཆགས་ཟིན། འབྱུང་འགྱུར་དཀའ་ངལ་རྣམས་གྲོས་མོལ་གྱི་ལམ་ནས་སེལ་ཐབས་བྱ་རྒྱུ་ཁོ་ནས་ལས་ཐབས་ལམ་གཞན་མེད་པར་བརྟེན། དུས་རབས་ ༢༡ འདི་གྲོས་མོལ་གྱི་དུས་རབས་ཤིག་ཆགས་རྒྱུར་ང་ཚོས་འབད་བརྩོན་བྱེད་དགོས། ཞེས་བཀའ་སློབ་སྩལ།།
